Македонија
Дефект на трафостаница на ЕВН, голем дел од Скопје во темница
Половина Скопје вечерва потона во мрак. Жители од различни делови на градот јавуваат дека снемале струја неколку минути пред 18 часот. Нема струја во делови од Центар, Карпош, Тафталиџе и Нерези.
ЕВН утврдило дефект на 110 киловолтна станица од која со струја се напојуваат неколку населби, но најавуваат дека за кусо време ќе биде пуштена струја кај сите кај кои има прекин.
„Веднаш по прекинот наши екипи излегоа на терен и открија дека има чад во 110 киловолтна станица од која со струја се снабдуваат Сарај, Кондово, делови од Влае, делови од Карпош, Тафталиџе во горната зона и делови од Центар. Во моментов се прави итно премостување за напојување на корисниците кај кои има прекин од други места. Струја ќе добијат сите, без разлика што има дефект во трафостаницата“, велат од ЕВН за „Макфакс“.
Вклучувањето на струјата нема да биде едновремено кај сите корисници оти се прави од различни точки, на што веќе работи и диспечерскиот центар и екипи на терен.
Трафостаницата во која има чад ќе остане исклучена, се додека не се открие причината за дефектот.
Од ЕВН велат дека посебно во Сарај и Кондово, кои се снабдуваат со струја од оваа трафостаница, многу често има прекумерна потрошувачка на струја, но причините за овој дефект допрва ќе ги утврдуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Николоски најави дополнителни средства за Брвеница и директен излез на автопат
За општина Брвеница со идниот градоначалник Јовица Илиевски ќе реализираме нови проекти со специјален буџет преку Министерството за транспорт. Исто така донесена е одлука да се изгради нов влез и излез на автопатот. Политиката на национализам ќе доживее пораз и во општина Брвеница, а Јовица Илиевски ќе добие втор мандат за градоначалник, истакна потпретседателот на ВМРО-ДПМНЕ, Александар Николоски, на средбата со граѓани во Брвеница.
„Успешните треба да се наградуваат и затоа во општината инвестираме во повеќе проекти кои целосно ќе го променат ликот и ќе го подобрат животот на жителите“, рече Николоски.
Тој појасни дека улицата „Браќа Јаниќ“ во општина Брвеница е дел од поголем проект што се реализира заедно со Светска банка.
„Тука инвестираме некаде околу 10 милиони денари за целосно уредување на улицата и ова ќе биде една прекрасна улица. Драго ми е што цела една нова населба се развива тука и драго ми е што општина Брвеница расте, луѓе доаѓаат и се доселуваат тука,“ изјави тој.
Николоски додаде дека по насока на Владата и Министерството за транспорт, Јавното претпријатие за државни патишта работи на проект што беше децениско барање на жителите на општината — клучка која ќе ја поврзува Брвеница директно со автопатот.
„Знаете дека сега од едната страна има влез, од другата нема, така што ќе имаме целосно решение кое ќе овозможи директен излез на автопат на сите населени места кои гравитираат кон општината,“ рече Николоски.
Тој му честита на градоначалникот Илиевски што од првиот повик се искористени сите средства, а во рамки на вториот повик, како што рече, обезбедени се околу 60 милиони денари за реализација на десетина нови проекти.
„Се работи за исклучително успешен градоначалник, човек кој целосно ја трансформира општината. Свесен сум дека неговите опоненти заради тоа се нервозни, свесен сум дека има сериозна нервоза кај неговиот противкандидат, затоа што нема што да каже, не може да се пофали ниту со дела, ниту со проекти, ниту нешто оставил позади себе, и затоа оди на национализам. Тој национализам нема да помине и градоначалникот ќе добие втор мандат, а во вториот мандат првиот состанок ќе му биде со мене,“ изјави Николоски.
Тој најави дека Министерството за транспорт има резервирано дополнителни средства и дека за општина Брвеница ќе биде обезбеден специјален буџет. „Готовите проекти што ќе ги донесе градоначалникот ќе бидат финансирани од Министерството за транспорт и ќе бидат реализирани, затоа што успешните треба да се наградуваат,“ порача Николоски.
Македонија
ЗНАМ: Расте поддршката за Мирослав Лабудовиќ во Центар
Во пресрет на изборите, расте поддршката за кандидатот за градоначалник на Општина Центар, Мирослав Лабудовиќ, чија визија за инклузивен, развиен и современ Центар сè повеќе ги обединува различните заедници.
Денес, Лабудовиќ оствари две исклучително важни и конструктивни средби – со претседателот Миљазим Сакипов и Демократската партија на Ромите, како и со претставниците на Движењето за демократија, права и слобода (ДПС). На овие средби беше потврдена взаемната доверба, заедничката визија и определбата за општина што ќе биде пример за еднаквост, достоинство и меѓусебна почит.
„Нашиот Центар е пример за различност што обединува, и токму во таа различност е нашата најголема сила. За мене, тоа не е само политички став, туку лична определба. Верувам во Центар каде што сите – без разлика на вера, нација, возраст или социјален статус – ќе имаат еднакви можности да живеат подобро, да учествуваат во одлуките и да се чувствуваат вреднувани“, изјави Лабудовиќ по средбата.
Тој истакна дека во наредниот период, заедно со овие партнери, ќе работи на реални решенија што ќе го подобрат секојдневието на граѓаните: подобра инфраструктура, повеќе услови за младите, поддршка за образованието и вработувањето, како и вистинска интеграција на сите заедници во општинскиот живот.
„Центар треба повторно да стане место на доверба и заедништво, општина што слуша, почитува и делува – за секој граѓанин, во секое маало. Со оваа поддршка, испраќаме силна порака дека Центар може да биде симбол на современа, хумана и европска општина што ќе ги обедини луѓето околу доброто, а не околу поделбите,“ додаде Лабудовиќ.
Поддршката од ДПС и Демократската партија на Ромите е потврда дека визијата за Центар како дом на сите добива сè поголема сила и општествено признание. Таа е доказ дека заедништвото и почитта се темелите врз кои може да се гради вистинска иднина.
„Центар е наш заеднички дом. Со заедничка работа, љубов и искреност, ќе го направиме место на еднакви можности, достоинство и гордост за сите негови жители,“ порача Лабудовиќ.
Македонија
По шест децении ќе се гради нова амбуланта во Автокоманда
Министерот за здравство, Азир Алиу и градоначалникот на општина Гази Баба, Бобан Стефковски, денеска, во Министерството за здравство потпишаа заеднички договор за изградба на нова амбуланта во населба Автокоманда, што ќе функционира во рамки на Здравствен дом Скопје.
– Новата амбулантата ќе биде изградена на местото на постојниот дотраен и руиниран објект, што бил изграден непосредно по земјотресот во Скопје, во 1963 година. Изградбата на оваа амбуланта е добар пример за соработка меѓу централната и локалната власт, истакна министерот Алиу.
Општина Гази Баба и Министерството за здравство, согласно договорот ќе соработуваат во изготвување на потребната документација за основниот проект за изградба во сите фази и обезбедување проектна документација за што побрзо реализирање на овој заеднички проект.

