Македонија
Димитров – Довжан: Европската перспектива на земјата и регионот е геостратешка потреба на Унијата

На барање на словенечката страна, заменик-претседателот на Владата задолжен за европски прашања, Никола Димитров, денеска имаше видеосредба со државниот секретар во МНР на Словенија, Гашпeр Довжан, на која разговараа за приоритетите на словенечкото претседавање со Советот на ЕУ во следните 6 месеци и вклучувањето на европското досие на Северна Македонија во тој контекст, соопштија од кабинетот на Димитров.
„Европската перспектива на Северна Македонија и регионот не е само во интерес на овој дел од Европа, туку и геостратешка потреба на Унијата во овој клучен период и јасно препознаена и во Брисел и во главните градови на земјите членки. Тоа кореспондира и со приоритетите на нашите словенечки пријатели за кредибилна и стабилна ЕУ како израз на процесот на европско обединување. Станува невозможно да се одржи европското влијание без одржување на зборот од европска страна – почеток на пристапните преговори за оние што испорачаа, како што е македонскиот случај”, нагласил Димитров.
Државниот секретар Довжан потенцирал дека регионот е вклучен во трите столба на словенечкото претседателство и процесот на проширување ќе биде истакнат како хоризонтално прашање за иднината на Европа, а особено внимание ќе биде посветено за продолжување на напорите на германското и португалското претседателство за надминување на пречките за одржување на првата меѓувладина конференција со Северна Македонија и продолжување на дијалогот со Бугарија во согласност со европските принципи и вредности.
Словенечкото претседателство упатило покана до Димитров за присуство на неформалниот состанок на Советот за општи работи на ЕУ, кој ќе се одржи на 22 и 23 јули во Брдо крај Крањ.
На средбата беше потенцирана и одличната билатерална соработка изразена преку техничката помош, што Северна Македонија ја добива од Словенија во усогласувањето со европските стандарди и политики, како и подготовката на националната верзија на правото на ЕУ, се додава во соопштението од кабинетот на Димитров.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
До крајот на денот, сончево со мала до умерена облачност

Времето до крајот на денот ќе биде сончево со мала до умерена облачност. Ќе дува слаб до умерен северозападен ветер. Во текот на ноќта ќе преовладува претежно ведро и тивко време.
Утре сончево со мала до умерена локална облачност. Ќе дува слаб ветер од променлив правец.
Минималната температура ќе биде во интервал од 9 до 20, а максималната ќе достигне од 28 до 37 степени.
Во Скопје, времето ќе биде сончево со мала до умерена облачност и со слаб ветер од променлив правец.
Минималната температура ќе се спушти до 15, а максималната ќе достигне до 34 степени.
Во среда и четврток ќе биде променливо облачно, наместа нестабилно со пороен дожд и грмежи, локално во форма на невреме. Потоа следи стабилизирање на времето.
Македонија
Битиќи: Со ново задолжување ДПМНЕ ја потврди негрижата за граѓаните

Со новото задолжување, власта предводена од ВМРО-ДПМНЕ го потврди своето лицемерие, негрижа за граѓаните и уште еднаш покажа неодговорност во управувањето со јавните финансии, реагираше пратеникот на СДСМ, Фатмир Битиќи на денешната Комисија за финансирање на буџетот.
Тој потенцираше дека пратениците кои сега се дел од власта гласаа, ќе гласаат за ново задолжување, за изградба на училишта, но тоа е истиот закон што самите го блокираа и оцрнуваа во 2021 година.
-Станува збор за иницијатива започната од претходната влада предводена од СДСМ, во рамките на стратешката рамка со Светска банка за периодот 2019 – 2023. Ова е проект на СДСМ, а ВМРО-ДПМНЕ денес се обидува да се прикаже како поддржувач на нешто што самото го блокираше. Гласаа против во 2021 година, денес гласаат за. Без извинување, без објаснување. Без никаква суштинска промена во проектот. Единствено што се смени е нивната партиска позиција,“, рече Битиќи. Тој потенцираше дека ова е класично политичко лицемерие на штета на граѓаните и на учениците.
„Сега нека одговорат јавно: зошто тогаш беа против, а денес се за? Што точно се променило, освен нивниот интерес?“
Покрај политичката недоследност, уште позагрижувачки е што Владата не понуди ниту минимум информации за јавноста. Заменик-министерот за финансии даде едвај 55-секунден извештај, без суштина и без детали. Нема список на училишта, нема информации кои општини ќе бидат опфатени, ниту пак јасност за условите под кои државата се задолжува.
„Ова е Влада што тврди дека ќе гради, а не кажува ниту што, ниту каде. Се крие, а се фали со туѓ проект. Ако веќе продолжувате нешто што ние го почнавме, бидете чесни и признајте. Сега имате нова стратешка рамка со Светска банка за 2024 – 2028 година, со буџет од 700 милиони евра. Каде се вашите проекти?“ потенцираше Битиќи.
Македонија
Лукаревска: Секој ден ново задолжување, ВМРО-ДПМНЕ повторно покажува неодговорност

Владата предводена од ВМРО-ДПМНЕ повторно покажува неодговорност во управувањето со јавните финансии и секој ден ги задолжува граѓаните, реагираше пратеничката на СДСМ, Сања Лукаревска на денешната Комисија за финансирање на буџетот.
„Задолжување имаме за 94% завршен проект. Проектот за подобрување на основното образование, кој започна уште во април 2021 година, со предвиден рок за реализација до февруари 2026 година, според зборовите на заменик-министерот, досега е реализиран со 94,27%. Остануваат уште околу 5,7% од средствата што треба да се реализираат. И покрај тоа, денес сме сведоци на ново задолжување токму за тие преостанати 5,7%, со рок на отплата од 12 години и годишна каматна стапка од 18,5%. Ова е значително повисоко од претходниот рок на отплата од 11 години, кој важеше за првите 95% од реализираните средства“, рече таа.
Потенцираше дека ова е уште еден доказ за недоследност во политиките на владејачкото мнозинство.
„Добро е што имаме продолжување на проектите што ги започна СДСМ. Но, парадоксот е очигледен, овој проект е иницијатива на претходната влада, која сегашната власт ја презема со ново задолжување без никаков јасен план како ќе се враќаат средствата. Она што некогаш беше предмет на жестоки критики, денес е прифатено и се промовира како успех. Се прашуваме дали има реална стратегија за враќање на овие задолжувања.“, додаде Лукаревска.
Таа потсети и дека во периодот на владеење на ВМРО-ДПМНЕ беа изградени 74 училишта за 10 години, додека под СДСМ, во пократок временски период, беа изградени и реновирани 80 училишни објекти.“
Посочи дека владејачкото мнозинство, кое во минатото жестоко ја критикуваше СДСМ за задолжувањата, денес само иницира нови и нови задолжувања, не само преку унгарскиот кредит, туку и преку стратешкиот договор со Велика Британија, додека веќе е најавено и ново задолжување во висина од една милијарда евра.