Македонија
Денот на независноста на Република Северна Македонија го дочекуваме во напредна држава, вели Ковачевски

Претседателот на Владата на Република Северна Македонија, Димитар Ковачевски, се обрати и со видео порака, во чест на денешниот голем државен празник 8 Септември, со којашто на сите граѓани во државата го честита Денот на независноста на Републиката.
„Денешниот 8 Септември, денот на независноста на Република Северна Македонија го дочекуваме во напредна држава, членка на НАТО и држава со реални перспективи за членство во Европската Унија до 2030 година. На овој датум, пред 32 години, огромно мнозинство од граѓаните се изјаснија дека сакаат да живеат во независна, самостојна, суверена и прогресивна држава. Генерациите од 1991-та година, ги водеше гласот за слобода, државност и интеграција, што одекнува од Илинден 903-та и АСНОМ 44-та година. И тие одговорија со граѓанска и политичка одговорност кон аманетот и перспективите“, рече Ковачевски.
Како што вели, 32 години по прогласената независност на нашата Република, Гласникот на слободата, 8 Септември, денес бара слух од сите нас, за континуиран развој.
„Денешниот 8 Септември повикува на слободно одлучување како демократска должност, за подобар живот на сегашните и идните генерации. Со разумни и храбри одлуки нашата држава дојде до независност по мирен пат и притоа ја сочува унитарноста. Воведовме своја државна валута. Знаме. Химна. Станавме членка на Обединетите нации. Надминавме воен кофликт. Станавме членка на НАТО. Отпочнавме преговори со Европската Унија. Денес живееме во држава со осигурани територијални граници. Со признаен македонски јазик и македонски идентитет. Држава којашто е пример за почитување на човековите права, како успешна, мултиетничка и мултикултурна функционална демократија. Европа во мало“, додаде Ковачевски и додаде:
„Ако некогаш било вистинското време: да го обезбедиме животниот стандард што го посакуваме, квалитетот на живот што го заслужуваат нашите млади, да живееме во земја во којашто владее функционално право, во еколошки чиста, зелена средина, енергетски независна држава, со конкуретно земјоделство, со шанси за пристап до европскиот пазар од половина милијарда луѓе – тоа е денес. Интеграцијата во ЕУ за нас дома значи уште погoлeми плати, нови работни места и поголем избор, повеќе современи градинки, училишта и болници, многу поголема државна поддршка за домашните претпријатија, уште повеќе странски инвестиции. Граѓаните денес сакаат да живеат во ваква, современа држава, којашто е дел од Европската Унија. Почитувани граѓани – нека ни е честит и вековит 8 Септември – Гласник на слободата!” истакна Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче ја следи политиката на Заев, кој со една рака на срце се колнеше во македонска жичка, додека со другата ја распродаваше, велат од ВМРО-ДПМНЕ

Венко Филипче се гордее со неговиот претходник, Зоран Заев и учи од него. Тој призна дека не сака да се одвои од неговата сенка и дека и народот треба да учи од неговото искуство и политики спроведени во минатото, велат од ВМРО-ДПМНЕ.
„Неговите политики спроведени во минатото од Заев, покрај криминал и корупција се предавството на националните интереси. Зоран Заев е човек кој со едната рака на срце се колнеше во македонската жица и тврдеше дека си ја сака земјата, додека со другата ја распродаваше. Откако со Бугарија влезе во процес на преговори и без око да му трепне, Заев прифати се што Бугарите од него побараа. Сега, таа попустлива политика на Зоран Заев спрема Бугарија, до најмал милиметар ја следи и неговиот наследник во СДС, Венко Филипче. Наместо државничка политика за заштита на националните интереси, Филипче инсистира на попустлива и политика на предавство на националните интереси“, според партијата на власт.
Од оваа партија оценуваат дека политиката на Филипче и СДС е предавничка.
„Пред некој ден потврди и Бујар Османи, кој призна дека со дозвола на СДС, со Бугарија преговарал за етнички прашања.
Со вакви погубни и предавнички политики и послушнички и поданички однос кон Заев, не е ни чудно што на последните анкети на јавното мислење, половина од граѓаните Филипче не го препознаваат за лидер на опозицијата“, додаваат од ВМРО-ДПМНЕ.
Со неговите потези, како што велат, Филипче само потврдува дека СДС продолжува да биде синоним за неспособност, криминал и предавства.
Македонија
„Како Тошковски и МВР штитат роднини на партиски функционери од ДПМНЕ“, СДСМ најави нов скандал

СДСМ извести дека денеска ќе објави нов скандал, поткрепен, како што велат и со видео докази, „како Панче Тошковски и МВР штитат роднини на партиски функционери од ДПМНЕ“.
„Брат да ми е ќе одговара? Дали е ова точно што го кажува Панче Тошковски или уште една голема лага? Дали роднините на партиските функционери од ДПМНЕ праваш што сакаат и никој не ги казнува“, прашуваат од СДСМ и додаваат дека за денеска за 11.30 часот е закажана прес-конференција, во седиштето на партијата.
Македонија
„Месец дена од трагедијата во Кочани – Владата без никаков реформски закон“, велат од партијата Левица

„Иако измина повеќе од месец дена од ужасната трагедија во Кочани, на повидок не се никакви системски реформи од страна на владата на Мицкоски, иако тоа беше помпезно најавувано! Освен измени на законските одредби за употреба на пиротехника во затворен простор, безидејната влада нема иницирано никакви законски измени за отстранување на сите системски аномалии, поради кои дојде до трагичниот пожар во дискотеката Пулс“, велат од партијата Левица.
„Иако премиерот Мицкоски најавуваше законски измени за заострување на условите за добивање лиценца, до Собранието не е поднесено никаков предлог-закон. Токму Мицкоски тврдеше дека со измени од 2007 година на Законот за угостителска дејност, Пазарниот инспекторат не бил законски обврзан да ја провери веродсотојноста на лиценците.Премиерот уште на 18 март најави дека е формирана работна група за да ги подготви измените на Законот за угостителска дејност, но поради инертноста на Владата, дискотеките и понатаму функционираат според старите и лоши законски решенија.
Понатаму, нема никаква најава за реформа на безбедносниот систем и функционирањето на Дирекцијата за заштита и спасување (ДЗС) и Центарот за управување со кризи (ЦУК), чија нефункционалност излезе на површина после трагедијата во Кочани. Уште пред 3 месеци Тошковски најавуваше измени на 19 системски закони, но и после трагедијата во Кочани, никакви законски измени за подобрување на безбедносниот систем не се доставени до Собранието.
Ја потсетуваме јавноста дека владејачкото мнозинство одби да гласа за кривична одговорност на судиите, ставајќи се во заштита на корумпираниот правосуден систем поради кои Македонија е обвиена во трагедии. Додека власта на ДПМНЕ е окупирана со јавен линч и демонизирања на секој што ќе изнесе критика против нејзиното работење, Левица поднесува измени на Кривичниот законик за воведување незастарливост на кривични дела сторени од службени лица. Бидејќи владата предводена од Мицкоски е безидејна и нема политичка волја да иницира системски реформи на законите, ги повикуваме да ги поддржат измените на Кривичниот законик кои ги предлага Левица, наместо да ги штитат криминалите на своите функционери на кои им застареа делата“, се наведува во соопштението на партијата Левица.