Македонија
Да потпишеме договор – кој ќе ги изгуби изборите, повеќе да не се занимава со политика, повика Бектеши убеден дека ДУИ е победник

Министерот за економија, Крешник Бектеши, ги повика политичките парти да потпишат договор – кој ќе ги изгуби претстојните избори, повеќе да не се занимава со политика. Тој е убеден дека неговата партија, Демократската унија за интеграција, е победник и на овие избори.
„Да направиме договор меѓу сите политички партии тој што ќе изгуби веќе да не се занимава со политика. Ние ја фрламе ракавицата, нека повелат сите политички партии, вклучувајќи го и ВМРО и другите партии. Ова не би можело да се случи затоа што овие таканаречени лидери на политички партии, и ова не важи само за македонската опозиција туку и за другите лидери, сите изгубиле избори и тоа не еднаш туку повеќепати. Само господинот Ахмети никогаш не изгубил и никогаш нема да изгуби избори“, рече Бектеши.
За кандидатот за претседател на државата од ДУИ, Бујар Османи, Бектеши вели дека веќе почнале да излегуваат анкети според кои тој влегува во вториот круг, а за парламентарните избори вели дека веќе не зборуваат кој ќе биде победник туку со колкава разлика нивната партија ќе победи во албанскиот блок.
За коалицирање за парламентарните избори Бектеши рече дека е овластен да преговара лидерот на партијата Али Ахмети и тоа веќе го прави.
„Во делот на коалицијата со СДСМ секако дека во моментот кога зборуваме не сме многу блиску за да има таква коалиција, но најважно од се е кога победува ДУИ победуваат граѓаните, а веќе се знае дека ДУИ сигурно ги победува наредните парламентарни избори“, рече Бектеши денес по одбележувањето на Светскиот ден на потрошувачите.
Освен лидерот Ахмети, кој е авторизиран за преговори со политичките партии, Бектеши вели дека во нивната партија има целосна мобилизација на членството за претстојните избори.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Пиротехниката во затворен простор ќе се најде пред пратениците, се менува Законот

Пратеничката група на ВМРО-ДПМНЕ по скратена постапка го менува Законот за јавен ред и мир, со што се става ред за употреба на пиротехнички средства во затворен простор. Ова го соопшти пратеникот од ВМРО-ДПМНЕ, Тони Јаревски.
Говорејќи пред новинарите, Јаревски рече дека неделава биле посветени на изнаоѓање на решенија кои во иднина нема да дозволат да се случат нови трагедии или хаварии.
„По скратена постапка го менуваме законот за јавен ред и мир, кој ќе создаде нови механизми за воведување ред, заштита и поголема безбедност за секого. Предлог законот го стеснува обрачот околу оние кои создаваат ризици преку злоупотреба и незаконско користење на пиротехнички средства, особено во затворен простор. Се заострува регулацијата за приредување огномет, факелијада и слични приредби на кои се користат експлозивни материи“, рече Јаревски.
Тоа ќе значи и заострување на казните за поединци и фирми кои ќе ги прекршат одредбите од овој закон. Дел од казните се двојно повисоки, а за некои, законот предвидува и притвор.
Преку ова законско решение ќе се прошири и надлежноста на полицијата – механизам преку кој ќе овозможат поголема контрола при користење на експлозиви, како и побрзо и поефикасно спроведување на овој закон.
Тој најави дека во периодот кој следи, во Собранието ќе се поднесат и други предлози кои се подготвуваа изминативе две недели – период во кој Собранието не заседава по трагедијата во Кочани.
Тој ги повикува колегите пратеници, без разлика на политичката припадност, да го поддржат овој предлог-закон, бидејќи станува збор за суштинска промена која не засега сите. Ја охрабрува и пошироката јавност, активно да се вклучи во дискусијата и да даде свои сугестии.
Во пожарот што го предизвика пиротехниката во Кочани, за време на концертот на ДНК, животот го загубија 59 млади луѓе, а околу 200 се здобија со повреди.
Македонија
(Видео) Петрушевски: Трпе Деановски од УПОЗ со плата од 104.000 денари, додека ги лаже работниците за минималец

Трпе Деановски од УПОЗ со плата од 104.000 денари, додека со Трендафилов ги лажат работниците за минимална плата, вели пратеникот на ВМРО-ДПМНЕ, Бране Петрушевски.
Според информациите кои до нив пристигнале од свиркачи од ССМ, Слободан Трендафилов, Трпе Деановски и другите функционери во ССМ го претвориле овој некогашен голем синдикат во своја приватна банка.
Согласно информациите кои ги има партијата, Трпе Деановски, покрај платата од 104.000 денари, остварува и други приходи, па кога ќе се пресмета на годишно ниво сумата која ја зема по разни основи достига вртоглави суми.
„Информациите говорат дека Деановски лани и првите два месеци од оваа година земал вкупно над 1.8 милиони денари. Да добро слушате, 30 илјади евра за Трпе Деановски, додека вас ве лаже за минимална плата. Колку минимални плати има во годишните примања на Трпе Деановски? – Точно 69. Трпе Деановски за една година земал пари колку работниците кои ги лаже за минимална плата не можат да земат за 6 години. Тоа се синдикалците на батерии на Слободан Трендафилов, насадени на позициите од СДС, дебело платени да извршуваат партиски агенди“, изјави Петрушевски.
Како што рече, народот и работниците ги прочитале синдикалците на батерии како Слободан Трендафилов и Трпе Деановски.
Македонија
Kузеска: Владата да ги поништи тендерите за оценка на медиумите и парите да ги пренамени за Кочани

Додека народот и државата тагуваат поради огромната трагедија во Кочани во која згаснаа 59 млади животи а околу 200 се повредени, Владата на ДПМНЕ турка тендери за мерење рејтинзи и пропаганда, изјави портпаролката на СДСМ, Богданка Кузеска.
Опозициската партија вели дека за поддршката на семејствата и граѓаните во Кочани се организираат донации а владата на ДПМНЕ троши 400.000 евра за анкети и мерење на рејтингот на Мицкоски.
„Тоа не било доволно па гледаме објава на нов тендер за уште еден скап проект – оцена на медиумското влијание, мониторинг на медиумите, на социјалните мрежи, прес клипинг и оценка на вестите. Владата набавува софтвер за да ги оценува вестите на медиумите– дали се позитивни, негативни или неутрални, а планира да собира податоци и за авторите. Тоа ли се приоритетите на власта? Нема пари за плати, нема за пожарникарите, за лекарите, за работниците, пари има само за папаја, манго и рејтингот на Мицкоски“, рече Кузеска.
Според СДСМ, власта манифестира бесчувствителност и расипништво во време кога граѓаните едвај врзуваат крај со крај и се во колективна тага. СДСМ бара итно поништување на тендерот за „софтвер за медиумско влијание“ и тендерот за анкети. Тие пари, заедно со 400.000 евра предвидени за анкети да се дадат за помош на семејствата и граѓаните на Кочани. Сега е време за солидарност и одговорност, велат од партијата, а не за мерење рејтинзи и пропаганда.