Македонија
Една и пол година по секнувањето на водата, Владата на следната седница ќе носи одлука за пуштање на хидросистемот за Дојранското Езеро

Владата ќе го поправа хидросистемот за полнење на Дојранското Езеро и ќе формира јавно претпријатие, кое ќе стопанисува со него, а одлуките за тоа ќе го донесе на првата наредна седница, најави министерката за животна средина, Каја Шукова, која денес со премиерот Димитар Ковачевски присуствуваше на свечениот почеток на санацијата на колекторскиот систем и изградба на нова прочистителна станица во Дојран. Министерката Шукова објасни дека тие на следната седница ќе ја исправат грешката на ВМРО-ДПМНЕ, кои го укинале јавното претпријатие и хидросистемот го довериле на управување на Министерството за средина. Како управител со хидросистемот, Министерството лани во февруари, кога поскапи струјата, ги изгаси пумпите и оттогаш нема дотур на свежа вода во езерото. Дојранци алармираа дека се украдени и искршени пумпите, а оштетувања има и на целиот систем. Тоа денес го потврди и министерката Шукова, рече дека првин ќе треба да се поправи системот, па да се формира јавно претпријатие за да се пушти водата повторно да го полни езерото.
„На првата наредна седница на Владата ќе одиме со информација за повторно пуштање на хидросистемот на Дојранското Езеро. Конечно, ќе ја исправиме грешката што беше направена пред осум или девет години кога хидросистемот, кој имаше сопствено јавно претпријатие, во тоа време ВМРО-ДПМНЕ, не знам од кои причини, само ним познати, најверојатно, го укина јавното претпријатие и го дадоа на управување на Министерството, што во согласност со законите во државата е нон сенс. Ние сега ќе ја исправиме таа грешка“, рече министерката Шукова.
Таа потсети дека формирање јавно претпријатие било планирано и претходно, но го одложиле поради енергетската криза, која ја поскапи струјата.
„Сега кога се стабилизира тој пазар, во комуникација сме со претседателот и со градоначалниците од регионот повторно да се актуализира прашањето за формирање јавно претпријатие, кое ќе управува со хидросистемот, кој има неколку намени. Едната е да носи дополнителни количини вода во Дојранското Езеро, втората е тоа што може да биде водоснабдител и за богданскиот и за овој регион, со мали зафати, мали интервенции на хидросистемот. Има капацитет од 1.000 литри во секунда. Ќе треба негова рехабилитација, ќе треба време да се санира бидејќи во голем дел има проблеми со пумпите, со вентилите. Тоа се технички работи. Прво, ќе одиме со рехабилитација, формирање на претпријатието и да се пушти, конечно, во работа по подолг временски период“, рече министерката Шукова.
Минатата година, кога Министерството ги изгаси пумпите и го сопре дотокот на свежа вода во езерото, образложија дека на таков чекор се одлучиле поради енормно високите сметки за струја. До 2020 година трошокот за струја за хидросистемот бил речиси еден милион евра годишно, а од октомври 2021 година, кога струјата почна вртоглаво да поскапува, сметката им се искачила над 325 илјади евра месечно, колку што плаќале до февруари лани.
Веќе една и пол година жителите на Дојран апелираат хидросистемот да се врати во употреба колку и да чини неговото поправање оти водостојот на езерото од лани во февруари е во постојано опаѓање. Во споредба со претходната година, нивото е паднато повеќе од еден и пол метар, па жителите стравуваат дека ќе им се повтори еколошката катастрофа од пред две децении.
Хидросистемот за спас на Дојранското Езеро е дело на Владата на ВМРО-ДПМНЕ на чело со Љупчо Георгиевски. По долготрајното празнење на езерото и екстремно нискиот водостој, во 1999 година Владата донесе одлука за прогласување елементарна непогода и поведе иницијатива за спас на Дојранското Езеро, во чии рамки во 2001 почна изградбата на хидросистемот за доведување дополнителни количини вода од Ѓавато кај Богданци, а првите количини беа испумпани во 2003 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Влен“: Арбен Фетаи ги уништи плановите на ДУИ и заложниците на Ѓока

„Пропагандната машина на ДУИ и нејзините патерици започнаа ниска кампања на клевети и лаги против вицепремиерот, Арбен Фетаи. Криејќи се зад лажни профили и користејќи валкани методи, тие се обидуваат да ја оцрнат неговата личност и да го попречат процесот на промени што сега стана незапирлив“, велат од „Влен“.
„Овие напади докажуваат само едно: моќта на ВЛЕН ги уништи плановите на ДУИ и Таравари со кланот Ѓока. Тие се плашат од транспарентноста, од чистите раце и од нашата решеност да ги искорениме злоупотребите, корупцијата и мафијашките врски што ја држат државата како заложник две децении.
ВЛЕН има фундаментална разлика со ДУИ и нејзините патерици: Ниту еден јавен денар не е злоупотребен од нашите претставници. Нивното богатство и интегритет се отворена книга, секој цент е заработен чесно. Без компромис и без контакт со ДУИ, нашата дистанца е јасна, бидејќи секој што ќе ја допре ДУИ е извалкан од нивното морално распаѓање. Нашето донесување одлуки е слободно, невлијателно и неуценето, бидејќи нашата единствена зависност е од нашиот народ и нација, а не од олигарси и нарко-босови. Затоа, нивните напади оркестрирани од зад сцената се едноставно очај. Тие не се осмелуваат да се соочат со вистински обвинувања, факти и аргументи, бидејќи знаат дека ВЛЕН е олицетворение на чисти раце и чесна политика.
Нека клеветат со лажни профили, нека лаат нивните дигитални платеници, караванот ВЛЕН незапирливо се движи напред, градејќи иднина каде што Албанците се посилни, а не експлоатирани, иднина без ДУИ, без патерици и без заложниците на Ѓока“, се наведува во соопштението на „Влен“.
Македонија
Шукова: Време е да ги издигнеме Скопје и Бутел од калта во која се оставени

Кандидатката за градоначалник на Град Скопје од СДСМ, Каја Шукова, и кандидатката за градоначалничка на општина Бутел, Оливера Ливринчиќ, се сретнаа во Бутел, каде разговараа за конкретни проекти и решенија со кои општината конечно ќе добие вистинско внимание и современа урбана инфраструктура.
На прошетка низ општинaта тие разговараа за повеќе клучни теми, меѓу кои и запоставената состојба на реката Серава, сообраќајниот метеж, како и потребата од нова, функционална инфраструктура која ќе донесе поврзаност и квалитет на живеење за граѓаните на Бутел.
„Време е за паметни решенија за Бутел и Скопје. Бутел конечно ќе добие посветено лидерство, ред и модерна инфраструктура каква што бутелчани заслужуваат“, порача Шукова, истакнувајќи дека нејзината визија за Скопје подразбира грижа и развој рамномерно во секој дел од градот.
Кандидатката за градоначалник на Бутел, Ливринчиќ, се осврна на состојбата на реката Серава и нејзината целосна запоставеност од досегашната локална самоуправа. Таа најави проект за уредување на целиот кеј со пешачка и велосипедска патека, создавајќи безбеден простор за сите генерации.
„Мој план е пешачка и велосипедска патека по целиот кеј. Ова ќе биде место за рекреација, безбедно за сите генерации“, најави Ливринчиќ.
Последното уредување на реката Серава, потсети Шукова, било направено во 2021 година од поранешен градоначалник од редовите на СДСМ по кој изостанала секоја реализација и одржување од страна на новото локално раководство. Шукова на Ливринчиќ и ги презентираше плановите на градот за овој дел на градот Скопје.
„Мојот план за овој дел од градот подразбира изградба на 2 нови моста на реката Серава и надвозник над булеварот Никола Карев, потпорни ѕидови од 2 километри, атмосферска и фекална канализација. Ова е голем инфраструктурен чекор но тука не застануваме. Планираната нова клучка кај булеварите ,Словенија и Никола Карев ќе биде нова порта на Скопје. Ги поврзуваме Бутел со Ѓорче, Карпош и Чаир. Ова ќе биде современ инфраструктурен јазол со велосипедски и пешачки патеки, ЛЕД осветлување и директен пристап до скопската обиколница“, најави Шукова.
Притоа двете истакнаа дека имаат решение за сообраќајниот хаос меѓу Автокоманда и Бутел, а тоа е булеварот Хрватска кој предвидува нови коловози, зелени површини, велосипедска патека и безбедни пешачки зони.
„На Скопје и Бутел им е неопходно ново раководство и управување за да се издигнат од калта во која се оставени. Скопје и Бутел имаат потреба кандидати кои ќе се спротивстават на криминално ВМРО-ДПМНЕ кое 4 години системски ги урниса Скопје и скопските општини“, порачаа кандидатките на СДСМ за Скопје и Бутел.
Македонија
ВМРО-ДПМНЕ: Сериозно се подготвуваме за претстојните локални избори, целта е историски резултат

„ВМРО-ДПМНЕ за четири години локална власт покажа дека општините може да се управуваат без афери, без криминал, злоупотреба на народни пари. На крајот на четвртата година од претходните локални избори кои се одржаа во 2021 годината, 42 градоначалници од ВМРО-ДПМНЕ покажаа дека можат да управуваат со општините европски“, велат од ВМРО-ДПМНЕ.
„Оттука, ВМРО-ДПМНЕ сериозно се подготвува за претстојните локални избори закажани за 19 октомври. Целта е како што вели и претседателот на партијата, Христијан Мицкоски да се постигне историски резултат по кој само посилно ќе се продолжи со работа на веќе почнатата реформска агенда.
Со историска победа само ќе продолжи периодот на реформи и обнова на сите локални самоуправи во Македонија, ќе продолжи периодот на креирање на дополнителна функционалност на општините.
За досегашната реформска агенда кажуваат бројките на реализирани проекти. Во периодот од 4 години се изградија и реконструираа улици и патишта во вкупна должина од над 770 километри во што се вложени околу 100 милиони евра. Направени се скоро 47 илјади метри нови водоводи, а канализации во должина од над 91 илјади метри.
Со цел модернизација на општините изградени или во завршна фаза се седум пазари од затворен тип како оној во Штип, Велес, Радовиш. Направени се инвестиции за најмладите, реконструирани и модернизирани се околу 400 училишта низ Македонија, а завршени или во завршна фаза се околу 280 спортски игралишта и детски рекреативни терени. На голем број училишта се поставени фотоволтаици, а во голем број на општини обезбедена е бесплатна храна за децата од прво до петто одделение. И ова е се само дел од сработеното за четири години.
По историската победа која се очекува оваа есен, ВМРО-ДПМНЕ ќе продолжи само со уште позасилено темпо на реализација на проекти кои го подобруваат квалитетот на животот на секој граѓанин“, соопшти ВМРО-ДПМНЕ.