Македонија
Горан очаен што не може да го најде својот брат на Халкидики: Не можам да си одам без него

Не можам да се вратам дома без брат ми, вели Горан Јовановски, брат на Мартин (31) кој пред 11 дена исчезна во морето на Халкидики.
Мартин со двајца пријатели исчезна во водата на плажата Посеиди, кога силните струи ги однеле. Едниот беше извлечен по неколку часа, а другиот пронајден по 20 часа потрага. Од Мартин, пак, сè уште нема ни трага ни глас.
Неговото семејство минатата недела пристигна во Грција и оттогаш учествуваат во континуираната потрага по Мартин.
Горан дошол во Грција со пријатели и доброволци од родниот крај, за што побрзо да го најде својот брат. Со него се неговата мајка, сопругата и нивното десетмесечно бебе.
„Десет дена активно трагаме по брат ми и засега нема резултати, ништо“, очаен е Горан.
Тој истакна дека потрагата по Мартин е многу скапа и побара помош од Грците и локалната власт, истовремено заблагодарувајќи им се на волонтерите кои несебично помагаат сите овие денови.
„Пребарувањето станува многу скапо. Изнајмуваме авиони, подводни дронови со термални камери, чамци. Сето тоа станува финансиски неодржливо за моето семејство. Сакам да им се заблагодарам на волонтерите кои дојдоа од Македонија, на грчките спасувачи волонтери кои беа со нас цело ова време и на сите луѓе кои уплатија донации од целиот свет. Не можевме ништо без нив. Благодарни сме и на грчката влада која ја прошири истрагата“ – рече Горан.
Вели дека тој и неговото семејство се „заробени“ во туѓа земја, чиј јазик не го знаат.
„Не можам да одам дома без брат ми. Не можам ништо да ѝ кажам на мајка ми. Како да си одам дома без брат ми? Затоа барам грчката влада да ни помогне на кој било начин, со авиони, дронови, хеликоптери… Во потрагата можат да помогнат и цивили со нивните чамци. Може да помогнат и граѓаните со дронови. Имаме ограничен број луѓе, а треба да се пребара голема површина“ – вели братот на исчезнатиот млад човек.
Спасувачките доброволци велат дека нивниот подводен дрон е вклучен во потрагата и тие ќе дадат сè од себе да го пронајдат Мартин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Началникот на Генералштабот на Вооружените сили на Унгарија, во официјална посета на Армијата

Делегација на Вооружените сили (ВС) на Унгарија, предводена од началникот на Генералштабот на ВС, генерал Габор Беренди престојува во дводневна официјална посета на Армијата на Република Северна Македонија.
По приемот со високи воени почести, во Кампот за обука на вода во Охрид, генерал Габор Беренди оствари средба со својот домаќин, началникот на Генералштабот на Армијата, генерал-мајор Сашко Лафчиски.
На средбата се разговараше за досегашната билатерална соработка помеѓу двете сојузнички НАТО армии и можностите за понатамошно унапредување на истата, преку конкретни активности од заемен интерес (обука и вежби, размена на искуства и користење на капацитетите за обука). Притоа беше констатирано дека билатералната меѓуармиска соработка, која во континуитет е на високо ниво, придонесува кон безбедноста и стабилноста во регионот.
За време на официјалниот состанок, делегацијата од ВС на Унгарија беше запознаена со процесот на трансформација и модернизација на Армијата на Република Северна Македонија, структурата на специјалните сили, билатералната соработка помеѓу специјалните сили и капацитетите на АП„Криволак“.
Во рамки на заедничката обука со специјалните сили на ВС на Унгарија беше изведена методско-показна вежба „Препад на пловен објект и командно место“, како и тактичко- технички збор на кој беше прикажана дел од опремата која се користи за време на обуката.
По завршување на вежбата генералите истакнаа дека со оваа заедничка обука, покрај зајакнување на интероперабилноста се зајакнува и меѓусебното пријателство.
Поддршката за време на природни непогоди, како и учеството на припадници на воениот оркестар на ВС на Унгарија на концертот кој традиционално се изведува неколку години во пресрет на Нова година, дополнително го зајакнува силното партнерство и соработка.
Македонија
ВМРО-ДПМНЕ: Добро е што СДС признава дека економијата заживува, БДП расте и инфлацијата, која во нивно време беше двоцифрена, се намалува

Добро е СДС уште еднаш призна дека по економскиот пустош кои тие го оставиле, македонската економија бележи раст. По слободниот пад на економијата кои тие го оставија, за нецела година власт на ВМРО-ДПМНЕ, се вратија позитивните трендови на раст на БДП, реагираат од владејачката партија на прес-конференцијата на Кристина Костова потпретседателка на СДСМ.
Додаваат дека трето тримесечје по ред, Македонија бележи раст на БДП за 3 или над 3%.
„Имајќи предвид каква економска состојба беше наследена, ова е повеќе од добар резултат којшто ги поставува основите за понатамошен раст и развој на економијата. Кога СДС, зборува и лие крокодилски солзи за инфлацијата, која постепено и таа се намалува и се става под контрола, ако заборавиле, ги потсетуваме дека за време на нивното владеење инфлацијата, која го јадеше стандардот на граѓаните, беше двоцифрена“.
Добро е велат од партијата на Мицкоски, што СДС со своите прес-конференции признава дека добро осмислените економските политики и мерки преземени и имплементирани од страна на Владата, даваат резултати. „Дека полека заживува економијата која тие ја оставија опустошена, дека расте БДП и се намалува инфлацијата, која во време на нивно владеење беше двоцифрена“.
Македонија
(Фото) МВР донесе „Проценка од закани од сериозен и организиран криминал – СОКТА 2025“ – стратешки документ за борба со организираниот криминал

Денеска на настан во организација на Министерството за внатрешни работи се одржа промоција на документот „Проценка од закани од сериозен и организиран криминал – СОКТА 2025“.
Овој настан организиран со поддршка од ЕУ за зајакнување на борбата против криумчарењето мигранти и трговијата со луѓе за Западен Балкан (EU4FAST), претставува клучен чекор во унапредувањето на националните капацитети за справување со предизвиците поврзани со сериозниот и организираниот криминал.
Директорот на Бирото за јавна безбедност при МВР, Александар Јанев во своето обраќање потенцираше дека СОКТА 2025 претставува продолжение на стратешкиот циклус за проценка на закани, со цел утврдување на приоритети, како и креирање стратегии и зајакнување на институционалните и оперативните капацитети и потврди дека самиот документ ќе придонесе за поголема ефективност во превенцијата и борбата против криминалот преку сеопфатен, координиран и стратешки пристап.
„Борбата со организираниот и сериозниот криминал е предизвик кој заслужува внимание од сите чинители кои се надлежни и должни да постапуваат и да се борат против криминалот во овој домен. Токму ова е и целта на оваа Проценка, која претставува систематски изработен стратешки документ кој има за цел да ги детектира заканите од организиран и сериозен криминал, вклучувајќи ги и оние кои се реално присутни и заканувачки во овој период, како и оние кои се во настанување или може да се развијат во следниот период“, образложи директорот Јанев.
Директорот на БЈБ Јанев на крај заклучи дека Проценката е системска алатка за градење на Национална стратегија за борба против организираниот криминал, која е неопходно да биде донесена и како формален документ кој ќе биде основа и императив за постапување на сите чинители кои се вклучени во овој домен.