Македонија
Димитриеска Кочоска: Целта на кампањата е граѓаните да даваат што повеќе идеи бидејќи тие се локомотивата за развојот општината

Имаме ситуации каде што инфлацијата ни е 19.5% и ние како ВМРО-ДПМНЕ дававме еден куп предлози како да го надминеме тој проблем и како да не бидеме држава која што има, или една од државите која што има највисока инфлација во Европа. За жал сето тоа наидуваше на пречки, нема никаков слух од Владата во рамки нели на прифаќање на некои од овие наши предлози, рече Гордана Димитриеска Кочоска, потпретседател на ВМРО-ДПМНЕ, која денеска е во Виница во рамки на кампањата „Твојата идеја за промени“.
„ Ние се фокусираме на она каде што навистина можеме да помогнеме, а тоа е токму граѓаните во рамки нели на општините каде што имаме наши градоначалници и од таа причина е организирана оваа кампања. Жал ми е што не можеше минатата година да се организира бидејќи на крајот на годината градоначалниците ги преземаа општините. Но, затоа ние она што го ветуваме и го исполнуваме, еве граѓаните и тоа можат да го видат. Го ветивме и годинава го исполнуваме. Голем дел од тие идеи ќе се вклучат и во рамки на самите буџети.
Морам да споменам дека сега и со градоначалникот на општина Виница поразговаравме околу плановите за 2023 година и она што е сработено во 2022 година. И драго ми е што и понатаму во општина Виница приоритет ќе биде реализација на инфраструктурните проекти. Значи и тие и во овој момент работат на реконструкција, асфалтирање на улици во село Градец, Блатец. Во Виница исто така планирани се инфраструктурни проекти односно асфалтирање на улици и за следната 2023 година. Имаме исто така планови и на барање исто така на граѓаните за довршување на дел од водоводна и канализациона мрежа, за најмладите исто така нели игралиште за деца. И она што исто така многу ме радува каде што младите не се изоставени, во буџетот за 2023 година имаме план односно градоначалникот веќе предвидува изградба на една отворена теретана која што нели ќе биде за најголема среќа на млади, но во исто време се надевам дека и многу од повозрасните луѓе со цел да имаат подобро здравје ќе ја користат да кажеме таа отворена теретана“ рече Димитриеска Кочоска.
Таа додаде дека целта на кампањата е што повеќе идеи бидејќи никој подобро не може да ги каже идеите и што му треба на одредено населено место од луѓето кои што живеат таму.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Поединци од СДС потпалуваат за да има политички пожари, а го бранат и Коцевски како последен бастион за нивниот криминал

Христијан Мицкоски, претседател на ВМРО-ДПМНЕ и премиер на вечерашната трибина на тема „Реформи во здравството, ги градиме темелите на промените“ во организација на ВМРО-ДПМНЕ, а која се одржа во Штип се осврна на актуелни теми меѓу кои ситуацијата со пожарите и гласањето недоверба во Собранието за јавниот обвинител Љупчо Коцевски.
„Гледам една нескриена радост и возбуда кај опозицијата од пожарите. Истата таа возбуда ја имаа и кога секојдневно ја злоупотребуваа големата и ужасна трагедија во Кочани. Така брутално, дневно политички и паушално излегуваат на прес-конференции додека стотици граѓани заедно со пожарникарите и полицијата и луѓето од „Македонски шуми“ борба бијат на дневно ниво против пожарите во Македонија и во време кога за жал нашата татковина во одредени делови е во пламен“, рече Мицкоски.
Мицкоски укажа дека „тие наместо да бидат помеѓу народот одбираат со салонски прес-конференции да потпалуваат и да се радуваат на секој пожар“.
За разлика од претходната владата, сега, кажа тој, актуелната за една година ги стави во употреба авионите, леталата, цела флота на БТР возила, хермелини и пинцгауери за гасење на пожари.
„Кога нивни луѓе ќе ги видиме озарени како потпалуваат пожари за да има политички пожари, како живи ќе ги фатиме со огнот во раце за да имаат потоа причина за прес-конференции, тука се е јасно“, кажа Мицкоски.
Коментираше и за гласањето недоверба за јавниот обвинител Коцевски.
„Уште една тема којашто вчера многу јасно, кристално јасно ја видовме во македонското Собрание како постапуваат против интерпелацијата на државниот јавен обвинител. Сами се соголија. СДСМ и ДУИ останаа единствената сламка за спас на кариерата на државниот јавен обвинител затоа што е јасно дека тој им е последниот бастион во одбрана на нивниот криминал во изминатите 7 години, затоа нема ниту еден отворен случај против висок функционер на СДСМ и ДУИ“, посочи Мицкоски.
Според него, „паѓаат во вода сите оние тиради од прес-конференции за оној страшен ужасен случај во Кочани, оние лажни повици, буцкањата каде лажно велеа дека бараме правда“.
„Па тој случај токму го води, токму овој за којшто сега зборував, нивниот државен јавен обвинител и нема потреба да повикуваат јавно, слободно нека си го викнат, нека си се затворат во канцеларија тие малкумина што останаа во раководството на СДСМ и ДУИ и нека си го прашаат Коцевски до каде е. А ние нема да се откажеме од борбата за правда и подобар живот и правда ќе има, и ќе има подобра иднина која сакаме да ја донесеме“, дополни Мицкоски.
Македонија
Андоновска: Во Институтот за јавно здравје секој тргнувал само од личниот интерес

Директорката на Институтот на јавно здравје и член на ИК на ВМРО-ДПМНЕ, Марија Андоновска, во рамки на вечерашната трибина „Реформи во здравството, ги градиме темелите на промените“, истакна дека наследиле распаднати институции каде што воопшто не се размислувало за услугите и грижа за граѓаните. Таа додаде дека конкретно во Институтот, ниту една работа не била водена согласно законските прописи.
„Мораме да ги поставувавме темелите повторно, и нема да се откажеме и сме силно мотивирани да го направиме тоа. Најдовме распаднати институции, каде што воопшто не се размислувало ниту за услугите, ниту за институциите, а најмалку за граѓаните. Секој тргнувал само од личниот интерес, ниту една работа што ја затекнав во Институтот не беше водена согласно законски прописи, се беше спротивно на законот“, нагласи Андоновска.
Андоновска објасни дека со преземањето на Институтот, затекнале опрема којашто била купена скапо, но не се употребувала повеќе години. Таа информираше дека опремата веќе е ставена во употреба, се со цел граѓаните да може да се обратат во државните институции.
„Затекнавме опрема којашто е купена многу скапо и може да биде многу од корист на граѓаните, но е вон употреба повеќе години. Ја ставивме таа опрема во употреба и направивме се за таа да може да профункционира, повторно да можат граѓаните да се обратат во државните институции, наместо да одат само во приватните и да имаат дополнителни трошоци. Воведовме втора смена и сме единствената микробиолошка лабораторија којашто можат граѓаните да ја посетат и после работното време“, заклучува Андоновска.
Македонија
Стабилно снабдување на онкологија и хематологија, за само една година, две промени во позитивната листа на лекови која не беше обновена 10 години, се пофали Клековски

„Не почнавме од нула, туку од минус. 10 години во Македонија не беше обновена позитивната листа на лекови. 10 години од 2014-та година ниедна промена на позитивната листа, за една година ние успеавме да направиме две промени. Во првата промена 9 генерички лекови, во последната 2 онколошки лекови кои од следниот понеделник ќе бидат достапни во аптеките“, истакна членот на ИК на ВМРО-ДПМНЕ и директор на ФЗОМ, Сашо Клековски на денешната трибина во Штип на тема „Реформи во здравството – Ги градиме темелите на промените“.
Клековски додаде дека фокусот бил ставен на лековите.
„Благодарејќи на поддршката на владата одвоивме неверојатни пет милијарди денари за иновативни лекови, тоа е 70% повеќе од 2024-та година или двојно повеќе до 2023-та година. Тоа се многу повеќе пари, една милијарда повеќе за онкологија, повеќе пари за хематологија, педијатрија. Ова не се само пари, ова се животи спасени и олеснети. Стабилно снабдување на онкологија и хематологија, сите пациенти на неврологија со мултипла склероза опфатени. Луѓето на кои им треба хормон раст не чекаат веќе на тоа, и многу такви примери“, вели Клековски.
Тој истакна дека бројот на ин витро што го покрива ФЗОМ наместо 3 сега е зголемено на 6 и исто така процесот за добивање известување за барателите на ин витро е дигитализиран.