Македонија
ГДУ на Самитот на АКРЕ во Бугарија

Над сто истакнати европски конзервативци, бугарски министри, признати експерти во областа на безбедноста, одбраната и економијата се собраа на Самитот за слободата на Алијансата на конзервативците и реформаторите – АКРЕ, кој првпат се одржува во Бугарија.
Меѓу учесниците во настанот беа претседателот на АКРЕ, Јан Захрадил, од Граѓанско-демократската партија на Чешка, кој во моментот е водечки кандидат на европските конзервативци за претседател на Европската комисија, и извршниот директор на АКРЕ, Ричард Милсам. Специјални гости на конгресот беа и претставници на конзервативни партии и организации од над 15 држави, вклучувајќи ги Велика Британија, Белгија, Шведска, Шпанија, Албанија, Израел, Македонија, Романија и други.
Од Македонија учесници беа потпретседателот на ГДУ, Александар Попоски, и членовите на управувачкиот комитет на Граѓанско-демократската унија, Јована Спасевска, Добре Митрев, Александар Тодоровски, и претставници на тинк-тенк институтот Conservative.mk.
„Постојат три главни работи што се однесуваат на евроинтеграциите – економијата, безбедноста и институциите“, изјави претседателот на АКРЕ, Јан Захрадил.
Претседателот беше категоричен дека единствениот пазар е срцето на ЕУ, но европските институции треба да бидат зависни од волјата на одделните држави, а не да си создадат свој вакуум на моќ.
Според него, воениот аспект на безбедноста мора да остане во рамките на НАТО и ЕУ, да работат заедно и да ги надополнуваат нивните напори.
Во однос на миграцијата, Захрадил смета дека секоја земја членка треба сама да ги постави своите процедури и правила што се однесуваат на азил.
„Во Европскиот парламент треба да биде создадено ново мнозинство, кое ќе работи за децентрализација на ЕУ и промена на насоката во која се движи во моментот, а конзервативците во Европа може да одиграат клучна улога за тоа“, изјави претседателот на АКРЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотрес рано утринава ги разбуди граѓаните на Валандово и на околината

Утрово во 5:54 часот, земјотрес со јачина од 3,3 степени според Рихтеровата скала го стресе регионот околу Валандово, информира Сеизмолошката опсерваторија при Природно-математичкиот факултет во Скопје.
Телеметриската сеизмолошка мрежа на Македонија го регистрирала потресот на неколку сеизмолошки станици ширум државата, при што е утврдено дека епицентарот се наоѓа во епицентралното подрачје Валандово, оддалечено околу 120 километри југоисточно од главниот град.
Според првичните информации од Сеизмолошката опсерваторија, земјотресот бил почувствуван во Валандово и околните населени места со интензитет од IV степени според Европската макросеизмичка скала (EMS).
Засега нема информации за причинета материјална штета или повредени лица, но локалното население на социјалните мрежи известува дека потресот бил „краток, но силен“, и ги разбудил во раните утрински часови.
Сеизмолозите продолжуваат да ја следат ситуацијата и ги повикуваат граѓаните на смиреност, посочувајќи дека ваквите потреси се честа појава во сеизмички активниот регион на југоисточна Македонија.
Македонија
Колони на границите, на „Богородица“ се чека до 40 минути, на „Табановце“ до 30 минути

Сообраќајот на државните патишта се одвива непречено и по суви коловози, но фреквенцијата на возила, особено кон граничните премини, денеска е значително зголемена, информира Автомотосојузот на Македонија (АМСМ).
Најголема гужва има на Граничниот премин Табановце, каде времето на чекање за влез и излез од државата е од 15 до 30 минути. На Богородица ситуацијата е уште поинтензивна – за излез од државата се чека до 40 минути, додека на ГП Дојран времето на задржување е 20 до 30 минути.
„Состојбата на патиштата е стабилна и коловозите се суви, но фреквенцијата е зголемена. Апелираме до сите учесници во сообраќајот да возат внимателно, со прилагодена брзина и да ја почитуваат сигнализацијата, особено на делниците каде што има опасност од одрони“, велат од АМСМ.
Посебна претпазливост се препорачува на патните правци низ котлините, речните долини и клисурите – Катланово – Велес, Маврово – Дебар – Струга, Виница – Берово и Кочани – Делчево – каде што постои ризик од појава на одрони.
На останатите гранични премини од македонска страна, нема подолги задржувања за влез и излез од државата.
Македонија
Денес сончево со ветер, од утре повторно температурата во постепен пораст

Управата за хидрометеорологија (УХМР) за денес прогнозира претежно сончево време со умерен до засилен ветер од северен правец, кој наместа ќе достигнува брзина од 60км/ч.
Минималната температура ќе биде во интервал од 11 до 20, а максималната ќе достигне од 27 до 36 степени.
Во Скопје, сончево со умерен до засилен северен ветер. Минималната температура ќе се спушти до 19, а максималната ќе достигне до 35 степени.
Од понеделник следува период на стабилно и потопло време со постепен пораст на дневнaтa температура.