Македонија
Во Прилеп се одбележаа 73 години од Февруарскиот поход
Со планинарски марш, кој започна од месноста Слива во Мариово, а заврши во манастирот Св. Димитрија во селото Селце, денеска во Прилеп беа одбележани 73 години од Февруарскиот поход.
Овој партизански поход е изведен од 31 јануари до 26 февруари 1944 година на целата територија на Македонија. Кракот 1, од овој поход, бил тргнат кон Велес, Азот и Поречието, така што стотиците планинари кои денеска зедоа учество во овој марш одеа по дел од патеките по кои оделе партизаните во тоа време. На свеченоста присуствуваа претставници на организацијата на борци на Македонија и Прилеп, голем број планинари како и градоначалникот на Прилеп, Марјан Ристески.
„Февруарскиот поход со сите негови три правци донеле едно раздвижување на ослободителното движење во Македонија, формирање на нови воени единици и понатаму ослободување на Македонија. Неговото значење е големо затоа што до пред походот полицијата се справувала со сите т.н. бунтовници во Македонија, а после него е вклучена и 5-тата бугарска армија, што докажува дека непријателот забележал дека сега има работа со сериозна сила, за која треба друг тип на организација за да се сузбие. На сите треба да им биде јасно со какви тешкотии се соочувале учесниците на тој поход за да не мислат некои дека денешната држава ни е поклонета, туку за неа се дадени голем број на жртви, а особено од Прилеп кој е прогласен за град Народен Херој, град кој дал 15 Народни херои, а има исто така и голем број првоборци. Што значи голем број прилепчани дале придонес за денешна слободна Македонија“, истакна Верка Бунтеска, в.д. претседател на Републичкиот одбор на Сојуз на борци.
Претседателот на боречката организација на Прилеп, Круме Соколоски, потенцираше дека ние како сегашни генерации мора да си го почитуваме нашето минато и историја, затоа што без минато еден народ немал сегашност ниту пак иднина.
„Сојузот на борците заедно со локалната самоуправа на Прилеп секоја година достојно ги одбележува настаните од НОБ, особено овој настан кој има големо значење за движењето низ цела Македонија. Со овој марш ние им даваме почит и благодарност на сите учесници во НОБ кои ги дадоа своите животи да се формира македонската држава. Воедно му оддаваме почит на сите родољуби кои во минатото учествувале во Кресненското, Разловечкото, Карпошовото, Илинденското востание и Мариовската буна, кои нежалејќи, ги дадоа своите животи за слобода и формирање на македонската држава. Мислам дека соработката со локалната самоуправа, планинарските друштва и АРМ ќе продолжи и понатаму со голем интензитет“, рече Круме Соколоски, претседател на борци на Прилеп.
Локалната самоуправа на Прилеп постојано ги поддржува сите настани кои се поврзани со одбележувањето на значајни датуми од НОБ и има одлична соработка со организацијата на борци од Прилеп.
„Февруарскиот поход претставува еден од најзначајните настани во македонската историја за ослободување на Македонија и затоа локалната самоуправа на Прилеп секоја година дава безрезервна поддршка за одбележување на овој ден во соработка со организацијата на борци, планинарските здруженија и сите почитувачи на ова големо дело. Целта е да се потсетиме на минатото и историјата и да продискутираме за сегашноста и иднината. Во соработка со организацијата на борци од нашиот град реконструирани се Могилата на Непобедените, обновена е Алејата на народни херои, реконструиран е и Участакот, а за оваа година имаме два заеднички проекти кои ќе ги реализираме, а тоа се надополнување на бистите во Алејата на Народни херои и изградба на споменици на Мирче Ацев и битката на Ножот во централното градско подрачје. Сите овие животи кои во минатото се дадени за Македонија ние треба да ги почитуваме затоа што тие се бореле за самостојна Македонија, онаа во која ние денес живееме и ние нетреба да го нарушиме тоа“, изјави Марјан Ристески, градоначалник на Прилеп.
Од локалната самоуправа на Прилеп истакнаа дека и понатаму ќе продолжат наголемо да ги поддржуваат и другите проекти поврзани со НОБ и организацијата на борци од Прилеп./крај/со/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Поради јазични бариери одложено продолжението на конститутивната седница на работната група за реформи во изборното законодавство, кажа Филков
Поради технички причини денешната конститутивна седница на работната група за реформи во изборното законодавство беше одложена за следната недела. Министерот за правда Игор Филков изјави дека членовите на работната група не се впуштиле во материјална расправа затоа што прво треба да се утврди дневниот ред.
,,Иако денес требаше да биде одржана првата конститутивна седница на работната група за реформи во изборно законодавство на која требаше да се избере претседател, како и да се донесе предлог-деловник за утврдување на методологијата и динамиката на работење, сепак тоа не се случи поради одредени јазични бариери. Од дел од присутните претставници на политичките партии беше побарано материјалите да бидат преведени за полесно да можат да се разберат’’, рече Филков.
Филков се надева дека следната недела членовите ќе се усогласат за термин , ќе се избере претседател на работната група и ќе се отпочне со работа каде што сите ќе имаат можност да ги дадат своите предлози и сугестии за реформите во изборното законодавство.
Македонија
Сиљановска-Давкова-Грлиќ Радман: потврдена подготвеноста на Хрватска да придонесе кон забрзување на македонскиот евроинтеграциски процес
Претседателката Гордана Сиљановска-Давкова денеска го прими Гордан Грлиќ Радман, министер за надворешни и европски работи на Република Хрватска, кој престојува во официјална посета на земјава.
Обајцата го потврдија цврстото македонско-хрватско пријателство коешто двете земји го негуваат повеќе од 3 децении, втемелено на взаемна почит и разбирање и реализирано низ политички дијалог и конструктивна соработка.
Претседателката искажа искрена благодарност за хрватското отворено и континуирано разбирање и поддршка на македонската интеграција, како и на принципиелниот став на Хрватска дека проширувањето на Унијата со Западен Балкан треба да се темели на реални заслуги, без билатерализација и вето.
Министерот Радман ја потврди подготвеноста на неговата држава да придонесе кон забрзување на македонскиот евроинтеграциски процес во рамките на Копенхашките критериуми, потенцирајќи дека македонската држава доби статус на кандидат за членство во ЕУ во март 2005 година, односно неколку месеци пред Хрватска.
Соговорниците очекуваат дека партнерството дополнително ќе се зајакне со Договорот за стратешка соработка со Владата на Република Хрватска, како и со претстојната официјална посета на Претседателката Сиљановска-Давкова на пријателска Хрватска, кон крајот на март.
Македонија
Уапсен тетовец: осомничен за лажни дојави за поставени бомби во образовни институции
Утрово во 09:10 часот во с.Палатица, тетовско, полициски службеници од одделот за сузбивање на организиран и сериозен криминал при Министерството за внатрешни работи во координација со полициски службеници од СВР Тетово го лишиле од слобода М.Р.(18) од село Палатица.
Тој се сомничи дека во повеќе наврати испраќал електронски пораки на повеќе образовни институции во Тетово дека во институциите има поставено експлозивни направи.
Полицијата соопшти дека по преземени мерки и извршени проверки е констатирано дека сите дојави за поставени бомби биле лажни.
Денеска, со сдуска наредба, бил извршен и претрес во неговиот дом во селото, при што биле одземени повеќе електронски уреди.
Лицето било приведено во полициска станица и по целосно расчистување и документирање на случаите, во координација со јавен обвинител против него ќе биде поднесена соодветна пријава.

