Народниот правобранител изминатата година имал полни раце работа за што говори бројката од речиси 4.500 претставки. Граѓаните најмногу се жалеле на работата на судската власт, на партиски вработувања, односно наместени конкурси, несоодветни услови во затворите и домовите за деца без родители, како и незаконско постапување на полициските органи. Во 2018 биле поднесени дури 947 претставки за работата на судовите и оваа бројка е двојно поголема од претходната година, покажуваат анализите на народниот правобранител.

„Долгото траење на постапките е основен проблем за кој се бара заштита, а голем е и бројот на поплаките на граѓаните што изразуваат незадоволство од судските одлуки за кои сметаат дека се донесени пристрасно, селективно и под притисок на политичка мотивираност“, рече заменик-народниот правобранител Васка Бајрамовска при презентирањето на годишниот извештај за работата на оваа институција.

60 отсто бил зголемен и бројот на поднесени барања за повреда на првата од работниот однос. Граѓаните се жалеле за наместени партиски конкурси, несоодветно распределување на работно место поради партиска припадност, како и на непродолжување на договорите за работа.

„Констатиравме дека продолжува праксата на партиски реваншизам по спроведување на изборите, што особено беше видливо во сфетата на образованието и детската заштита при изборот на кандидати за вработување, но и при трансформација на вработените од определено на неопределено време. Ниту констатациите на инспекциските надзори во однос на избраните кандидати не нè убедија дека на објавените конкурси за вработување се избираат лица со најдобри компетенции“, рече Бајрамовска.

Не се подобрени ниту условите во затворите за кои со години алармира народниот правобранител. Нема подобрување ниту во здравствената заштита, ниту во исхраната ниту во хигиенските услови.

„Проблемот со несоодветен стоматолошки третман на лицата во затворот КПД ‘Идризово’ не е решен, нема вработено стоматолог. Нема ниту здравствен и медицински персонал во текот на целиот ден, а со тоа затворените и притворените лица немаат соодветен медицински третман“, вели заменик-народниот правобранител.

Народниот правобранител и во овој извештај посочува на кршење на полициските овластувања, при што информира дека се поднесени и три барања за казнена одговорност на службени лица кои постапиле незаконски, непрофесионално и со своите постапки ги прекршиле слободите и правата на граѓаните.

„Овие случаи за кои е обезбедена соодветна документација како доказ за примена на физичка присилба, заплашување и нанесување повреди на граѓаните од страна на полициски службеници, кои често се придружени и со навреди по етничка или друга основа, остава сомнеж за начинот на кој се спроведува законот. Кога граѓаните укажуваат на прекумерна употреба на сила, тоа не смее да остане неказнето“, вели Бајрамовска.

Повреди на правата има и во областа на социјалната и детската заштита, потрошувачките и имотните права. Народниот правобранител извештајот го достави до Собранието и бара да се согледаат нотираните слабости и да се изнајдат алатки за ефикасни решенија.