Македонија
Војниците поднесоа кривична за Славјанка Петровска, го спречила синдикалното движење, а најавија и протести пред Владата оти Мислајловски 130 дена ги игнорира
Независниот синдикат на професионални војници (НСПВ) поднесе кривична пријава против поранешната министерка за одбрана, Славјанка Петровска, под сомнение дека ја злоупотребила службената должност и го спречила синдикалното движење. Претседателот на Синдикатот, Александар Насковски, цели дека и актуелното раководство во Министерството ги игнорира нивните проблеми, па најави протести пред Владата доколку не се најде решение.
„Пријавеното лице во периодот од 1 декември 2023 година до 28 мај 2024 година го сопре функционирањето на Синдикатот спротивно на Законот за работните односи, ја сопре уплатата на членарината спротивно на колективниот договор на Министерството за одбрана, го замрзна членството и со сето тоа го спречи синдикалното движење на Синдикатот, како и неговото работење за подобрување на правата на припадниците на Армијата“, рече претседателот на НСВП, Насковски.
Со спречувањето на синдикалното движење професионалните војници велат дека поранешната министерка ги прекршила Законот за работните односи, колективниот договор, општиот колективен договор за јавниот сектор и конвенциите на меѓународната организација на трудот.
Насковски обвини за фалсификати и наследен криминал во Министерството за одбрана од претходната министерка.
„Како моментно најкорумпирана институција, за период од девет месеци се направија три фалсификати. Од страна на криминалната група е Министерството за социјална политика, демографија и млади. Овие фалсификати ги потпишаа тројца министри и се спроведоа во Министерството за одбрана. Тој криминал е наследен од претходниот министер и трае и ден-денес во рамките на Министерството за одбрана. Во која НАТО-армија Синдикатот е блокиран, не се почитуваат одлуките на претседателот и средствата се префрлаат на друга сметка и на друго лице? Цврсто сме убедени дека министерот за одбрана е добро манипулиран од структури во Министерството за одбрана, кои од многу одамна дејствуваат во Министерството за одбрана и секогаш се појавуваат кога се во прашање професионалните војници и нивниот Синдикат“, вели претседателот на НСВП, Насковски.
Тој јавно го повика актуелниот министер за одбрана, Владо Мисајловски, да го разреши криминалот оти обидите на Синдикатот да договори средба со него не биле успешни. Во спротивно најави протести пред Владата.
„Ако во најбрз рок не се сопрат ова блокирање и криминалот врз Синдикатот во Министерството за одбрана, професионалните војници ќе излезат на протести пред Владата на Република Македонија како во 2009 година. Овој криминал трае цели 11 месеци. Треба да има социјален дијалог, а не да се блокира и да се краде Синдикатот. Професионалните војници бараат решавање на нивниот статус, право на пензионирање по 45. година и трансформирање на работниот однос на неопределено време. 130 дена имаме игнорирање од страна на министерот, немаме социјален дијалог, не нè повика да ги соопштиме овие проблеми, кои се преземени од претходниот министер и претходната влада“, рече Насковски.
Трипати се обратиле и до премиерот, од каде што двапати добиле половични одговори дека Министерството треба да им одговори за проблемите. Побарале средба и со претседателката Гордана Сиљановска-Давкова како врховен командант, но и од таму досега не добиле одговор на барањето да ѝ ги соопштат проблемите. Поради молкот на институциите, професионалните војници сметаат дека ги искористиле сите демократски начини за комуникација, па им останува да излезат на протест.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Без разлика на етничката, верската и политичката припадност, на 2 ноември да се обединиме во Кичево
После вториот круг очекувам 59 градоначалници да има коалицијата предводена од ВМРО-ДПМНЕ, со што ќе ја заокружиме највисоката бројка во историјата на демократската Македонија, по бројот на градоначалници, којашто некогаш се случила. И ако на тоа се додаде и извесната победа на Орце Ѓорѓиевски за град Скопје, којшто води 3:1 после првиот круг во однос на неговиот противкандидат, тогаш заокружуваме бројка од 60 градоначалници коишто ќе дојдат од коалицијата предводена од ВМРО-ДПМНЕ, вклучително и главниот град, рече претседателот на ВМРО-ДПМНЕ, Христијан Мицкоски на вечерашниот мини митинг во Кичево во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори на 2 ноември во недела.
Мицкоски се осврна и на победата на коалицијата предводена од ВМРО-ДПМНЕ за листите на советници во 58 општини.
Додаде дека не било лесно, туку дека било тешко, но единството и поддршката на граѓаните покажале дека може да се совлада и помногуброен противник.
„Затоа е многу важно на 2 ноември во недела да се обединиме овде во Кичево, без разлика на нашите различности, без разлика дали тие различности се етнички, верски или политички. Многу е важно да бидеме како едно, да се обединиме околу вредностите коишто ги споделуваме, да се обединиме околу цивилизацијата којашто ја застапуваме. Затоа што јас сум убеден дека против кандидатот на Александар не ги споделува нашите вредности, не ја споделува нашата цивилизација. И секој оној којшто ќе го земе пенкалото во рака и ќе застане позади гласачката кутија, со гласачкиот лист пред него, нека го слуша својот разум и своето срце и нека гледа длабоко во својата душа, од таму ќе извира бројот 9. И нека го заокружи бројот 9, нека заокружи за Александар“, повика Мицкоски.
Секој оној кој ќе биде исправен пред предизвикот дали да го поддржи Александар или неговиот против кандидат, додаде Мицкоски, нека се присети на вредностите кои ги застапува Александар и вредностите кои ги застапува неговиот против кандидат.
„Дали вие сакате да живеете во средина во којашто ќе владеат криминалот, блуд, разврат и уцени? Дали сакате Кичево да биде домаќин на блуд, разврат, криминал и уцени? Заборавете на етничката припадност, сетете се на вашите ќерки, на вашите внуки, дека некоја од нив може да биде жртва на овој човек. Затоа, кога ќе го имате пенкалото во рака, верувајте во вредности, не во басни, не во приказни. Заборавете на нешто што некој ви кажува дека се случило пред 4, 5, 6 децении, верувајте на оние коишто ви кажуваат што ќе се случува за четири, пет децении од денес. Заборавете на оние романтични приказни што некој ви ги кажува за некое измислено минато коешто никогаш не се случило. Верувајте на иднината којашто сите ние заедно Македонци, Албанци, Турци, Роми, Срби, Власи, Бошњаци и останати ќе ја градиме. Тоа е иднината на Македонија“, упати Мицкоски обединувачка порака и повик до сите етнички заедници.
Македонија
Николоски: Скопје од денеска директно се поврзува со шпанската престолнина Мадрид
Скопје од денеска директно се поврзува со шпанската престолнина Мадрид, авиолинија која е една од дваесетте авиолинии што ги воведовме во изминатата година, истакна вицепремиерот и министер за транспорт Александар Николоски, кој заедно со амбасадорот на Шпанија во Македонија, Рафаел Сориано Ортиз и Неџат Курт, генерален директор на ТАВ Македонија, го означија првиот лет Скопје-Мадрид.
Николоски потенцираше дека ова е огромен успех за авиосообраќајот, бидејќи со воведувањето на новите линии се забележува и значителен раст на патници и туристи во Македонија.
„Многу ми е драго што денеска почнува директна линија помеѓу Скопје и Мадрид, ги поврзуваме двата главни града, главниот град на Кралството Шпанија и главниот град на Македонија, нешто што е многу значајно, за развојот на туризмот, за развојот на бизнисот и за размената помеѓу двата народи, размената во културата, нешто што навистина многу значи“.
Од минатата година кога беше избрана оваа Влада до денес, додаде тој, отворена е 21 нова дестинација.
„Од Париз, од “Орли” се лета за Скопје, од Истанбул се лета за Охрид, од Дубаи ќе почне да се лета за Скопје оваа зима, од Барселона, од Лион, од Амстердам и од Љубљана се лета за Скопје, тука се чартерите на “Фрибрд Ерлајнс” кои што секој ден слетуваат на скопскиот аеродром, кои за скоро ќе бидат и по два дневно. До Охрид почна да се лета од Базел, Ларнака, Мадрид, Штутгарт, Бари, Стокхолм на главниот аеродром почнуваат овие денови. Понатаму, ја отвараме Женева, Келн, многу значајно за мене Прага, а веќе од пролет Неапол-Италија, Будимпешта-Унгарија, Катовице и Вроцлав до Охрид, и Милано исто така до Охрид.
Вкупно 21 нова дестинација, 21 нова линија, за зголемување на бројот на туристи и повеќе бизнис во Македонија. Сакам да се заблагодарам на директорот на ТАВ на неговиот тим, за одличната соработка која што ја имаме, да се заблагодарам на амбасадорот на Шпанија и да најавам дека ќе има уште дестинации од Шпанија, Барселона и Мадрид нема да се последни” истакна вицепремиерот Николоски
Македонија
Утре наутро претежно ведро и студено, преку денот сончево
Утре наутро ќе биде претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Во наредните денови следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

