Македонија
Денес се одбележува Денот на народното востание

Во земјава денеска се одбележуваат 84 години од почетокот на народното востание кое почна во 1941 година во Прилеп и Куманово. Со ова започна востанието против фашизмот и борбата за ослободување на македонскиот народ.
Празникот годинава ќе биде одбележан со свечена академија во Прилеп и доделување на истоимената награда во Скопје.
Свечената академија под мотото „На вистинската патека, за татковина со иднина“ ќе се одржи во Центарот за култура „Марко Цепенков“ и на неа, според најавата од владината прес-служба, ќе се обрати премиерот Христијан Мицкоски.
Во Скопје, во Собранието ќе бидат доделени годинашните награди „11 Октомври“. Наградата за животно дело во областа на културата и уметноста ќе им биде врачена на актерката Теута Ајдини Легени, хорскиот диригент проф. Летка Димовска и на продуцентот и промотор на македонската уметност Иво Јанкоски. Во областа на науката и образованието годинава наградата ќе му биде врачена на проф. д-р Константин Димитров, машински инженер и на академик Глигор Јовановски, хемичар.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Османи најави мобилна болница и здравствени тимови за подобра превенција на здравјето на граѓаните на Чаир

Кандидатот за градоначалник на Општина Чаир од Националната алијанса за интеграција, Бујар Османи на денешната прес-конференција ги претстави клучните здравствени проекти од неговата изборна програма. Најави нов пристап во локалната здравствена политика.
Османи најави воспоставување на мобилна болница, како караван кој секојдневно ќе биде присутен во различни населени места, каде граѓаните ќе можат бесплатно да направат превентивни здравствени прегледи.
– Секој ден во едно маало ќе има мобилна болница, во која граѓаните доброволно ќе можат да направат превентивни здравствени прегледи. Ова е многу важно, не само за откривање на поединечни случаи, туку и за зголемување на општата свест, рече Османи.
Како дел од вториот столб на здравствената програма најави здравствени тимови составени од лекари и медицински сестри, кои ќе ги посетуваат пензионерите и лицата што живеат сами.
– Повозрасните лица на некој начин се најпогодени во однос на здравјето. За нив ќе подготвиме здравствени тимови од лекари и медицински сестри кои ќе одат и ќе ги посетуваат во нивните домови кога ќе има потреба, истакна Османи.
Тој најави и посебни превентивни програми за жените, со фокус на раното откривање на рак на дојка и поддршка на физичкото и менталното здравје.
-Прашањето за жените беше најважниот приоритет во здравствената програма. Општината ќе има посебни проекти за приоретизирање на нивното здравје, рече тој.
Османи потенцираше дека новата визија за здравството во Чаир се темели на превенцијата, а не, како што посочи, на скапи и задоцнети интервенции. Тој нагласи дека сегашната состојба во Чаир е загрижувачка.
-Триесет отсто од децата во Чаир имаат повеќе хронични заболувања на белите дробови поради нечистотијата, поради правот на нашите улици. Полициските извештаи покажуваат дека четири лица дневно во Чаир завршуваат на операциона маса, поради урбаниот хаос и сообраќајните несреќи, рече Османи.
Османи денеска присуствуваше на настанот „Здравје за сите во нашата општина“, заедничка иницијатива на Секретаријатот за здравство и Младинскиот форум на Националната алијанса за интеграција што се одржа во Старата Чаршија.
Македонија
СДСМ: По наркоскандалот на директорот на Неврологија мора кривична одговорност и темелна истрага

По скандалот со директорот на Клиниката за неврологија, кој беше снимен како консумира дрога, од СДСМ реагираат дека повлекувањето од функцијата не е доволно и бараат целосна кривична и институционална одговорност.
„Ова е мега скандал на власта и мора да има кривична одговорност и темелна истрага на целокупната негова работа, бидејќи се работи за здравството и за здравјето на луѓето,“ изјави Елена Радеска од Комисијата за здравство на СДСМ.
Според Радеска, доколку лице што управува со здравствена установа користело дрога, се отвора сериозно прашање како тоа влијаело врз неговите одлуки како директор, врз здравјето на пациентите и врз безбедноста и функционирањето на клиниката.
„Сите надлежни институции мора веднаш да го повикаат на распит и да го преиспитаат целото негово работење – сите тендери, одлуки, финансиски трансакции и кадровски именувања во периодот кога тој раководел со клиниката,“ додаде таа, потсетувајќи дека и Државната ревизија констатирала неправилности во клиничките испитувања и процедурите.
Од СДСМ бараат и Министерството за здравство да побара од Лекарската комора да му биде одземена лиценцата за работа сè додека трае истрагата.
„Не може човек што се дрогира да се занимава со здравјето на луѓето или со медицина,“ нагласи Радеска.
СДСМ оценува дека случајот е показател за хаосот во здравството под власта на ВМРО-ДПМНЕ.
„Нема лекови, нема операции, луѓето не можат да добијат здравствена услуга, а директорите на ДПМНЕ се дрогираат. Срамно и тажно во исто време,“ стои во реакцијата на партијата.
Од таму додаваат дека е фрапирачко молкот на лидерот на ВМРО-ДПМНЕ, Христијан Мицкоски, за овој случај.
„Додека неговите директори се фатени со дрога, Мицкоски не може да зборува за морал ниту за вредности,“ порача Радеска.
Македонија
И Обвинителството се вклучи во постапката за пронаоѓање на маскираните разбојници кои ограбија златара

Обвинителството денеска информира дека во текот на ноќта и утринава од Основното јавно обвинителство од Гостивар се издадени повеќе наредби со цел откривање на сторителите кои вчера извршија грабеж во златара во близина на малиот пазар во Гостивар.
Разбојништвото се случи вчера попладне, а случајот беше пријавен во полиција во 18:45 часот.
Четворицата максирани лица со автоматско оружје го извршиле разбојништвото по што побегнале со БМВ без регистарски таблички.