Со ништо СДС не може да го скрие вчерашното целодневно јавно бламирање. Ниедно соопштение за ниедна тема не може до го испере нивното бламирање на јавна сцена и непознавањето на состојбите на нивниот претседател, Венко Филипче по вчерашната прес-конференција, велат од ВМРО-ДПМНЕ.

Според нив, излишни се коментарите за состојбите во економијата на оние кои што за седум години целосно ја уништија, а стандардот на граѓаните го срозија, доведувајќи над пола милион до просјачки стап со по 150 денари на ден.

„СДС да беа способни и да водеа правилни економски политики, немаше состојбата во државата да е таа што е, а нивната политичка елита дополнително збогатена на грбот на граѓаните.

ВМРО-ДПМНЕ како одговорна партија која ја предводи македонската Влада посветено работи на подобрување на економската состојба во државата и на подобрување на животниот стандард на граѓаните.

Тоа, пред се, се прави преку издржани и долготрајни решенија кои на долг рок ќе обезбедат економски развој и подобар живот за сите“.

Додаваат дека континуирано се преземаат итни мерки за зачувување на куповната моќ и стандардот на граѓаните, преку намалување на цените на прехранбените производи, меѓу кои последната е ограничување на маржите на над илјада производи.

„Во континуитет се зголемуваат платите и пензии, кои со исплата на мартовските пензии следи ново линеарно покачување од 2500 денари и покачување како на минималната платата, така и на платите во разни сектори како здравство, образование“, истакнуваат од владејачката партија.

Официјални ветеринари на Агенцијата за храна и ветеринарство (АХВ), вчера, по спроведниот вонреден инспекциски надзор, наредија нештетно уништување на 1.980 килограми небезбедно замрзнато пилешко месо по потекло од Полска, кое било транспортирано во возило што го запленило Министерството за внатрешни работи од непознат сторител.

Месото било спакувано во 180 пакети по 11 килограми и во моментот на контролата било во фаза на отопување.

Во запленетото возило небезбедното месо се транспортирало во несоодветни услови, односно без потребен температурен режим за замрзнато месо (минус 18 Целзиусови степени) и без никаква документација за потеклото – ветеринарно здравствен сертификат, комерцијален документ и други потребни документи за гарантирање на безбедноста на производот, соопшти АХВ.

Повлечени се осум амбасадори, кои беа назначени од поранешниот претседател на државата, Стево Пендаровски.

Отповикани се амбасадорите Мето Белески – Брисел, Катерина Ставревска – Лондон, Зеќир Рамчиловиќ – Подгорица, Пајо Авировиќ – ОБСЕ, Емил Крстевски – Прага, Јакуп Реџепи – Сараево, Агнеза Руси – Софија, Џенк Сејфула – Стокхолм.

Како причина за нивното враќање се наведува неисполнувањето на член 39 од Законот за надворешните работи затоа што не ги претставиле дипломатските тези пред собраниската Комисија за надворешна политика пред да бидат упатени за ополномоштени македонски амбасадори.