Македонија
(Видео) Германија и Франција со координација за спречување на нелегалната трговија со огнено оружје во Западен Балкан

Денеска, се одржа состанок, на кој присуствуваа и делегации од Германија и Франција, за големото ширење на мало и лесно оружје во регионот на Западен Балкан и постојаните предизвици за негова ефикасна контрола, а кое носи ризици како за регионалната така и за европската безбедност, со цел спречување на нелегалната трговија со огнено оружје во Македонија.
Двете земји со цел поинтегрирана и покоординирана акција за справување со проблемите со нелегалното оружје во регионот на Западен Балкан почнаа заедничка иницијатива за координација на донаторите за нелегална трговија со огнено оружје и сеопфатна контрола на мало и лесно оружје.
Жан Клод Брунет, претставник на Министерството за надворешни работи на Франција, вели дека проблемот со илегалната продажба на оружје поминува низ Западен Балкан и се трансферира на пазарот во ЕУ, што претставува сериозен проблем и ризик. Според него, потребна е кампања во медиумите за легализација на оружјето за да се укаже на правилата што треба задолжително да се почитуваат.
„Ние имаме силни релации со земјите од Западен Балкан и тука сме да им помогнеме во поглед на оваа тема“, вели Клод Брунет.
Иницијативата на Германија и Франција има пристап на две нивоа.
Регионален акциски план со специфични и мерливи цели за намалување на недозволената трговија со мало оружје до 2024 година беше разработен и договорен од страна на партнерите од Западен Балкан. Овој документ претставува основа за зајакнување на соработката меѓу донаторската заедница и властите од Западен Балкан. Документот беше официјално одобрен од шефовите на држави и влади на самитот за Западен Балкан од берлинскиот процес на 10 јули во Лондон.
На национално ниво донаторските координативни состаноци, со кои претседаваат Германија и Франција, годинава се организирани кај сите шест регионални партнери за да обезбедат заедничка анализа од страна на националните власти и меѓународните партнери за приоритетите за подобрување на борбата против недозволената трговија со огнено оружје и да ги идентификуваат можностите за понатамошна соработка и иницијативи за заедничко програмирање.
Маркос Блеинрот, претставник на германското Министерство за надворешни работи, вели дека тие забележале оти културата на Западен Балкан сè уште се поврзува со оружје, со пукање на свадби и други прослави. Тој посочи дека тие ја гледаат Македонија како безбедна земја и затоа се залагаат за стопирање на илегалната продажба на оружје. Тој посочи дека регионот мора да ги санкционира ваквите појави.
Блеинрот вели дека и медиумите ја имаат улогата да им посочат на граѓаните за последиците од нелегалното користење оружје.
На 11 декември Франција ќе биде домаќин и на конференцијата на високо ниво во Париз за да се разгледаат резултатите од донаторските координативни состаноци, да се презентираат локалните акциски планови за имплементација на регионалниот план и да се идентификуваат донаторските придонеси за негово финансирање. Кон крајот на 2019 година, пак, во Берлин ќе се одржи мониторинг-конференција кога ќе се разгледа и првата година од имплементацијата на регионалниот план и на националните акциски планови.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Почнуваме со проектот за третата фаза од пругата кон Бугарија

„Тоа ќе биде од големо значење за нас како држава, за Македонија како целина, бидејќи на тој начин ќе ја потврдиме онаа наша цел, а тоа е да бидеме крстосница на два многу значајни паневропски коридори, коридорот 10 и коридорот 8“, вели Христијан Мицкоски претседател на Владата на Република Северна Македонија одговарајќи на новинарско прашање до каде се процесните подготовки за третата фаза од изградбата на железничката пруга.
„Третата фаза е во процес на развивање, би рекол. Битно е дека сите оние пречки коишто во минатото се случуваа, се надминати. Постигната е согласност со нашиот источен сосед. Нашиот дел, би рекол, со одлуката на Влада да се активира грантот, што значи техничка поддршка од страна на Европската инвестициона банка, подразбира дека и ние отпочнуваме со овој проект. Техничката поддршка значи ревизија на основниот проект, ревизија на целосната документација и потоа објавување на јавен повик за изградба и на третата фаза, со што практично ние ќе ја заокружиме целата делница, којашто е дел од коридорот 8, од Куманово до граница со Бугарија“, изјави премиерот Мицкоски.
„Од другата страна, исто така, процесот добро напредува, така што, со ова коридорот 8 ќе биде целосно исполнет.
Коридорот 10 знаете е дел од проектот којшто го имаме со Владата на Обединетото Кралство, и тука сме во напредна фаза. Така што убави вести, убави моменти ќе има за Македонија и граѓаните во периодот којшто следи“, нагласи Мицкоски.
Македонија
И без документи, оние што се сомневаат дека биле непотребно оперирани нека поднесат претставка, повика Клековски

Сите што се сомневаат дека биле непотребно оперирани по скандалот дека се правеле операции на срце само за да се извлечат пари, треба да пријават. Директорот на Фондот за здравствено осигурување, Сашо Клековски, вели дека и по објавата на скандалот, кај нив нема претставки за непотребни операции.
„До средата немаше ниедна пријава или претставка за евентуална непотребна операција. Ги повикуваме сите пациенти што се сомневаат, без разлика дали имаат документи или не, да поднесат претставки. Документите за операциите се чуваат во архивите на болниците“, повика директорот Клековски.
Скандалот со наводно непотребни кардиохируршки интервенции во приватни болници во Скопје го обелодени кардиологот Сашко Кедев, кој јавно обвини дека кај пациенти без медицинска потреба се вршеле операции на срце, исклучиво поради финансиски интерес.
Сомневањата ги насочи кон приватните клиники „Жан Митрев“ и „Аџибадем Систина“, кои ги отфрлија тврдењата и рекоа дека работат според утврдени медицински протоколи и дека секоја интервенција е документирана и оправдана. Клиниките посочија дека се отворени за соработка со надзорните тела и ги поддржуваат сите иницијативи за транспарентност и контрола.
По наводите за непотребни операции, Министерството за здравство формира две комисии за расчистување на случајот. Едната е интерна, составена од лекари, претставници од Фондот, правници и економисти, која има задача да ги анализира сите кардиолошки и кардиохируршки операции во земјата во периодот од јануари 2023 година со август 2025 година. Втората комисија е меѓународна, составена од тројца лекари, кои ќе извршат надзор и во приватните и во јавните здравствени установи.
Македонија
Николоски: Почнуваме со реконструкција на обиколницата кај Крива Паланка, активно се работи и на граничниот премин

Имаме рекордни инвестиции во инфраструктурата во Крива Паланка и регионот. Само преку Владата, преку двата јавни повици инвестираме преку 200 милиони денари за проекти, а денеска започнуваме и со рехабилитација на обиколница Крива Паланка, истакна при денешната посета, вицепремиерот и министер за транспорт, Александар Николоски.
Николоски, заедно со премиерот Христијан Мицкоски и директорот на ЈП за државни патишта Коце Трајановски, извршија увид во рехабилитацијата на овој патен правец како дел од Коридор 8.
Проектот се реализира преку ЈП за државни патишта, а инвестицијата е преку 65,5 милиони денари. Во продолжение интегралната изјава на вицепремиерoт Николоски:
„Денеска започнувме со рехабилитација на обиколница Крива Паланка. Тоа е логичен сплет на големиот проект кој што беше пуштен во јануари оваа година, а тоа е експресниот пат од Страцин до Крива Паланка, експресен пат кој што веќе го менува животот за овој дел од Македонија. Веќе со едно пријатно возење се стигнува од Скопје до Крива Паланка. Со рехабилитацијата на обиколницата, оние кои што патуваат кон Софија, Бугарија исто така побрзо и побезбедно ќе може да патуваат. Во таа насока би сакал да спомнам дека активно се работи на реконструкција и на Граничниот премин, активност која што ја започнавме минатата година и активност која има добра динамика и која очекувам да биде завршена набрзо и да има поголем проток на границата.
Преку Владата преку два повици еден оваа година, еден минатата година, Владата инвестира вкупно 200 милиони денари во проекти во општина Крива Паланка, што е еден историски рекорд и нешто што никогаш не е направено за овој крај и оваа општина. Секако тука се и другите општини, Ранковце и Куманово и сите кои гравитираат кон овој регион. Ќе продолжиме да работиме во периoдот кој е пред нас и да имаме други успеси”, изјави вНиколоски.