Македонија
Дали Мицкоски ќе продолжи да го штити Меџити од обвинувањата за 450 илјади евра провизија за „Скендербег“ изнесени од Антонијо Милошоски, прашуваат од Алијансата за Албанците

Дали премиерот Христијан Мицкоски сè уште смета дека Изет Меџити, неговиот коалиционен партнер од ВЛЕН, како градоначалник на Чаир земал провизија од 450 илјади евра за плоштадот „Скендербег“, како што ВМРО-ДПМНЕ обвинуваше додека беше во опозиција, прашуваат од Алијанса за Албанците.
„Објавуваа бројки, скандали и афери за расипништвото во локалната власт, а денеска се верни владини партнери. Доколку Мицкоски заборавил, јавноста памети како пратеникот на ВМРО-ДПМНЕ, Антонијо Милошоски јавно изнесуваше обвинувања против Меџити за корупција, злоупотреби, криминали и провизии тешки 450 илјади евра. Мицкоски и ВМРО-ДПМНЕ треба да одговорат на прашањата кои се неизбежни и се од интерес на сите граѓани: Дали Мицкоски се откажува од својот пратеник Антонијо Милошоски и неговите тврдења за да го спаси Меџити? Дали ВМРО-ДПМНЕ сè уште веруваат во сопствените обвинувања кон Меџити, или тогашната критика била само евтин популизам? Дали оваа партија е подготвена да ги затвори очите пред сите тие наводи за криминал само за да остане на власт? И најважно: дали интересот на народот е жртвуван за сметка на нивните фотељи и функции“.
Алијанса за Албанците потсетува дека борбата против корупцијата не е предмет на пазарење.
Според оваа партија, нема компромис со наводни криминали, ниту алиби за политичка дволичност. Време е, додаваат од таму, ВМРО-ДПМНЕ јасно да избере дали сака владеење на правото или заштита на коалицискиот комодитет.
„Граѓаните нема да прифатат двојни стандарди – едно да зборувате кога сте во опозиција, а друго да правите кога ќе седнете на власт. Ако ВМРО-ДПМНЕ навистина сака да се претстави како носител на промени, мора јавно и без калкулации да покаже дали ќе застане на страната на правдата или ќе остане соучесник во коруптивните практики кои самите ги разоткриваа“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Параглајдинг несреќа на Галичица: државјанин на Германија доживеа тежок пад од поголема височина

Планинската спасителна служба Охрид извести дека вчера, околу 18:30 часот, добила повик од група параглајдеристи кои летале од падините на Галичица.
Тие пријавиле дека нивниот пријател, државјанин на Германија, од засега непознати причини доживеал тежок пад од поголема височина, на исклучително непристапен и карпест терен.
„За голема среќа, тројца спасители на ПСС во тој момент престојуваа во планинарската куќа „Спиридон“, каде е лоцирана и спасителната станица на ПСС, опремена со специјализирана техничка опрема за интервенции во овој регион. Веднаш по дојавата, екипата за само 15 минути стигна до местото на несреќата, изврши имобилизација на повредениот и започна комплексен транспорт по стрмен и тежок терен. Дополнителна отежнувачка околност беа и ноќните услови во кои се одвиваше целата акција.
По повеќе од еден час напорна интервенција, во 20:20 часот, повредениот беше безбедно спуштен до асфалтниот пат кај превојот Баба, каде беше предаден на екипа на Итната медицинска помош од Охрид. Од таму, тој веднаш беше пренесен во Специјалната болница за ортопедија и трауматологија „Св. Еразмо“, каде, за жал, му беа констатирани фрактури на пет пршлени во долниот дел на рбетот“, велат од Планинската спасителна служба.
Македонија
(Фото) Герасимовски: Со новата механизација го исчистивме сметот во Центар

Градоначалникот Горан Герасимовски, информира дека во текот на вчерашниот ден хигиеничарите од општината со новата механизација за чистење го собраа целиот смет од улиците во Центар.
„Целиот смет е собран од центарските улици. Нашите вредни хигиеничари вчера чистеа и во населбата Кале, а потоа со цистерна ги миеја улиците. Самите го исчистивме Центар, додека Град Скопје и ЈП „Комунална хигиена“ го преплавија цело Скопје со смет. Им благодарам на хигиеничарите што секојдневно се на терен, неуморно работејќи за наша почиста општина“, рече Герасимовски.
Македонија
Муцунски во Њујорк: Активна агенда со билатерални и мултилатерални средби

Шефот на македонската дипломатија, Тимчо Муцунски, во рамки на учеството на 80. Генерално собрание на Обединетите Нации во Њујорк, оствари низа билатерални средби и учествуваше на значајни мултилатерални настани.
Во одвоени средби со неговите колеги – министерот за надворешни работи на Кипар, Константинос Комбос, и министерот за надворешни работи на Султанат Оман, Сајид Албусаиди – беше потврдена заложбата за понатамошно унапредување на односите. Со министерот Комбос акцентот беше ставен на поддршката за европската интеграција и улогата на Кипар како земја-членка на ЕУ, која од јануари 2026 година ќе го преземе претседавањето со Унијата. Во разговорите со министерот Албусаиди, пак, фокусот беше насочен кон развој на билатералната соработка, особено во областа на трговијата и економијата.
Муцунски учествуваше и на Првиот биенален Самит за одржлива, инклузивна и отпорна глобална економија, каде ја нагласи улогата на Обединетите Нации во справувањето со глобалните предизвици и ја истакна посветеноста на државата кон спроведување на Целите за одржлив развој, усогласени со Националната стратегија за одржлив развој.
На покана на италијанскиот министер за надворешни работи, Антонио Тајани, министерот Муцунски присуствуваше и на работниот појадок со групата „Пријатели на Западен Балкан“, каде се разговараше за европската перспектива на регионот, стабилноста и регионалната соработка. Муцунски нагласи дека земјата останува цврст и конструктивен партнер на Европската Унија – посветена на реформите, владеењето на правото и економскиот раст, известува Министерството за надворешни работи.