Приватните специјализанти на Клиниката за детски болести ќе ги добијат платите за декември и за јануари, а за да им бидат исплатени надоместоците од октомври наваму, се чека согласност од Фондот за здравствено осигурување, вели директорката на Клиниката, Стојка Нацева-Фуштиќ. Согласноста за исплата на платите на приватните специјализанти за декември и за јануари директорката Нацева-Фуштиќ објаснува дека ги добиле од Фондот на крајот на јануари.

„Во врска со реакцијата на специјализанти и млади лекари поврзана со исплатата на плати и дежурства, ЈЗУ Универзитетска клиника за детски болести – Скопје ја информира јавноста дека по добиената согласност од ФЗОМ од 26.1.2023 година направени се пресметки за исплата на плати за 12/2022 и 1/2023 и по нив ќе биде постапено во целост. Во однос на исплата на надоместоците за дежурства за 8/22 и 9/22, извршена е исплата, а за 10/2022, 11/2022, 12/2022 и 1/2023 ќе биде извршена исплата по добиена согласност од ФЗОМ“, вели директорката Нацева-Фуштиќ.

Приватните специјализанти на Детската клиника пред два дена алармираа дека се обиделе преку бојкот на работата да изразат револт поради неисплатена плата од декември наваму и неисплатени дежурства од август 2022 година навака, но од управата на болницата добиле закани дека ќе им ги прекинат специјализациите и ќе биде објавен нов конкурс за специјализанти. Се пожалија и дека се во постојан конфликт со административните служби секогаш кога треба да им се префрлат плати.

И нивните исплати зависат од Фондот, кој веќе две недели е под сајбер-напад, поради кој сите јавни здравствени установи се задолжени до понеделник да достават документација за исплата на плати, а здравствените работници исто така до понеделник оставија рок да им бидат исплатени платите. Ако не им се исплатат, најавија генерален штрајк.