Македонија
Вучиќ: Курти крева духови на немир во Северна Македонија и на југот на Србија

Српскиот претседател Александар Вучиќ на телевизиско гостување денеска го коментираше настапот и изјавите на косовскиот премиер Албин Курти во Македонија, оценувајќи ги како „скандалозни“ и дека Курти „крева духови на немир во Северна Македонија и на југот на Србија“.
-Ова е обид на Курти да крене духови на немир, не само во Северна Македонија, туку и на југот на Србија и сето тоа со премолчана подршка на меѓународната заедница, кажа Вучиќ.
Тој посетата на Албин Курти на Северна Македонија ја оцени како „скандал над скандалите“.
-Таму беше промовирана идејата за „Голема Албанија“, истакнати се нејзините симболи, а Курти меѓу другото беше претставен како премиер на сите Албанци и премиер на Тетово, истакна Вучиќ.
Тој се осврна на преименувањето на улицата Втора македонска бригада во Скопје во улица на Адем Демачи, потсетувајќи дека се работи за човек кој поминал 28 години во затвор, во времето на Тито, кое било либерално, како најлош и најголем големоалбански идеолог и сепаратист.
Тој истакна дека Демачи му бил ментор и идол на Курти и дека треба внимателно да се слуша што зборуваат луѓе како Дем Бериша, кој ги следи албанските медиуми, и посочи дека од Приштина со пари и други работи го ставиле под своја контрола и Шаип Камбери и дека го „зедоа“ и Рагми Мустафи, со цел да произведат кризи и тема да не биде само Косово туку и поширокиот регион и конечно да се тргне во Голема Албанија.
-Тоа се работи што се загрижувачки. Да не бевме воено толку посилни, толку пати посилни и помоќни во однос на технологијата, оружјето и се друго, знаете ли колку пати Курти ќе го нападнеше секој дел од Србија? Погледнете ја неговата идеологија, тој не би ја нападнал само централна Србија, туку и Северна Македонија, Црна Гора, а прашање е што би се случило и со Албанија, предупреди Вучиќ.
Тој истакна дека има обид Курти да поттикне немири со, како што додаде, непримерен молк и премолчена поддршка на дел од меѓународната заедница.
Вучиќ истакна дека треба да се внимава затоа што има обиди да се префрли вината на Србија, оти Косово е нивно дете – појасни тој мислејќи на меѓународната заедница.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Алиу: Првите термини се веќе резервирани и граѓаните имаат што да кажат, „Отворен кабинет“ стартува силно

Министерот за здравство Азир Алиу ја претстави новата алатка „Отворен кабинет“, која, како што посочи, ќе овозможи директна комуникација меѓу граѓаните и Министерството – без бариери, без бирократија и со човечки пристап.
„Вистинската реформа почнува тогаш кога институцијата престанува да зборува сама со себе и почнува да го слуша народот со отворен ум и јасна намера за промена“, изјави министерот Алиу, нагласувајќи дека новата алатка не е само веб-страница, туку целосна трансформација на односот институција – граѓанин.
Со „Отворен кабинет“, секој граѓанин ќе може директно да закаже средба со министерот секој петок, без никакви формални процедури.
„Првите 15 термини веќе се резервирани. Ова е доказ дека граѓаните имаат што да кажат и конечно имаат каде да бидат слушнати. Јас сум тука да ги слушнам“, порача Алиу.
Според министерот, ова не е само нов сервис, туку јасна порака за визијата што Министерството ја има за здравствениот систем.
„Оваа иницијатива не е само услуга. Таа е став. Став дека здравството не смее да биде затворен систем, туку жив организам што комуницира, што вклучува и реагира навреме“, рече Алиу.
Тој додаде дека граѓаните имаат право на пристапност, транспарентност и одговорност од својата институција.
„Здравство што комуницира, вклучува и реагира, не смее да биде само слоган. Тоа е јавна обврска. Обврска што јас како министер ја прифаќам со целосна одговорност и секојдневно ќе ја исполнувам со работа, отчетност и лично присуство“, изјави министерот.
Алиу посочи и дека приоритет е создавање здравствен систем што се води од податоци, анализа и реалните потреби на граѓаните, а не од политички притисоци или лични интереси.
„Сакаме систем што не се плаши од вистината, не се губи во бирократија и никогаш не го заборава човекот – како причина зашто постои самиот систем“, заклучи министерот.
Македонија
Скандалозен тендер за возачки испити, СДСМ бара истрага и одговорност од Тошковски

СДСМ алармира за нов скандал во Министерството за внатрешни работи, овој пат поврзан со сомнителен тендер вреден милиони денари за лиценца за организирање возачки испити во Пелагонискиот регион.
Министерот Панче Тошковски, како што изнесува потпретседателката на СДСМ, Каја Шукова, доделил тендер на новоформирана фирма „Супер Возач“, регистрирана само три месеци пред распишувањето на тендерот. Според Шукова, зад оваа фирма стои Филип Митрески, функционер на ВМРО-ДПМНЕ и советник во Советот на Општина Кичево, преку компанијата „Стрит рајд“, која е нејзин сопственик.
„Станува збор за класичен пример на партиска злоупотреба на институциите за лични и бизнис интереси. МВР под ВМРО-ДПМНЕ дели милионски тендери на луѓе блиски до партијата, а институциите стануваат алатка за испумпување народни пари“, изјави Шукова.
Со овој потег, како што посочуваат од СДСМ, на фирмата „Супер Возач“ ѝ е овозможен монопол од 5 години врз еден профитабилен бизнис – сите полагања за возачки испити во Битола, Прилеп и Ресен ќе се одвиваат преку оваа компанија блиска до власта.
„Фирмата е основана непосредно пред тендерот. Дали однапред било договорено кој ќе го добие? Како знаел функционер на ВМРО-ДПМНЕ дека токму за тоа ќе се распише тендер и токму таму да отвори фирма? Не веруваме во случајности“, додаде Шукова.
Од СДСМ потсетуваат дека ова не е изолиран инцидент, туку втор сериозен скандал по спорниот тендер за полициски униформи, кој исто така беше проследен со јавни реакции и обвинувања за корупција.
„Ова е моделот на владеење на ВМРО-ДПМНЕ – партиски тендери, бизниси за блиските, а државните институции се користат како банкомати за партијата. Наместо борба против корупцијата, гледаме корупција во живо“, рече Шукова.
СДСМ бара итна реакција од надлежните институции:
– Државната комисија за спречување на корупцијата да отвори предмет.
– Основното јавно обвинителство да постапи по допрен глас.
– Институциите да не останат неми набљудувачи, туку да ја исполнат својата законска обврска.
„Македонија не смее да биде плен на организиран партиски грабеж. Граѓаните заслужуваат отчетност, одговорност и институции кои работат за нив. Одговорност мора да има и ќе има“, заклучи Шукова.
Скопје
Герасимовски: „Центарска симфонија” ги сплоти скопјани, Тарабунов и граѓаните пееја и танцуваа на најпознатите филмски евергрини

„Центарска симфонија” синоќа ги сплоти скопјани. Со македонска и светска филмска музика изведена од музичката ѕвезда Александар Тарабунов и камерниот оркестар, граѓаните уживаа во оваа културна манифестација којашто за првпат ја организираше Општина Центар.
Градоначалникот Горан Герасимовски упатува благодарност до сите центарци, но и жители на Градот Скопје кои вчера вечер дојдоа и уживаа во најпознатите мелодии од македонската и светската кинематографија како „Исправи се Делфина”, „Каде песно моја”, „До Балчак”, „Beautiful Maria of my Soul” и многу други. На „Центарска симфонија”, беше изведена и новата песна на Тарабунов „Заедно” со камерниот оркестар.
„Центар останува место за најубавите културни настани. Среќен сум што синоќа ‘Центарска симфонија’ ги сплоти скопјани на Плочникот кај Градски ѕид. Сите во еден глас ги пееа најубавите филмски мелодии, уживаа во добра музика и се забавуваа. Оваа манифестација е новина и останува традиција. Не застануваме тука, летово ќе имаме уште многу настани во делот на културата и за истите ќе бидете навремено информирани. Ви благодарам на сите коишто дојдовте и заеднички уживавме”, рече Герасимовски.