„Ако се видат прецизно датумите и одлуките кои лекарите ги носеле во случајот со малата Тамара, редно е некој да ги праша и родителите зошто така се однесувале, зошто не ја однеле Тамара во Истанбул на лекување кога веќе парите биле уплатени во таа болница и зошто дозволиле да се разболи од воспаление на белите дробови“, вели за „Макфакс“ сопственикот и главен уредник на порталот mkd.mk, Александар Дамовски, кој вчера објави текст кој отвори една нова димензија со случајот со смртта на деветгодишната Тамара Димовска која страдаше од тежок деформитет на рбетниот столб а почина во 2015 година.

Сторијата на Дамовски наиде на жестоки критики од невладините организации и активистите за заштита на човекови права кои долго време протестираа барајќи оставка од тогашниот министер за здравство Никола Тодоров и сите одговорни, со тврдење дека системот потфрлил бидејќи навремено не ја испратил Тамара на лекување во странство за да се изврши интервенција.

Во текстот на порталот mkd.mk, повикувајќи се на официјални документи, се тврди дека лекарските комисии (првостепената и второстепената) во октомври 2014 година одбиле да дадат решение за лекување од странство на Тамара поради нецелосната документација и немањето конзилијарни мислења, како и поради фактот што во тој период и во Државната болница и во приватната болница Систина Аџибадем во Скопје биле отворени спинални центри. Кога документацијата била комплетирана, во декември 2014 година лекарите издале решение за упатување на лекување на Тамара во Медипол болницата во Истанбул, а биле уплатени 30 илјади евра на сметката на болницата. Во текстот се тврди дека мајката на девојчето сметала дека во оваа болница операцијата нема да биде успешна и барала нова болница, во Турција или во Германија. Министерството за здравство повикало познат ортопед кој сметал дека е потребна операција со голем ризик и ја препорачал болницата Аџибадем во Истанбул. Два месеци подоцна, комисиите одлучуваат да го послушаат турскиот ортопед, го менуваат  решението и ја упатуваат Тамара на лекување во Аџибадем. Четири дена подоцна, Тамара починува, а според текстот, причината за смртта е нелекување на воспаление на белите дробови.

„Сега, реакциите во јавноста се очекувани. Кога ќе фати бранот, потоа тешко е да се прифати нешто друго, нешто поинакво од она што значи беспоговорно прифатена вистина, Во случајот со Тамара, ако се прегледа целокупната димензија, работата изгледа малку поинаква. Никој тука не го брани ‘министерот на смртта’ како што беше нарекуван тогаш министерот за здравство Никола Тодоров. Од документите кои ги поседувам се гледа една непрецизност во пропишаната процедура, недефинирани обврски и рокови, што едноставно лесно доведува до ваквиот волунтаризам и неодговорност кога се работи за човечки живот“, вели Дамовски, додавајќи дека податокот дека објавените информации „некого болат во целата политичка инструментализација на случајот”.

Три години по смртта на Тамара на обвинителна клупа се 12 лица, а судењето е во тек.