Со почеток од утре, 17 мај, па во наредните три месеци, скопјани ќе имаат можност бесплатно да вежбаат и да се рекреираат на отворено со тим од стручни лица од Факултетот за физичко образование, спорт и здравје. Секој работен ден, по 18 часот, на различни локации на јавните површини и парковите во Скопје ќе се вежба аеробик, фитнес, пилатес, зумба, спортска јога и атлетика. Проектот „Скопје вежба“ кој има цел да им помогне на граѓаните да го подобрат своето здравје и да ја одржат физичката форма го спроведува Град Скопје во соработка со Факултетот за физичко образование, спорт и здравје, најави градоначалникот Петре Шилегов.

„Градот Скопје преку професионални тренери ќе им овозможи на граѓаните на Скопје бесплатна физичка активност во текот на попладневните часови, од понеделник до петок. Нашата цел е кај помладите генерации да всадиме навики за физичка активност, а кај постарите генерации да стимулираме еден поинаков и поздрав начин на живеење. Сакам да се заблагодарам на Факултетот за оваа заедничка акција со која ќе овозможиме на Скопје и на скопјани еден поинаков пристап кон физичката култура. Се надевам дека на крајот на јули кога ќе заврши оваа активност ќе може со задоволство да ги констатираме позитивните бројки на граѓани кои ја искористиле оваа можност“, рече Шилегов.

Деканот на Факултетот за физичко образование, спорт и здравје, Ленче Алексовска – Величковска изрази задоволство што Градот Скопје препозна партнер во нивната институција која постои 40 години.

„Ќе изведуваме физичка активност во оваа пандемија која за жал се уште трае. Ќе ги почитуваме сите препораки на Министерството за здравство и Комисијата за заразни болести. Првичната цел е да ја подигнеме свеста за физичката активност кај сите категории – и деца и адолесценти и возрасни. Тука зад мене се сите универзитетски професори, експерти кои што ќе бидат вклучени, зашто не е само да се вежба, туку треба да се одговори на многу прашања – колку да се вежба и како да се вежба за да се сочува и менталното и физичкото здравје“, објасни Величковска.

За дневниот распоред на вежби во текот на месеците мај, јуни и јули граѓаните ќе можат да се информираат на Интернет страницата на Град Скопје www.skopje.gov.mk, како и преку социјалните мрежи на Град Скопје. За вежбање се предвидени 6 локации -две локации во Градскиот парк, паркот кај„Три Бисери“ во Аеродром, паркот во Ѓорче Петров, кај Веро Тафталиџе во Карпош и паркот во Чаир.

Градот Скопје финансиски го поддржува овој спортско рекреативен и забавен проект со 500.000 денари.

Заврши првата фаза од реконструкцијата на една од главните сообраќајни артерии во Центар и во Скопје, улицата „Орце Николов“, информираат од оваа скопска општина.

Градоначалникот на Центар, Саша Богдановиќ, заедно со градоначалникот на Скопје, Петре Шилегов и премиерот, Зоран Заев, денеска извршија увид на градежните работи на улицата.

„Неубавите слики кои што ги гледавме каде лица со посебни потреби со инвалидски колички се движеа по коловозот и мајки со деца во колички поминуваа само кога нема возила по улицата, полека, но сигурно стануваат минато. Благодарение на градот Скопје се донесе нов сообраќаен режим каде целосно се измени концептот и на динамичниот и на стационарниот сообраќај. Претходната власт на градот Скопје инвестираа само во десеттина канти боја и неколку знаци, а од ‘Орце Николов’, наплаќаа огромни средства без да помислат за безбедноста на пешаците и велосипедистите а уште помалку на паркинг места за станарите“, изјави градоначалникот Богдановиќ.

Сопред општинските власти, целта на реконструкцијата е да се зголеми безбедноста на улицата „Орце Николов“ преку воведување на физички мерки за смирување на сообраќајот, а со самото тоа да се намали бројот на сообраќајни незгоди на овој потег.

Со реконструкцијата ќе се даде поголем приоритет на пешаците, со тоа што ќе се стимулираат пешачките токови и ќе се зголеми безбедноста при нивното движење по цела должина на улицата.

„По целосната реконструкција на улицата, целосно ги ослободуваме коловозот и тротоарите од паркирани возила и со тоа на жителите на овој дел од градот им создаваме услови за олеснето движење по пешачките површини и велопатеките, што ќе доведе до општо намалување на сообраќајниот метеж на оваа улица“, рече градоначалникот Шилегов.

Тој посочи дека со новиот проект, ќе се стесни коловозниот дел на улицата, со задржување на двете ленти за возила и ќе се изведе нов кружен тек.

Со реконструкцијата ќе се воведат велосипедски ленти кои ќе овозможат поврзување на велосипедистите и корисниците на алтернативни средства за транспорт, со останатите велосипедски патеки кои веќе постојат или се предвидени согласно Планот за развој на велосипедски патеки на Град Скопје.

„Брзината на движење на оваа улица за моторните возила е ограничена на максимални 30 километри на час, а предвидените дополнителни зафати ќе обезбедат уште поголеми можности за безбедност на учесниците во сообраќајот и на пешаците. Тоа е одлика и одраз на најдобрите искуства од големите метрополи за пријателско опкружување на граѓаните на нивното урбано секојдневие“, додаде премиерот Заев, потенцирајќи ја потребата од уште вакви зафати во сите општини во државата.

Целосната реконструкција на улицата ќе биде поделена во шест посебни фази, од кои секоја ќе опфаќа посебен дел од „Орце Николов“. Реконструкцијата на улицата ќе го опфати целиот потег кој е под надлежност на Општина Центар, од раскрсницата со булеварот „Св. Климент Охридски“ до раскрсницата со улицата „Франклин Рузвелт“.

Реконструкцијата на „Орце Николов“ ќе опфати површина од вкупно 7.182 метри квадратни и се очекува да биде готова во јули.

Целиот зафат ќе чини 64.847.608 денари, средства обезбедени од Буџетот на Општина Центар.

Министерството за внатрешни работи ги известува граѓаните дека утре, недела (16. мај), поради одржување на спортско-рекреативната трка „Прв до врв“, сообраќајната полиција ќе преземе мерки за посебен режим на сообраќајот во Скопје.

Притоа, предвидената траса на движење на велосипедската трка, која започнува во 09.45 часот, е: пред Музеј на град Скопје – ул. „Св. Кирил и Методиј“, лево по бул. „Св. Климент Охридски“, во продолжение по бул. „Мајка Тереза“, лево по ул. „Тодор Александров“, во продолжение по локален пат за Средно Водно до врв на Водно („Милениумски крст“), а трасата на движење на планинарите почнува од пред О.У. „Кочо Рацин“, на бул. „Мајка Тереза“, право по ул. „Тодор Александров“ и кај ул. „Салвадор Аљенде“ десно, по планински патеки кон Средно Водно, од Средно Водно кон врв на Водно („Милениумски крст“).

Од тие причини, во наведениот период, сообраќајот ќе се пренасочува по околните сообраќајници.

МВР апелира до граѓаните да ги почитуваат наредбите што ги издаваат полициските службеници по сообраќајниците по кои ќе се одвива настанот.