Македонија
Димитров во Брисел: Европа да ја согледа важноста и да донесе визионерска одлука

Во рамки на првиот ден од работната посета на Брисел, министерот за надворешни работи, Никола Димитров, за првпат се обрати пред новиот состав на Комитетот за надворешни работи (АФЕТ) на Европскиот парламент, формиран по европските избори одржани во мај 2019 година.
Димитров се заблагодари до претседавачот на Комитетот, Дејвид Мекалистер, за можноста да се обрати пред срцето на европската демократија, како и на другите европратеници за досегашната конзистентна и видлива поддршка за евроинтеграцијата на Северна Македонија.
Притоа министерот направи и кус хронолошки осврт на европскиот пат на земјава досега, на демократската трансформација и созревањето на македонското општество во изминативе неколку години, на предизвиците и многубројните мерки, активности и постигнати резултати при нивното надминување, како и на политичкиот капитал и енергијата вложена при затворање на преостанатите чувствителни отворени прашања со соседите, водени пред сè од желбата на граѓаните за приближување кон европското семејство и вредности.
„Оваа недела дефинитивно за македонските граѓани не претставува само уште еден обичен Совет на ЕУ. Ова е нашиот состанок со историјата, на кој се очекува донесување на долгоочекуваната и, како што е потврдено од многумнина, заслужената историска одлука за почеток на преговори со ЕУ. Историска во смисла на тоа што претставува отворање на вратата за поддршка на процесите за неповратна и одржлива демократска преобразба на земјата. Но и повеќе од тоа. Таквата одлука ќе претставува и вистински сигнал во вистинско време до целиот регион на Западен Балкан и пошироко, потврдувајќи ја вербата на граѓаните во европската идеја и надежта на прогресивните сили во кредибилноста на даденото ветување за европска перспектива на земјите од регионот, согласно индивидуалните заслуги и постигнувања. Длабоко веруваме дека европските лидери во наредните денови ќе ја согледаат важноста на моментот и ќе ја донесат вистинската и визионерска одлука“, рече Димитров.
На самиот крај од дискусијата, европратеникот Дејвид Мекалистер, кој ја модерираше оваа сесија, потенцираше: „…почетокот на преговори сега е добро заслужен. Повикувам на одговорноста на сите земји членки…дека Северна Македонија заврши добра работа.”
По обраќањето на министерот уследи и интерактивна размена со членовите на Комитетот, при што главната порака што провејуваше од страна на европратениците беше во насока дека овој момент неспорно е соодветен за донесување одлука за почеток на преговорите со Република Северна Македонија.
Покрај настапот пред АФЕТ, министерот Димитров имаше и засебни средби со европратеничката Натали Лоазо и со шефот на кабинетот на претседателот на Европскиот совет, Пјотр Серафин. На средбите беа разменети мислења околу очекувањата и изгледите за добивање на одлука за почеток на преговори во пресрет на Советот за општи работи на ЕУ и на Европскиот совет оваа недела.
Во текот на утрешниот ден предвидено е Димитров да учествува на состанокот во Луксембург на министрите од PES групата од земјите членки на ЕУ кои ќе учествуваат на Советот за општи работи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Богојески ја менува постапката за избор на надворешни експерти за оценување на проектите и апликациите за Еразмус+

Националната агенција за европски образовни програми и мобилност го објави почетокот на клучна постапка, а во рамки на заложбите за транспарентност и борба против корупцијата.
Денес, директорот на Националната агенција, Петар Богојески, донесе нова процедура за постапката за избор на надворешни експерти/евалватори за оценување на предлог-проекти и/или периодични и конечни извештаи од одобрени проекти, како и за апликации во рамките на програмите Еразмус+ (2021–2027) и Европски солидарен корпус (2021–2027).
Во таа насока, како што посочуваат од Националната агенција, ќе следува целосна реевалуација на постојните евалватори, согласно највисоките професионални стандарди и етички норми. Потоа, ќе биде објавен нов јавен повик за избор на професионални и департизирани евалватори, експерти од различни области, кои со својата стручност и интегритет ќе придонесат кон натамошно зајакнување на кредибилитетот на Агенцијата.
Со оваа постапка, од Националната агенција велат дека се испраќа јасна порака дека борбата против корупцијата е приоритет и дека се стреми да биде пример за интегритет и професионализам, не само во нашата земја, туку и во земјите членки на Европската унија.
Македонија
Филков : Сите закони, кои се дел од реформската рамка, се подготвени или се во финална фаза на усвојување

Министерот за правда Игор Филков на денешната прес конференција се осврна и на Реформската агенда и законите кои се подготвени или се во финална фаза на усвојување во изминатите 10 месеци.
Подготвени се:
-Предлог Закон за судски совет
-Предлог Закон за јавно обвинителство
– Предлог Закон за платите на јавните обвинители
-Кривичен законик
-Предлог Закон за кривична постапка
-Предлог Законот за судска служба
Во план и подготовка се и:
Предлог Законот за судски буџет
Предлог Законот за Советот на јавни обвинители
Предлог Законот за јавнообвинителска служба
Измени на Изборниот законик, со поддршка на ОДИХР.
Закони со кои се регулираат платите на судиите, јавните обвинители, и јавно обвинителската служба
Закон за слободен пристап до информации од јавен карактер
Закон за помилување
Закон за вештачење
Закон за нотаријат
Закон за извршување
Закон за пробација
Закон за извршување на санкции
Закон за конфискација на имот во граѓанска постапка
Закон за заштита на лични податоци
,,Реформската агенда има рокови до кои законот треба да биде донесен од Собранието. Од друга страна, Годишната програма на Владата опфаќа поранешна фаза — кога законот треба да биде доставен до ЕНЕР или до Владата.
Во просек, собраниската постапка трае два месеца. Кај одредени закони, постојат надворешни фактори.
Изборниот законик, на пример, бара широк политички консензус,”рече министерот за правда Игор Филков.
Министерот порача дека се оди на квалитетни измени и законски решенија во интерес на граѓаните, не како што досега била праксата да се носат во интерес на поединци или какви било интересни групи кои што во минатото ги носеле измените на штета на граѓаните ,на начини на кои што сите ги знаеме.
,,Законите се тука, подготвени, доставени, транспарентно објавени. Ние нема да дозволиме реформите да бидат жртва на дневна политика или бирократска инертност. Затоа ќе повторам: реформите не се желба, туку одговорност. И Министерството за правда таа одговорност ја носи до крај”,потенцира министерот за правда Игор Филков.
Македонија
Палевски вели дека не се пријавил во полицијата во Баликесир оти секако ќе го нашле, се видел на сите вести во пицеријата додека пиел еспресо

Обвинетиот за убиствата на Вања и Панче, Љупчо Палевски, во судот одговараше на прашањата на обвинителите.
Тој беше прашан зошто сам не се пријавил во полиција кога во Баликесир видел дека го бараат со меѓународна потерница. Рече дека пред да биде уапсен го вратил клучот од куќата на сопственикот затоа што сметал дека е јасно оти ќе биде уапсен.
„Без разлика на големината на Баликесир, кога 48 часа сте во градот, не може да знаете каде се судот, Обвинителството и полициската станица. Затоа, реков дека во истиот ден двапати се вратив во пицеријата по што вториот пат бев лишен од слобода на регуларен, нормален начин. Немам приговори на однесувањето на турската полиција, освен една забелешка, која вашиот претпоставен Бубевски ја злоупотреби. Еден од вработените од Интерпол ме извади во ходникот, ме фотографира и фотографијата на ‘Воцап’ му ја испрати на Оливер Спасовски. Подоцна мојот адвокат во Турција ми испрати печатени вести од Македонија, каде што ја видов оваа фотографија. Тоа се ваши класични злоупотреби и на предистрагата и на самата истрага, каде што ги фотографирате осомничените и им ги праќате на медиумите. Немало бегање и не сум променил град на престој по сознанието дека сум осомничен“, рече Палевски.
Потоа обвинителката му рече дека ако сакал, можел и од самата пицерија да се пријави бидејќи бил баран со меѓународна потерница, а прашањето беше насочено кон тоа дали седел без намера да се пријави, Палевски одговори: „И еспресо пиев“.
Додаде и дека не барал полициска станица. На мониторот во пицеријата на сите вести во Турција се гледал себеси.
„Зошто да барам станица кога ќе ме најдат? На 2 декември, Дејан Димовски, оној што вистински ја водел истрагата, а не вие, барал од мојот адвокат Стојков преку телефон да му кажам каде се наоѓам, да му кажам каде сум се движел на 27 ноември. На полицијата ѝ кажав дека сум во Баликесир“, рече Палевски.
Обвинителката Жаклина Јосифовска го праша и каде одел и зошто, иако тврдеше дека го боли грбот и одел во Белград по второ мислење за болеста, со себе немал ниедно ливче од медицинската документација.
„Имав две цедиња во куферот, Обвинителството ми ги украде“, рече Палевски.
Прашан беше и за денот кога беше грабнат и убиен 74-годишниот Панче Жежовски од Велес и за лицето што вели дека го сретнал, но рече дека не може да се сети на неговото име и презиме. Додека ја шетав Хера, рече Палевски, среќавав многу луѓе.
„Кога и како ќе се осмели тоа лице да се појави пред судот, не знам, но за разлика од ЈО, моите тврдења до сега, како и за пиштолот што недостига, се поткрепени со материјални докази“, одговори Палевски.
Прашан дали однапред платил кирија за декември и покрај лошата финансиска состојба на партијата за да си обезбеди алиби, Палевски одговори: Токму тоа што не сум правел алиби како што сум можел, покажува нешто друго, а не да грабнуваш и да убиваш. Дополнително, слушнавте дека обвинетите рекоа оти се плашеле од мене, тогаш зошто би убивал кога сум можел само да им наредам да го направат тоа.