Македонија
ГРОМ: Вистински позитивен ефект од посетата на САД на туристичката дружина на Мицкоски е што Македонија ќе загуби 72 милиона долари девизен прилив

Граѓанската опција за Македонија ГРОМ е вчудоневидена од експресните ефекти од посетата на премиерот Христијан Мицкоски на САД и неговите фалби дека таму се сретнал со значајни личности при претседателската инаугурација на Доналд Трамп. Уште Мицкоски не се врати од фрлањето лопати во општина Петровец а пристигна наредба од „пријателот“ на Мицкоски, Доналд Трамп да се замрзнат сите проекти во Македонија во вкупна вредност од 72 милиони долари, велат од ГРОМ.
“Ова е вистински доказ за „позитивните“ ефекти од туристичката дружина на нашиот премиер која ќе има сериозен удар врз невладиниот сектор, а најважно е што Република Македонија губи 72 милиони долари девизен прилив. Да потсетиме, дефицитот во платниот биланс се покрива со приходи од извоз, дознаките од нашите иселеници во странство, директните странски инвестиции од донации (што е конкретниов случај) и директни задолжувања во странство. Тоа значи штета ќе претрпат невладините организации, граѓаните, и платниот биланс на државата. Кога на ова ќе се додадат неколкуте стотини илјади долари потрошени средства за оваа екскурзија, посетата во САД се сведе на обичен чалам на премиерот, прошетка на неколку министри од владата и директен зијан за државата што се заедно се сведува на „дупло голо“’, истакнуваат од партијата ГРОМ и додаваат:
„Соочени со суровата реалност нашите владетели сега ја замајуваат јавноста со бојкоти на маркетите и спроведување на политика „фатете го крадецот“ наместо да се бави со вистински економски политики, кои ќе значат подобар живот за граѓаните, поголема профитабилност за фирмите, проширена репродукција за истите и отворање на нови работни места“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: За една година инвестиравме 164 милиони денари во Арачиново

Вицепремиерот и министер за животна средина, Изет Меџити, денеска изврши увид на терен во завршната фаза од изградбата на секундарната фекална канализација во Арачиново – проект составен од 9 краци, со вкупна вредност од околу 20 милиони денари.
Меџити при работната посета изјави дека моментално се работи на последниот крак, во должина од 860 метри, каде што се реализирани 50% од активностите, а проектот се очекува да заврши во текот на наредниот месец.
„Во изминатите 13 месеци, во Арачиново донесовме инвестиции во вредност од над 164 милиони денари – реални, конкретни проекти, а не само празни ветувања. Она што за некои беше недостижно повеќе од три децении – ние го реализиравме. Го изградивме ободниот канал, започнавме со изградба на нови фекални, атмосферски и водоводни мрежи, и овозможивме урбано уредување преку изградба на пешачки патеки и шеталишта, како што е случајот покрај Мојанска Река“, изјави Меџити.
Овие инвестиции, појасни тој, се резултат на соработката на Министерството за животна средина со Владата, при што се инвестирани 164 милиони денари преку Првиот повик, Вториот повик и Програмата за капитални инвестиции – од кои 64 милиони денари се само за изградбата на каналот, а 100 милиони денари за други инфраструктурни проекти.
Меџити најави дека работата нема да застане тука.
„Ќе продолжиме да инвестираме – не по партиска или етничка линија, туку секаде каде што има реална потреба. Веруваме во одговорна политика која носи конкретни резултати, а нашата цел е секој граѓанин да ја почувствува разликата“, заклучи Меџити.
Македонија
Support Kocani со нова донација на компресивна облека за повредените од пожарот во Кочани

Граѓанската иницијатива Support Kocani ја реализира и третата пратка компресивна облека, наменета за преживеаните лица од пожарот во Кочани. Облеката е веќе предадена на Општата болница во Кочани, со цел да се овозможи правилна рехабилитација и побрзо заздравување.
Вредноста на оваа набавка изнесува 2.193.047 денари (35.555 евра), а средствата се целосно обезбедени исклучиво преку донации од граѓани, компании и поддржувачи од земјата и дијаспората. Со ова, вкупната вредност на досегашните три испораки надминува 3,4 милиони денари.
Со оваа пратка се опфатени втората тура на нарачки од првите две групи корисници на компресивна облека. Во оваа донација вкупно се обезбедени 176 парчиња специјализирана компресивна облека, изработени по индивидуални мерки за секој од засегнатите лица.
Македонија
Утре променливо облачно време, со локален пороен дожд и грмежи

Времето утре ќе биде променливо облачно со сончеви периоди. Наместа ќе има појава на нестабилна облачност со пороен дожд и грмежи. Ќе дува слаб до умерен ветер од северен правец, информира УХМР.
Минималната температура ќе биде во интервал од 12 до 19, а максималната ќе достигне од 26 до 32 степена.
Во Скопје, променливо облачно со сончеви периоди, ќе дува слаб до умерен северен ветер. Минималната температура ќе се спушти до 18, а максималната ќе достигне до 32 степени.
Од среда до петок ќе преовладува претежно стабилно време со пораст на дневните температури.
Во деновите од викендот повторно ќе има услови за повремени локални врнежи од дожд и ретки грмежи, а дневните температури ќе бидат во опаѓање.