Македонија
Димитров во „офанзива на шарм“ во Грција

Шефот на дипломатијата, Никола Димитров, ги почна активностите во Атина и, според најавите, рано претпладнево се среќава со грчкиот шеф на дипломатијата, Никос Коѕиас, по што ќе следи изјава.
Пред да стигне во Атина, тој даде интервју за телевизија „Скај“ во кое рече дека не е во Грција за да ја притиска тамошната влада за отстапки туку за да бара поддршка бидејќи Македонија ја посакува Грција како нејзин најголем сојузник за НАТО и ЕУ.
Стратегијата на Димитров во Атина странските медиуми ја нарекоа „офанзива на шарм“, иако непосредно пред неговото доаѓање Коѕиас порача дека нема прием во алијансата без решен спор за името на Македонија.
„Не сум тука за да извршам притисок, тука сум за да побарам помош, поддршка и разбирање. Би сакал Грција да биде нашиот најголем сојузник бидејќи ние сме соседи, ќе бидеме тука, ќе делиме граница, се надеваме еден ден, ако имаме заедничка европска иднина, да нема веќе граници. Затоа би сакал Грција да стане наш сојузник и би сакал да ги уверам народот, премиерот, владата дека навистина можеме да бидеме пријатели“, истакна Димитров за „Скај“.
Според него, двете држави треба да ја остават историјата на историчарите и да работат кон подобрување на сегашноста и иднината, со оценка дека не е мудра политика да се градат билатерални односи врз стари историски теми. Истакна дека ако двете страни направат добри заеднички чекори, иднината може да им се насмевне на двете држави. Доследно на тоа, тој посочи дека новата влада не се согласува со изградените споменици од претходната власт и дека не сака младите генерации во Македонија да растат со идејата дека Грција е непријател.
Тој не сакаше да ги соопшти ставовите околу спорот за името со кои ќе настапи пред грчката влада, но го повтори предлогот Македонија да се зачлени во НАТО и да почне преговори со ЕУ под привремената референца бидејќи е неопходно државата побрзо да се интегрира во овие институции. Посочи дека поставување рокови до кога би се решило името е тешка работа, но дека постојат конкретни идеи и предлози кои ќе бидат презентирани пред грчката страна за поодбрување на билатералните односи. Клучно за Димитров сега е да се воспостави доверба и поголема соработка меѓу двете држави.
„Треба да воспоставиме добар, достоинствен и пријателски однос и да инвестираме во него. Секако, практичните инвестиции се корисни и не говорам за решавање на големото прашање. И тоа треба да го направиме, за да се воспостават добри врски, не само лични , туку и меѓу двете држави. Мислам дека вреди да размислиме и да инвестираме во тој однос“, изјави Димитров.
Освен средбата со Коѕиас, Димитров попладнето ќе биде примен и од грчкиот претседател Прокопис Павлопулос, а предвидена е и средба со Јоргос Кумуцакос, кој е одговорен за надворешна политика во опозициската Нова демократија. Кумуцакос беше портпаролот на Дора Бакојани во Букурешт кога Грција ѝ стави вето на Македонија за приемот во алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тошковски – Поклукар: Одлична соработка на полето на безбедноста, Словенија ја дава својата поддршка во секој чекор

Денеска во Охрид, министерот за внатрешни работи Панче Тошковски, оствари работна средба со делегација на Министерството за внатрешни работи на Словенија, предводена од министерот Боштјан Поклукар.
На средбата фокусот беше ставен на унапредувањето на меѓусебната соработка и продлабочување на одличните пријателските врски меѓу двете министерства и полиции во борбата против организираниот криминал, ситуацијата со илегалната миграција, внатрешната контрола и соработката помеѓу центрите за обука на полициските службеници. Македонската делегација на средбата предложи потпишување на Меморандум за разбирање помеѓу Центарот за обука на МВР и словенечката полициска академија за зајакнување на соработката во областа на образованието и заедничките обуки на кадетите и полициските службеници од двете полиции.
Тошковски се заблагодари на министерот Поклукар за целата поддршка што Словенија и словенечкото министерство за внатрешни работи постојано ни ја даваат како министерство и држава, како во справување со пожарите минатата и оваа година така и целата поддршка што ни ја дадоа во справување со последиците од трагедијата која се случи во Кочани оваа година.
„Република Словенија и нивното министерство се едни од клучните партнери и поддржувачи во реформите кои ги правиме, преку користење на нивното знаење и искуство, како за новите закони за полиција и внатрешни работи. Отпочнуваме соработка и во нашата иницијатива за отворање на Регионална асоцијација на полициски академии, обуки за полициските службеници со цел професионализација, доедукација со цел креирање на ефикасна европска полиција“, образложи Тошковски.
ТПотенцираше дека преку министерот Поклукар, пријателската Словенија уште еднаш ја потврдува својата поддршка како еден од нашите најголеми поддржувачи во процесот на евроинтеграции, со тоа што се вложи со целиот негов тим да бидат на располагање на македонските полициски службеници и МВР во однос на исполнување на сите услови и критериуми зададени од Европската унија.
Словенечкиот министер за внатрешни работи Боштјан Поклукар го потенцираше пријателството и соработката што меѓу нашите народи и држави се пренесува и на министерствата за внатрешни работи и потенцираше дека и во иднина можеме да сметаме на нивната целосна поддршка како во искуство и знаење така и на конкретни проекти и ситуации со цел да придонесуваме кон поголема безбезбедност на регионот, нашите држави и нашите народи.
„Наша оценка е дека министерството за внатрешни работи и македонската полиција прават одлична работа и тоа секогаш сум го истакнувал и во Европа како член на советот на министри за внатрешни работи на Европа. Одличната идеја за Регионална асоцијација на полициски академии ќе ја поддржиме и учествуваме во неа за да креираме професионални полиции на Балканот за побезбеден регион за сите. Ние сме веќе сојузници заедно во НАТО и нашата поддршка ќе продолжи во секој ваш чекор кон приклучување во нашето европско друштво на нации каде е и вашето место“, потенцираше словенечкиот министер Поклукар.
Поклукар истакна дека Словенија целосно ја поддржува Македонија на интегративниот пат кон Европската Унија и ја изрази спремноста за помош на европскиот пат кој на крај носи огромни бенефити за граѓаните и функционирањето на институциите и изрази надеж дека заслуженото место на Македонија во ЕУ ќе дојде што поскоро.
Македонија
Меџити: Бит Пазар е економска и културна гордост на Чаир

Првиот вицепремиер и министер за животна средина и просторно планирање, воедно и кандидат за градоначалник на Општина Чаир, Изет Меџити, денеска оствари средба со трговците на Бит Пазар.
Во разговорот со нив, Меџити истакна дека Општина Чаир, иако нема индустриска зона и големи компании, се издвојува со голем број на мали и средни бизниси, со Старата Чаршија и со Бит Пазар, кои претставуваат економски и културен столб на нашата општина.
Тој нагласи дека Бит Пазар одиграл и продолжува да игра значајна улога во економската благосостојба на семејствата од Чаир и пошироко. Исто така, Старата чаршија, заедно со Скопското Кале и Бит Пазар, треба да функционираат како комплетна туристичка понуда за домашните и странските посетители.
Меџити се обврза дека трговците ќе бидат заштитени од нелојална конкуренција и дека ќе имаат институционална поддршка за развој на нивната дејност.
„Роден и израснат во Чаир, чувствувам дека Бит Пазар е вредност игордост за секој скопјанец. Затоа, мојата заложба е и институционално да помогнеме и да го развиеме овој историски, економски и културен капитал,“ нагласи Меџити.
Македонија
Ѓорѓиевски : Љубљана ќе биде град-партнер за развојот на Скопје

Остваривме извонредна и пријателска средба со долгогодишниот градоначалник на Љубљана, господинот Зоран Јанковиќ, објави актуелниот градоначалник на Општина Кисела Вода и кандидат за градоначалник на Скопје, Орце Ѓорѓиевски.
Средбата, додава тој, поминала во пријателска атмосфера, при што биле разменети значајни искуства и визии за идната соработка помеѓу Скопје и Љубљана.
„Добив драгоцени совети и поддршка од градоначалникот Јанковиќ, со јасна определба Љубљана да биде град-партнер и вистински пример за развојот и модернизацијата на Скопје.
Посебен акцент ставивме на најголемите предизвици со кои се соочува нашиот град – јавниот превоз и чистотата.
Градоначалникот Јанковиќ ни даде ветување дека експертски тимови од Љубљана ќе бидат континуирана поддршка за Скопје, но не само во овие сфери, туку и во секоја област во која ќе побараме помош.
Договоривме интензивна соработка и зајакнување на капацитетите на градот Скопје во насока на креирање, планирање и спроведување европски проекти.
Верувам дека преку ова партнерство ќе изградиме поефикасен и поевропски град Скопје, достоен за своите граѓани.
Со задоволство го потврдивме статусот на побратимени градови и во таа насока упатив срдечна покана до господинот Јанковиќ за негова официјална посета на Скопје, град кој сака да учи од најдобрите“, вели Ѓорѓиевски.