Македонија
Грковска – Карис: Дигитализацијата е предуслов за ефикасно и транспарентно општество
На маргините на дигиталната конференција E-governance, што се одржува во Талин, Естонија, заменик-претседателката на Владата задолжена за политики за добро владеење, Славица Грковска, имаше средба со претседателот на Естонија, Алар Карис, со кој разговараа за предностите што дигитализацијата на општеството ги обезбедува за сите граѓани.
Грковска се заблагодари за поддршката што Естонија ѝ ја дава на Македонија во процесот на дигитална трансформација на општеството, процес за кој Владата е цврсто определена да го реализира со цел да изгради професионален, ефикасен и отчетен систем во сервис на граѓаните.
Карис, како што информираат од нејзиниот кабинет, оценил дека е многу важно државата да има координиран пристап во сите чекори што ги презема во делот на дигитализацијата и нагласи дека искуството на Естонија може да помогне во сите фази на дигитализацијата. Тој потенцира дека секоја држава, вклучително и Естонија, во спроведувањето на оваа реформа се соочува со предизвици, но со позитивен пристап тие секогаш се надминуваат.
Двајцата соговорници се согласија дека дигитализацијата носи многу предности, особено за граѓаните во чиј интерес е да имаат ефикасни и брзи услуги.
Она што е важно, според Грковска, е граѓаните да имаат доверба во институциите на системот, а тоа може да се постигне со транспарентно работење во интерес на граѓаните.
Дигитализацијата, додаде таа, освен што ја зголемува ефикасноста на институциите, но и на услугите, обезбедува и транспарентност во работењето на државните органи, што е клучно за принципот на добро владеење.
Грковска, во рамките на проектот за унапредување на дигитализацијата на Македонија, а во соработка со естонскиот Центар за меѓународен развој и со поддршка на Соединетите Американски Држави, е во тридневна посета на естонските институции, кои се носители на естонското дигитално општество.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Делови од Аеродром, Карпош и Ѓорче Петров утре без струја
Без електрична енергија утре ќе останат делови од општините Аеродром, Карпош и Ѓорче Петров.
Како што соопшти РЦУК – Скопје, без струја во периодот од 09:00 до 15:00 часот ќе останат корисниците на дел од село Долно Лисиче, реонот околу чаталот, ул.10 во општина Аеродром, од 10:30 до 14:30 часот дел од улица 16, на патот кон Визбеговово општина Карпош, а од 13:00 до 14:30 часот објектите на градинката Росица, на ул.„Мечкин Камен“, бр.45А. во општина Ѓорче Петров.
Македонија
Скопските и тетовските пожарникари гасеа три огнови на отворено, соопшти ЦУК
Во изминатото деноноќие Центарот за управување со кризи информира дека биле евидентирани три пожари на отворено.
Регионалниот ЦУК Скопје соопштил дека БППЗ на Град Скопје во изминатото деноноќие имала две помали интервенции поради запалено ѓубре и тоа на ул. „Ферид Заири“ во Општина Чаир и кај Езерото Треска во Општина Сарај.
Регионалниот ЦУК Тетово известил дека ТППЕ Тетово имала една помала интервенција поради запалена ниска вегетација кај село Чифлик во Општина Желино.
Центарот за управување со кризи соопшти дека изминатите 24 часа имало вкупно 1.491 повици на Единствениот повикувачки број за итни случаи 112. Од нив „реални“ повици биле 62,84 отсто, а 37,16 отсто биле за други потреби на граѓаните што не биле итни.
Кон полиција биле упатени 63,18 отсто, кон итната медицинска помош 29,09 проценти, кон пожарникарите 2,73 отсто, a кон АМСМ 1,36 отсто од повиците кон бројот 112.
Македонија
Силните дождови поплавија подруми и гаражи во Охрид
Локални дождови вчера и во текот на ноќта имаше на повеќе места во државата. Регионалниот Центар за управување со кризи (ЦУК) Охрид, известува дека се добиени пријави на граѓани за поплавување на подруми и гаража на две куќи на ул. „Стив Наумов“, во Охрид. Од страна на Општина Охрид е контактирано со ЈП „Нискоградба“ и ЈП „Колекторски систем“ дека колекторскиот систем не можел да ја прими во целост количината на вода која поради обилните врнежи од дожд, бидејќи во тој период на пороен дожд количината вода била голема. За кратко време состојбата е санирана.
Од ЦУК потсетуваат за голема внимателност при појава на локалните нагли метео промени и особена внимателност при грмежите и молњите, односно при силните електрични празнења. Препораките се да не се престојува на отворен простор и под осамени дрвја.
Потсетување има и за внимателно возење, особено на патиштата низ котлините, речните долини и клисурите, каде што има можност од појава на помали одрони при вакви променливи метео услови. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Сите итни случаи се пријавуваат на Единствениот повикувачки број за итни случаи 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е потребно и е корисно да се следат препораките и информациите од медиумите за превенција, а и за реагирање при итни случаи.