Македонија
Депониите и сиромаштијата заеднички именител за отровниот воздух во најзагадените градови

Горење гуми, пластика и други неразградливи и опасни материи, стари возила и диви депонии, на кои се спалува разновиден опасен отпад, се примарни заеднички именители на Скопје, Лахор во Пакистан, Вухан во Кина, Делхи во Индија и на Приштина, градовите што минатава недела се водечките пет во загаден воздух во целиот свет.
Демографските и географските разлики не може да бидат докрај споредени бидејќи ги немаат истите карактеристики ако се земе предвид дека станува збор за градови со милионски жители наспроти македонската метропола, но, сепак, преголемата густина на населението и градежната џунгла се заеднички за сите.
Анализата на „Макфакс“ покажува дека заеднички причинители за загадувањето во овие градови се чадот што се крева од горењето сè и сешто за затоплување на домовите што немаат пари за посоодветно и еколошко затоплување. Но, светските еколошки организации посочуваат дека ниската свест на населението и несовесното раководење со отпадот од надлежните институции во државите се исто така голем причинител за загадувањето. Дивите депонии во кои неселективно и несоодветно се гори секаков отад имаат најпоразително влијание врз квалитетот на воздухот.
Но, ако се земат предвид разликите во размерите на населението во градовите во Кина и Индија, потоа животните навики, доминантните индустрии, Скопје и Приштина ни одблиску не се доближуваат до овие бројки, а сепак се меѓу петте најзагадени градови во светот. Ова ги отвора сомнежите дека во овие два града во Европа, сепак, се случува и нешто друго.
Поразителните факти од анализата на „Транспаренси интернешнл“, која беше објавена вчера, вели дека Македонија, Косово и Албанија имаат највисока стапка на корупција меѓу земјите во Западен Балкан. Доколку во овие земји цвета корупцијата, тогаш се отвора прашањето кој замижува и пред раководењето со опасниот отпад што се собира и во земјата, а и колку од него нелегално влегува од трети земји.

Вухан, Кина
Иако надлежните институции, како Државниот инспекторат за животна средина, Институтот за јавно здравје, Министерството за животна средина и просторно планирање и градските татковци, секогаш даваат протоколарни одговори во кои не се чувствува некоја особена загриженост, сепак активистите и оние што подолго време ја истражуваат оваа проблематика имаат став дека некој му прогледува низ прсти на отровот за да стигне до нас.
Како што пишуваше „Макфакс“, единствената печка во „Дрисла“ нема доволно капацитет да го спали медицинскиот отпад и речиси 500 тони од ова високоризично ѓубре не е јасно каде завршува.

Лахор, Пакистан
Во земјата има 54 активни и контролирани општински депонии, поделени на депонии со висок, среден и низок ризик, како и 270 неконтролирани депонии во Скопскиот Регион со речиси 5.512 кубни метри отпад, говорат податоците на МВР.
Црниот чад се шири и од оџаците на малите погони, а тие не може да бидат санкционирани затоа што во 2010 година Министерството за животна средина донело правилник за граничните вредности на емисиите во воздухот, но за печките со мал капацитет не предвиделе гранични вредности.
За промена на овој правилник, потребни се најмалку 60 дена за сите процедури. Јавноста е загрижена и секојдневно прави притисок на социјалните мрежи, а се чини дека никој нема слух за итни мерки, кои значително ќе ја подобрат состојбата. Секојдневно се истражуваат и се детектираат загадувачите, но казни и радикални чекори засега не се преземаат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ангелов: До 13:30 часот се евидентирани 16 пожари на отворен простор

До 13:30 часот на 27 јули 2025 година, на територијата на државата се евидентирани вкупно 16 пожари на отворен простор, од кои осум се активни, шест се ставени под контрола и два се целосно изгаснати.
Како што информира директорот на Дирекцијата за заштита и спасување Стојанче Ангелов најтежок е пожарот на Планината Готен.
-Најсериозен и најкомплексен пожар со кој се соочуваме моментално е оној на планината Готен, која се наоѓа помеѓу општините Радовиш, Василево и Берово, изјави тој на прес-конференција.
Рече дека од страна на Радовиш, пожарот има развиен голем крак, кој од утрово е видлив и од патот Струмица–Радовиш, предизвикувајќи загриженост кај локалното население.
Додаде дека пожарот се шири во насока на населени места, а во текот на денешниот ден се очекува потенцијално приближување до селото Јаргулица, во зависност од насоката на ветрот.
Ангажирани се два хеликоптери на МВР: тип Bell 412 и Bell 212, и тие се активни од раните утрински часови до попладне.
Седум Пинцгауери на Дирекцијата за заштита и спасување, три „Хирмелини“ и 2 БТР-и, со планирано засилување во текот на денот, 50 припадници на Армијата се на терен од утрово. Има и пожарникарски единици од Радовиш, делумно од Струмица и околните општини како и Доброволци од селата, организирани ловци и месно население, чија примарна задача е одбрана на селата и имотите, во случај на проширување на пожарот.
Ангелов оцени дека сите сили и ресурси се ангажирани во борбата со огнот на планината Готен, кој моментално е најактивниот и најризичен пожар во државата. Истакна дела подготвени се дополнителни единици и средства за евентуално пресретнување на пожарот во насока на населени места.
-Со оглед на неповолните временски услови, и ограничената веројатност за врнежи, состојбата и понатаму се смета за критична и бара максимална мобилизација. Во моментов, на територијата на државата се води широка и интензивна борба со активни пожари на повеќе локации. Ангажирани се сите расположливи сили – пожарникари, припадници на Армијата, хеликоптери, теренски возила, доброволци – сите вложуваат натчовечки напори. Свесни сме дека за многу граѓани ова е ново, а за некои – за жал – веќе видено, но одамна заборавено искуство. Разбираме дека чувството на несигурност, страв и загриженост се сосема природни, особено кога огнот се приближува до домовите, изјави Ангелов.
Но, во овие моменти, додаде, најважно е сите заеднички, со трпение и разбирање, да се справиме со предизвикот.
Апелира до сите граѓани да се придржуваат кон упатствата на службите на терен, да не создаваат непотребна паника или притисок, да покажат трпение, дисциплина и доверба во надлежните и каде што можат и е безбедно – да помогнат или се приклучат на доброволни тимови.
Соопшти дека како дел од активната борба со пожарите низ државата, и натаму се водат интензивни теренски активности на повеќе критични точки.
Тоа се пожарите на планината Готен (општини Берово, Василево, Радовиш) каде пожарот се заканува да се прошири кон поквалитетна шума, што дополнително ја влошува ситуацијата.
На терен дејствуваат 40 припадници на Армијата, локални пожарникари од Берово, екипи од „Национални шуми“, на лице место се наоѓа заменик-директорот на „Национални шуми“, Кире Михаилов, кој ја координира акцијата, а има и поддршка од градоначалникот на Радовиш.
Во однос на пожарот кај село Косевица (Општина Македонска Каменица) се ангажирани локална противпожарна единица, јавно комунално претпријатие, доброволно противпожарно друштво и околу 30 припадници од месното население.
Засега пожарот е под контрола, но условите остануваат променливи.
Пожарот кај с. Неров (Крива Паланка, близу српската граница) кој избил вчера попладне, во близина на граничната линија активирани се два ертрактори, со по еден налет секој, еден „хермелин“, 20 припадници на Армијата се веќе на терен, а дополнителни 30 припадници се испратени поради влошување на состојбата.
Пожарот меѓу селата Црешево, Локвици и Крапа (Општина Македонски Брод) е активен повеќе од 10 дена, со екстремно тежок терен за гаснење. Досега се употребени ертрактори и хеликоптери, со ограничен ефект.
Ангелов рече дека непристапност на теренот во некои делови го оневозможува делувањето на сили од копно и дека има делумно ангажирање на локални пожарникари и вработени од „Национални шуми“
Ангелов истакна дека поради влошената и исклучително сериозна состојба со шумските пожари на територијата на државата, денеска бил активиран и Механизмот за цивилна заштита на Европската Унија.
-Оваа постапка е превентивна, со цел да испитаме дали постои можност некоја од државите-членки на ЕУ да ни понуди поддршка, особено во воздухопловни капацитети, бидејќи сили на терен (од земја) засега има доволно, истакна тој.
Меѓутоа, нагласи дела сите сили се веќе силно ангажирани и физички истрошени. Пожарите траат со денови, и секојдневната борба со огнот бара огромна физичка и психолошка сила. Возачите на специјалните возила, пожарникарите, припадниците на Армијата и сите доброволци се веќе на работ на издржливост, но продолжуваат со максимална пожртвуваност, за што заслужуваат целосна благодарност од целото општество.
Македонија
Хеликоптерска акција во Штип: Полициски службеници спасија повреден војник од борбата со пожарот

Во време кога летните горештини го зголемуваат ризикот од пожари, а бројот на активни огнени жаришта се зголемува ширум државата, секоја служба на терен има своја задача. Но, кога станува збор за спасување човечки живот, сите се еднакви – и тоа денеска уште еднаш се покажа на дело.
Полициски службеници со хеликоптерот „Агуста Бел 212“ на Министерството за внатрешни работи (МВР), денеска извеле драматично спасување на повредено лице на фронтот на пожарот.
– Во исклучително тешки услови беше извршено спасување на С.Н. од македонската Армија, припадник на Првата пешадиска бригада од Штип, кој несебично се бореше со огнената стихија. Полициските службеници уште еднаш ја покажаа својата хуманост и одговорност – порачаа од МВР.
Од Министерството информираат дека активностите на полициските хеликоптери продолжуваат и понатаму и ќе траат се додека пожарите на територијата на целата држава не бидат целосно изгаснати.
Овој чин потсетува дека борбата со пожарите бара координирано и солидарно делување на сите институции – и дека хуманоста и пожртвуваноста се клучни во заштитата на човечките животи и природата.
Македонија
На првиот состанок на Балканската платформа за мир во Истанбул учествуваше Муцунски

На покана на министерот за надворешни работи на Турција, Хакан Фидан, министерот за надворешни работи и надворешна трговија, Тимчо Муцунски, вчера во Истанбул учествуваше на првиот состанок на Балканската платформа за мир. Настанот се одржа на иницијатива на турскиот министер Фидан, со учество на министрите за надворешни работи од земјите од Западен Балкан.
Како што се наведува во соопштението од Министерството за надворешни работи и надворешна трговија, на состанокот се разговарало за европската интеграција, регионалната поврзаност, младите, образованието, одбранбената индустрија и други актуелни регионални прашања. Учесниците се согласиле дека платформата треба да продолжи и на лидерско ниво.
Во своето обраќање, министерот Муцунски ја истакнал определбата на државата за конструктивна регионална соработка како двигател на економскиот развој. Тој укажал на сериозните предизвици со кои се соочува регионот – ниска конкурентност на економиите, недоволна енергетска и инфраструктурна поврзаност и иселување на младите. Муцунски го посочил и отсуството на предвидлив и динамичен европски пат, потенцирајќи ја потребата од поголема одлучност и лидерство во процесот на интеграција на регионот во ЕУ, особено во актуелниот геостратешки контекст.
Како позитивен пример беше посочен Планот за раст за Западен Балкан, со акцент на неговиот потенцијал за носење конкретни придобивки за граѓаните и бизнисите. Муцунски ја истакна и инвестициската посветеност во коридорите 8 и 10, како клучни транспортни и енергетски врски меѓу Јадранското, Егејското и Црното Море, посочуваат од МНРиНТ.
Министерот подвлекол и дека регионот мора да вложува повеќе во човечкиот капитал, конкурентноста, туризмот, културата и образованието како предуслови за одржлив развој и поврзување.
Во обраќањето пред медиумите, министерот Фидан нагласи дека стабилноста на Балканот е приоритет за Турција и дека платформата има за цел решавање на регионалните проблеми преку зголемена соработка, енергетска стабилност и поврзаност.
На маргините на настанот, министерот Муцунски остварил и билатерална средба со својот домаќин, министерот Фидан. Разговорите биле фокусирани на билатералните односи, економската соработка, инвестициските можности и продлабочувањето на соработката во области од заемен интерес.