Македонија
ГОБ „8 Септември“ добива линеарен акцелератор за малигни заболувања

Во Градската општа болница „8 Септември“ се финализира инсталацијата на нов линеарен акцелератор. Станува збор за врвна технологија за третман на малигните заболувања. Апаратот е од еден од водечките светски производители и претставува најдобра платформа достапна на пазарот во оваа област, соопшти Министерството за здравство.
Пред инсталацијата на апаратот изграден е комплетно нов бункер за кој се обезбедени 58 милиони денари од буџетот на Министерството за здравство.
Линеарниот акцелератор овозможува максимална прецизност во планирање и изведување третмани имајќи предвид дека насочувањето на третманскиот зрак се врши со рубини, а кај сите други апарати се врши со огледала.
„Со примената на оваа технологија се овозможува управување со радиотерапевтските процедури, планирање и креирање распореди, резервација на термини, следење на пациентите, следење на реализацијата на третмани, креирање електронски записи за историјата на болеста, ревизија и споредба на сликите добиени со електронскиот портал-детектор на акцелераторот, со сликите добиени од системот за планирање на третманот“, велат од МЗ.
Од таму потсетуваат дека Владата на седница ја усвои информацијата со иницијатива за соединување, односно централизирање на дејноста онкологија и радиотерапија во рамките на Универзитетската клиника за радиотерапија и онкологија – Скопје со основање подрачни одделенија во Градската општа болница „8 Септември“ – Скопје, Клиничката болница во Штип и Клиничката болница во Битола, како и во сите градови во Републиката.
Овој чекор, велат од Министерството, ќе обезбеди стручна, навремена и технолошки напредна радиолошка терапија за пациентите во целата држава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Почина Панчо Минов, поранешен пратеник и градоначалник на Кавадарци

На 67-годишна возраст денеска почина Панчо Минов, поранешен градоначалник на Кавадарци и поранешен пратеник во Собранието.
Панчо Минов беше дипломиран правник и политичка фигура со повеќедецениско искуство. Тој два пати беше избран за градоначалник на Општина Кавадарци – прво како кандидат на Либералната партија (2000–2005), а потоа како независен кандидат (2005–2009).
Минов имаше и пратеничка кариера, учествувајќи во повеќе состави на Собранието.
Првпат беше избран во првиот повеќепартиски состав (1990–1998), а подоцна повторно стана пратеник преку ГРОМ (2016–2020) и СДСМ (2020–2024).
Македонија
Уште колку луѓе треба да настрадаат за Панче Тошковски да почувствува одговорност, прашуваат од СДСМ

Министерот Панче Тошковски без око да му трепне јавно соопшти дека не чувствува никаква одговороност за колапсот на безбедносниот систем и фактот што на улиците се пука како да сме Див Запад, велат од СДСМ.
Според нив, последиците од партизацијата на полицијата и претоварењето во партиски сервис на ДПМНЕ скапо ги чини граѓаните.
„До кога мисли Тошковски да се криe зад политички реторики додека улиците стануваат небезбедни за граѓаните?
Не е само последното пукање во Куманово, непрекинатиот раст на вооружените и насилни инциденти во различни градови е сигнал за целосно системско потфрлање на безбедниот апарат, нема ниту превенција ниту соодветна реакција.
За тоа мора да има одговорност“, додаваат од оваа партија.
Македонија
Парични казни за три градинки и едно училиште по спроведени инспекциски контроли во кујните

Инспекциските служби на Агенција за храна и ветеринарство (АХВ), во септември годинава спроведоа инспекциски контроли во училишните и кујните во градинките на територијата на цела држава. Спроведени беа 91 контрола во градинки и 23 вонредни надзори во училишта.
За утврдените недоследности, издадени се 9 решенија со наредби за нивно отстранување. Во две градинки, хигиената не била задоволителна во кујните, а една градинка немала спроведено задолжителен здравствен преглед на вработениот персонал во кујните. Парични казни изречени се за 3 градинки, и поради несоодветно чување, уништени се 24 килограми храна.
Од спроведените контроли во училиштата, незадоволителни услови констатирани се само во една училишна кујна. Отстапки во однос на добрата производствена и добра хигиенска пракса утврдени се во две кујни. Поради погрешно декларирање, уништени се 59 килограми храна.
Инспекциските служби на АХВ за утврдените недоследности со контролите во училишните кујни изрекле 1 парична казна и донеле 5 решенија со наредба за нивно отстранување.