Македонија
Врховните судии потврдија дека Јован Врaнишковски перел пари

Врховниот суд го отфрли како неосновано барањето за вонредно преиспитување на пресудата против расчинетиот владика на МПЦ-ОА, Јован Вранишковски. Тројцата врховни судии Фаик Арслани, Ристо Катaвеновски и Африм Фидани во пресудата потврдија дека пониските судови правилно ги применувале законите во оваа кривично-правна постапка.
Скопскиот кривичен суд со пресудите од 2015 и 2017 година, тогаш обвинетите Јован Вранишковски и Исаило Поповски, и уште едно лице од Скопје, ги осудил за перење пари и други приноси од казниво дело.
За ова дело судот го осуди Вранишковски на казна затвор од една година и еден месец, во која му е засметано и времето поминато во притвор, а на обвинетиот Исаило Поповски и третото лице, судот им изрече условна казна затвор во траење од по две години доколку обвинетите во рок од пет години не сторат ново кривично дело. Од осудениот Исаило Поповски е одземен принос од казниво дело во вредност од 8.595.571 денари, што се состои во недвижен имот земјиште, во корист на оштетената МПЦ-ОА.
Апелационот суд ги потврдил пресудите на пониските судови. По правосилноста на пресудата, заедничко барање за вонредно преиспитување на правосилната пресуда до судот поднеле осудените Вранишковски и Поповски, а Врховниот суд им го одбил барањето за преиспитување на пресудата како недозволено и неосновано.
„Во барањето на осудениот Јован Вранишковски, поднесено преку бранителот Александар Тортевски, адвокат од Скопје, се наведува дека првостепениот суд не постапил по напатствијата на Врховниот суд, со која одлука предметот е вратен на повторно одлучување, каде е наложено да се преиспита дали е можно осудениот Јован Вранишковски да располага со пари кои веќе ги потрошил. Според подносителот, судот воопшто не навлегувал во преиспитување на ова прашање и носи одлука која е контрадикторна. Судот утврдил дека неспорно осудениот ги потрошил средствата, а целокупниот имот кој го купил со овие средства останал во сопственост на МПЦ, па оттука се поставува прашањето како со нападнатата пресуда имотната корист во износ од 8.595.571 денари која се состои од имот, ја одзема во корист на МПЦ“, напишале судиите објаснувајќи ги жалбените наоди на Вранишковски во пресудата.
Во жалбата Вранишковски навел дека во тоа време во кое му се става на товар дека го сторил кривичното дело бил на издржување на затворската казна за друго дело, но судот оценил дека тој во неколку наврати користел викенд и годишен одмор кога презел противправните дејствија.
Во образложението на судот, со кое не им се усвојува барањето на подносителите пишува: „Правилно првостепениот суд утврдил дека паричните средства со кои располагал осудениот Јован не биле потрошени за купување предмети, туку дека дел од тие пари ги задржал за себе, односно истите ги присвоил, за да може подоцна да ги пушти во оптек. Начинот на кој работел осудениот Јован во трите епархии во МПЦ судот неспорно го утврдува од исказот на сведокот М.П. кој исказ е јасен, недвосмислен и детален, од кој произлегува дека осудениот не работел во согласност со правниот акт, односно уредбата според која МПЦ се раководела во материјално финансиското работење. Неправилностите во неговото работење биле констатирани во извештајот од извршена ревизија во епархиите каде бил тој, со оглед дека тој бил и овластен за финансиското работење“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Зајакнување на партнерството со Вермонт – македонска делегација се сретна со гувернерот на сојузната држава

Делегацијата на Армијата и Министерството за одбрана која престојува во Вермонт, САД, предводена од началникот на Генералштабот, генерал-мајор Сашко Лафичиски придружуван од државниот секретар во министерството, Елизабета Чуповска Ристова, во текот на вчерашниот ден оствари средба со гувернерот на оваа сојузна држава, Фил Скот на која присуствуваше и командантот на Националната гарда на Вермонт, генерал-мајор Грегори Најт.
За време на средбата се разговараше за придобивките од Програмата за партнерство во овие изминати повеќе од три децении која се реализира преку широк спектар на активности, како што се: изведување на заеднички обуки и вежби, конференции, посети на воени бази, школски центри и институции во САД, семинари, и сл. Дополнително беше нагласен огромниот придонес на командантот на Националната гарда на Вермонт, генерал-мајор Најт кој за време на својот мандат има клучна улога за развојот и успешноста на ова програма.
Во рамки на активностите македонската делегација оствари средба со командантот на Универзитетот „Норвич“, бригадниот генерал Вилијам МекКола при посетата на оваа воено високо образовна институција. Обнова на програмата за размена на студенти помеѓу Армијата и Универзитетот беше во фокусот на разговорот. Оваа програма одигра значајна улога во зајакнување на партнерство меѓу двете земји и во поддршка на професионалниот и академскиот развој на идните воени лидери. Таа останува клучен механизам во напорите за продлабочување на институционалните врски и унапредувањето на интероперативноста.
Во текот на денот, делегацијата го посети и Регионалниот центар за подготвеност и регионална технологија „Нортфилд“, каде беше презентиран ангажманот на овој центар во доменот на информациски операции и сајбер безбедноста во нашата држава.
Во таа прилика, генералот Лафчиски истакна дека „искуството и експертизата на центарот претставуваат уникатна можност за градење капацитети во оваа област“, имајќи предвид дека зајакнувањето на сајбер отпорноста е национален одбранбен приоритет кој е усогласен со принципите на колективна одбрана на НАТО и заложбата за сајбер одбрана на Алијансата.
Во следните неколку денови делегацијата ќе присуствува на повеќе презентации и посети на институции и капацитети од взаемен интерес.
Македонија
(Видео) Митрески: СДСМ нема да учествува во гласањето за интерпелацијата на обвинителот Коцевски

Интерпелацијата за јавниот обвинител, Љупчо Коцевски, нема правни последици и СДСМ нема да учествува во гласањето, одлуката е на обвинителот, изјави пратеникот од СДСМ, Јован Митрески.
„Иако нашиот став претходно беше дека ставот во однос на интерпелацијата за работата на Јавниот обвинител ќе го соопштиме од собраниската говорница сепак поради неразумните и нелогични одложувања на седницата со неразумни и нелогични барања на паузи а и поради вашиот голем интерес решивме тоа да го направиме на оваа прес конференција. Интерпелацијата во принцип значи барање политичка одговорност а овде зборуваме за човек од третата власт. Третата власт или судската власт која по Устав треба да биде независна. Тоа од една страна. Од втора страна тоа може но и не мора да има правни последици. Дали ќе има правни последици зависи од самиот обвинител, од самиот функционер. Во овој случај од самиот обвинител, дали ќе поднесе оставка или не“, рече тој.
Митрески додаде дека ако точката на дневен ред била одлука за разрешување тогаш можело да се отвори дебата дали се задоволни или незадоволни од работата на обвинителот, секако низ соодветно пропишана процедура.
„Како пратеничка група на СДСМ и Коалицијата остануваме на принципиелниот став дека јавното обвинителство мора да биде независно, ослободено од политичко влијание и притисок и сите одлуки мора да се послобото на законот и никако поинакви“, рече пратеникот.
Во врска со истрагата за Кочани, Митрески рече дека Мицкоски кажал е задоволен од тоа како се води истрагата.
„Знаете дека премиерот Мицкоски зборуваше дека треба да се смени Јавниот обвинител и дека, цитирам, таа процедура е тргната и нема сопирање. После трагичниот настан во Кочани знаете дека има промена на изјавата односно дека нема да има разрешување се додека не заврши истрагата. Со тоа што премиерот Мицковски отиде и чекор понатака кажа дека е задоволен од тоа како се води истрагата. Затоа со ова нивна одлука која што денес ја слушнавме на прес-конференција се отвораат прашања кои се легитими, меѓутоа јавноста за тоа ќе добие одговор во следниот период. Се поставува прашањето дали премиерот Мицковски е задоволен од истрагата, бидејќи нема одговор до денес, од тогаш кога во истрагата не се опфатени началниците на Тошковски“,рече Митрески.
Македонија
Хеликоптер од Чешка и 61 пожарникар од Словенија ќе помагаат во гаснење на пожарите

Меѓународна помош ќе пристигне во земјава да помогне во справување со пожарите. Помошта ќе дојде од Чешка и од Словенија.
Чешка испраќа хеликоптер Блек Хок со седумчлен екипаж. Се очекува да пристигнат попладнево.
Утре, пак, во Берово ќе пристигне тим од Словенија составен од 61 пожарникар со 18 возила.
Во текот на измнинатото деноноќие на територијата на државата евидентирани се вкупно 27 пожари на отворен простор. Од нив, седум се активни, три се под контрола, а седумнаесет се изгаснати.