Македонија
Вработени во МВР што работеле на случајот на Бошкоски не знаат кој ја дал наредбата за негово апсење

Судењето за случајот „Тортура“, кој се однесува на апсењето на лидерот на Обединети за Македонија, Љубе Бошкоски, продолжи со испрашување сведоци повикани од страна на специјалното јавно обвинителство. Сите четворица сведоци вработени во одделот за економски криминал и корупција, а кои работеле на случајот, рекоа дека не знаат кој го нарачал апсењето на Бошкоски.
Тони Јанкоски, кој за време на апсењето на Бошкоски во 2011 бил началник на одделот за економски криминал и корупција, во сведочењето истакна дека тој не бил запознаен со предметот, туку само ги потпишал доказите што биле испратени до јавниот обвинител.
Сведокот Жарко Спасевски, кој бил дел од организационата единица при одделот за економски криминал и корупција, покрај тоа што рече дека не знае кој го нарачал апсењето на Бошкоски, истакна дека за настанот дознал во истиот момент од ексдиректорот на БЈБ, Митко Чавков.
„Не сум запознаен кој дал наредба за апсењето на Бошкоски. За тоа бев телефонски известен, мислам дека ме извести Митко Чавков од центарот за сузбивање сериозен и организиран криминал. Потоа, им дадов задача на вработените за обезбедување на доказите на самото место, вршење претреси. Јас и уште неколку колеги веднаш се упативме на местото што ни беше посочено, угостителскиот објект ‘Воденица’“, рече Спасевски.
Сведокот Владимир Крстевски, кој во 2011 бил главен инспектор на криминалистичка полиција, во своето сведочење рече дека учествувал во изготвување на кривичната пријава и лично има доставено службена документација до Јавното обвинителство, но исто така не знае кој издал наредба за апсење на Бошкоски. Крстевски, одговарајќи на прашање од обвинителот Љубомир Лапе, рече дека не знае ниту кој му ги доставувал доказите што тој подоцна ги препраќал до јавниот обвинител.
Четвртиот сведок, кој денеска говореше пред судечкиот совет, е Роберт Николов, вработен исто така во МВР. Запрашан од обвинителот Лапе што знае за апсењето на Бошкоски, Николов рече дека не бил воопшто запознаен со случајот, дента кога се случило апсењето бил повикан само да го обезбедува просторот околу угостителскиот објект „Воденица“.
„Не знам ништо за случајот. Ден претходно ми беше роденден, донесов торта да ги частам колегите, но тие само ми кажаа дека частењето треба да се одложи бидејќи ќе имаме работа. Веднаш потоа се упативме кон ‘Воденица’“, рече Николов.
Наредното рочиште за случајот „Тортура“ е закажано за 20 јуни. Обвинети се ексдиректорот на УБК, Сашо Мијалков, поранешниот прв човек на единицата „Алфа“, Ивица Антевски – Пуки, и уште петмина припадници на единицата.
Специјалното јавно обвинителство ги гони за мачење и друго сурово, нечовечко или понижувачко постапување и казнување.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ ги соопшти имињата на 25 кандидати за градоначалници, повеќето ќе се борат за нов мандат

Извршниот комитет на ВМРО-ДПМНЕ утврди 25 кандидати за градоначалници. За Град Скопје се’ уште не е донесена одлуката.
Се работи за веќе познати имиња, од кои повеќето го моментов ја извршуваат градоначалничката функција. Ѓорѓија Сајкоски по состанокот рече тие кандидати убедливо водат на сите анкети во општините за кои се предлагаат.
„Сите кандидати кои што се избрани го имаат поминато тестот на граѓаните, во изминатите 4 години, а тоа го потврдуваат и анкетите“, вели тој.
ИК утврди и ги предложи следните кандидати:
1. Аеродром – Дејан Митески
2. Бутел – Дарко Костовски
3. Ѓорче Петров – Александар Стојкоски
4. Чучер Сандево – Зоран Бајовски
5. Штип – Иван Јорданов
6. Велес – Марко Колев
7. Свети Николе – Дејан Владев
8. Карбинци – Виктор Паунов
9. Градско – Киро Нацков
10. Кавадарци – Митко Јанчев
11. Гевгелија – Андон Сарамандов
12. Зелениково – Коста Маневски
13. Илинден – Александар Георгиевски
14. Конче – Златко Ристов
15. Делчево – Иван Гоцевски
16. Ново Село – Ѓорге Божинов
17. Василево – Славе Андонов
18. Босилово – Ристо Манчев
19. Берово – Петар Ружински
20. Петровец – Борче Митевски
21. Битола – Тони Коњановски
22. Охрид – Кирил Пецаков
23. Вевчани – Спасе Кочовски
24. Брвеница – Јовица Илиевски
25. Јегуновце – Димитар Костадиновски
Од ВМРО-ДПМНЕ велат дека се работи за чесни, одговорни, работни и експедитивни луѓе.
„Најголемиот дел од нив се веќе постоечки градоначалници, кои направиле вистинска трансформација во нивните општини, а другиот дел се луѓе кои имаат сила и знаење да го променат темпото на работа во општините кои до сега се водени од кадри на СДСМ“, велат од партијата.
Се додава во тек се и внатрепартиските избори за советници, преку месните и општинските комитети, а истовремено и граѓаните кои не се партиски определени слободно можат да се вклучат да даваат свои предлози за советници.
Македонија
(Видео) Се бара донација од пченка и јаболка оти мечки се доближуваат до селата околу Шар Планина

Националниот парк „Шар Планина“ повика на донации во форма на домашна пченка и јаболка, бидејќи се забележани повеќе случаи во кои мечки се доближуваат до планинските села во потрага по храна.
Од тука велат дека во последните две недели, сè почесто се забележуваат случаи на приближување на мечки кон населени места во регионот на Националниот парк. Овој феномен, како што се додава, е резултат на намалени природни извори на храна во подрачјата кои се нивно природно живеалиште.
„За да се намали ризикот од несакани средби со луѓе и да се помогне за здравјето и безбедноста на овие важни жители на нашата планина, започнуваме иницијатива за симболична прихрана на мечките, на оддалечени и безбедни локации, далеку од населени места и планинарски патеки. Бараме доброволни донации на јаболка и пченка од домашно потекло, со цел хранењето да биде што е можно послично на природната исхрана на мечката (Ursus arctos), која претежно е растително базирана“, велат од Националниот парк.
Се додава дека дистрибуцијата на храната ќе ја извршува нивната управа во соработка со волонтерска служба, во согласност со Програмата за заштита, одгледување и управување со дивечот (2023–2033), каде што се препорачува симболична прихрана како метод за следење и заштита на дивечот.
Македонија
Николоски: Договорот со Обединетото Кралство е од историско значење за Македонија и развојот на државата

Договорот меѓу Владата на Македонија и Владата на Обединетото Кралство на Велика Британија и Северна Ирска е од историско значење за развојот на државата, напиша вицепремиерот Николоски на својот фејсбук профил.
„Денес во Собранието е изгласан Законот за ратификација на договорот меѓу Владата на Македонија и Владата на Обединетото Кралство на Велика Британија и Северна Ирска. Овој договор е од историско значење за Македонија и развојот на државата. Со овој договор се потврдува партнерството помеѓу двете држави! Заеднички ќе направиме огромни проекти и ќе ја направиме Македонија многу подобро место за живеење!“, напиша вицепремиерот Николоски.