Македонија
Во Гостивар оформена ЕВН-паралелка за средношколците од регионот
ЕВН за првпат годинава им овозможи на учениците од Полошкиот Регион да станат дел од новата ЕВН паралелка. Во Општинското средно техничко училиште „Гостивар“ 20 ученика ќе бидат дел од првата генерација на електромонтери и електротехничари, кои по образованието во 2022 година веќе ќе добијат понуди за работа во ЕВН. Учениците се жители на општините кои гравитираат кон Гостивар, Тетово, Кичево, Маврови Анови и Прилеп.
На промоцијата на новиот ЕВН-кабинет во ОСТУ „Гостивар“, присуствуваа министерот за образование и наука Арбер Адеми, претседателот на Управниот одбор на ЕВН, Штефан Петер, и претставници на ОСТУ „Гостивар“.
„Големо задоволство е кога идејата што ја имаш ќе биде прифатена и поддржана од другите. Среќни сме што проектот кој пред неколку години го почнавме прeрасна во платформа која е прифатена од сите. Горд сум на учениците, професорите, министерството, колегите и сите инволвирани што придонесоа оваа идеја да стане основа на дуалното образование. Иднината на младите е наша обврска, таа можеме да им ја обезбедиме само ако им дадеме квалитетно образование и можност да работат. Оваа платформа им го обезбедува токму тоа“, изјави Петер, претседател на Управниот одбор на ЕВН.
„ЕВН е еден од нашите најголеми пратнери и поддржувачи во процесот на дуалното образование. Тие од секогаш даваат голем придонес за подобрување на националниот образовен систем и за подобрување на квалитетот на генерациите кои ги продуцираат училиштата и секако и во насока на отворањето нови работни места“, истакна министерот за образование и наука, Арбер Адеми. Тој посочи дека оваа паралелка е посебна по многу нешта и апелираше до учениците да ги следат насоките на професорите и менторите, бидејќи само така ќе дојдат до вештини и знаења кои се неопходни за пазарот на трудот.
Ибрахим Асани, директорот на училиштето, изрази благодарност до ЕВН за иницијативата и до министерството за поддршката. Според него, оваа паралелка ќе го зголеми интересот кај младите за квалитетно образование.
ЕВН-кабинетот е опремен со најсовремените уреди и заштитна опрема и алати кои ги користат и монтерите при секојдневната работа на терен. Со работа во истиот, младите добиваат можност да се едуцираат, одржуваат практикантска работа и обучуваат според европските стандарди.
Учениците ќе посетуваат практикантска работа во корисничките енергоцентри во Гостивар и Тетово, а ќе бидат менторирани од страна на стручни монтери и специјалисти од ЕВН.
Платформата „20-20-20“ почна во скопското СЕТУ „Михајло Пупин“ во 2017 година. Веќе трета генерација на ученици се образуваат во ова училиште. Во 2020 година учениците кои го завршуваат образованието ќе добијат понуди за работа во ЕВН и плата од 20.000 ден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Работниците се двојно попродуктивни од она што го добиваат преку платите, велат од ССМ
Македонските работници создаваат повеќе од двојно поголема економска вредност од она што го добиваат како плата, покажуваат податоците на Меѓународната организација на трудот (ILO), кои денеска ги посочи Сојузот на синдикати на Македонија (ССМ).
Според индикаторот за бруто домашен производ по одработен час, продуктивноста во Македонија изнесува околу 34 американски долари по час, што е над светскиот просек од 23,27 долари. Пресметано на месечно ниво, со просечни 168 работни часови, еден работник создава 297.024 денари економска вредност.
Наспроти тоа, нето минималната плата во државата изнесува 24.379 денари, што значи дека работник кој зема минимална плата добива само 17 проценти од вредноста што ја создава.
Од ССМ оценуваат дека распределбата на создадената вредност е „непропорционална и неправедна“, при што најголемиот дел завршува во профит, инвестиции, амортизација, даноци и други капитални трошоци, а не кај работниците.
-Очигледно е дека обидите да се сопре растот на минималната плата не произлегуваат од продуктивноста на работниците, туку од тоа колку се богати газдите и функционерите на сметка на работничкиот труд, наведуваат од ССМ.
Според синдикатот, продуктивноста на македонските работници е повисока од онаа во дел од земјите во регионот, како Црна Гора, Србија, Босна и Албанија, а блиску до нивото на Бугарија. Сепак, минималната плата во Македонија останува значително пониска од повеќето соседни земји.
ССМ заклучува дека работниците се експлоатирани, а ваквата состојба, според нив, е поддржана од страна на работодавачите и институциите, нагласувајќи дека во државата постои економски простор за поголем раст на платите.
Македонија
Осомничениот за убиството за жената од Челопек е поврзан и со други кривични дела
Јавен обвинител од Основното јавно обвинителство Куманово изврши увид на лице место во селото Челопек, каде беше пронајдено безживотно тело на 78-годишна жена, за која постојат сомненија дека насилно била лишена од живот.
Од Обвинителството информираат дека се издадени повеќе наредби за обезбедување докази и траги од местото на настанот, кои ќе бидат предмет на дополнителни вештачења со цел целосно расчистување на случајот.
Во врска со настанот, едно лице е лишено од слобода под сомнение дека е сторител на кривичното дело убиство. Постојат индиции дека истото лице во претходниот период можеби било инволвирано и во други кривични дела на подрачјето на кумановско, поради што, по наредба на јавен обвинител, се преземаат интензивни дејствија за утврдување на сите околности и евентуалната поврзаност меѓу настаните.
Од Обвинителството посочуваат дека по целосно испитување на фактите и прибирање на сите релевантни докази ќе биде поведена соодветна постапка против осомниченото лице.
Македонија
Мицкоски: Пораките на Марко Рубио од Минхенската безбедносна конференција се јасен сигнал за сите сојузници
Пораките на американскиот државен секретар Марко Рубио од Минхенската безбедносна конференција се јасен сигнал за сите сојузници, светот веќе не функционира по старите правила. Како Влада, продолжуваме посветено да го зајакнуваме нашето место во трансатлантската заедница.
Подготвени сме да одговориме на предизвиците, да ја модернизираме нашата одбрана и да обезбедиме сигурна иднина за нашите граѓани, објави премиерот Христијан Мицкоски, од Минхен.
Мицкоски од вчера престојува во повеќедневна посета на Сојузна Република Германија, каде што учествува на 62. Минхенска безбедносна конференција, на која, како што соопшти владината прес-служба, ќе ја реафирмира определбата на државата за предвидлив и фер процес на интеграција во Европската Унија, без дополнителни билатерални условувања.

