Градоначалникот на Прилеп, Илија Јованоски, денеска апелира да не се шират паника и дезинформации, да прекинат жигосувањата, бидејќи секому може да му се случи да биде инфициран од коронавирус.

„Треба сите да бидеме што повеќе изолирани во своите домови, да не излегуваме, бидејќи тоа е најдобриот начин да не бидеме зафатени од коронавирусот. Уште еднаш до нашите сограѓани сакам да упатам апел за смиреност, за спокојство. Да оставиме здравствените работници да си ја завршат својата работа. Ги охрабрувам и нив, ја разбирам и нивната растревоженост, бидејќи ова што ни се случува не е нешто секојдневно. Но, сето ова мора заедно да го издржиме зашто само така ќе ја победиме пандемијата“, порача Јованоски.

Тој рече дека Општинскиот кризен штаб е во перманентно заседавање и секојдневно презема нови мерки за заштита на здравјето на граѓаните. Во таа смисла, денеска на сите матични лекари и стоматолози им се испорачуваат штитници за лице, а порачана е нова количина скафандери за заштита на медицинскиот персонал во здравствените институции. Исто така, во соработка со јавните претпријатија се врши дезинфекција на влезовите во зградите, во деновите од викендот повторно ќе бидат дезинфицирани главните и споредните улици, а на влезовите во градот ќе бидат поставени таканаречени речни корита со течност за дезинфекција на сите возила што доаѓаат од другите градови во Прилеп.

„Од вкупно земените 20 бриса во текот на вчерашниот ден, 4 се позитивни на коронавирусот, а 16 се негативни. Од нив, едно е дете на 9-годишна возраст, две се женски лица на возраст од 35 години и едно машко лице од 36 години. Епидемилошката служба работи на изнаоѓање на поврзаноста на случаите. Токму тоа е нивната задача – да се најде изворот на заразата. Можам само да потврдам дека детето и мајка му, кои се инфицирани со коронавирус, се во фамилијарно сродство со претходно потврдените два случаја. Анкетирани се сите оние што биле во примарен и секундарен контакт со потврдените случаи на заразени со Ковид-19“. Од понеделникот првпат почнаа да работат 14 пункта за тестирање на коронавирус на територијата на Република Северна Македонија, а еден од тие пунктови е во општина Прилеп и се наоѓа во просториите на Центарот за јавно здравје. Закажувањето е преку матичен лекар, на ‘Мој термин’“, информира директорката на Центарот за јавно здравје – Прилеп, Драгица Николоска.

Таа додаде дека тестот на синот на брачната двојка е негативен, а на кои вчера им беше утврдено дека се позитивни на коронавирусот и кои од вчера се наоѓаат на Инфектолошката клиника во Скопје. Во врска со четирите нови случаи на инфицирани со вирусот Ковид-19, Николоска соопшти дека сите се во добра здравствена состојба и моментно се во домашна изолација.