Тетовскиот суд ќе ја изрече првостепената пресуда за тројцата обвинети за пожарот во модуларната болница, која изгоре, а однесе и 14 животи. Судијата Јордан Велковски ќе треба да ги огласи за виновни или да ги ослободи за делата за кои се гонат. Обвинети се поранешниот економски директор на болницата, Артан Етеми, раководителот на ковид-центарот, докторот Бобан Вучевски, и Флорин Бесими, ексдиректорот на болницата во Тетово.

Ексдиректорот на тетовската болница, Флорин Бесими, и поранешниот економски директор Артан Етеми не се гонат поради причината за пожарот во тетовската модуларна болница, туку затоа што не ставиле пропишани уреди за гаснење пожар. На докторот Бобан Вучевски му се суди бидејќи дозволил влез на роднини во болничките соби иако тоа било забрането. Ова е суштината на обвинетието за пожарот по кое им се суди на директорите и докторите, чие судење двапати се одлага. Првиот пат поради отсуство на обвинетите, а вториот бидејќи обвинетите дојдоа без адвокат.

Обвинетите Ф.Б. (Флорин Бесими) А. Е. (Артан Етеми) и обвинетото правно лице (Општа болница Тетово) не постапиле во согласност со мерките и активностите што произлегуваат од договорот за заем склучен помеѓу Република Северна Македонија и Меѓународната банка за обнова и развој – Светската банка, според кој, иако биле должни да имаат соодветни уреди и инсталации за заштита од пожари и експлозии, друга противпожарна опрема, средства за гаснење пожари и противпожарни апарати, на денот на пуштањето во употреба на модуларната болница во Тетово, па сѐ до денот на настанувањето на пожарот во модуларната болница не поставиле соодветни уреди за заштита од пожар – противпожарни апарати, па како резултат на нивното непостапување на 8.9.2021 година, околу 21 часот, и како последица од настанатата куса врска преку висок преоден отпор во приклучниот кабел од дефибрилаторот, со кој се вршела реанимација на пациентката Марија Димовска во соба број 3, кревет број 1, од прегревање на кабелот настанало палење на приклучната кутија од продолжниот кабел на синтетичките материјали од кои се изработени втикнувачите, полначот за мобилен телефон и куќиштето од продолжниот кабел, па по забележаната појава на пламен, настанало бурно ширење на пожарните дејства од соба број 3 кон соба број 2 и потоа во целиот објект простирајќи се по покривните панели кон ниските предели на панелните ѕидови и болничкиот инвентар“, стои во обвинението.

Пожарот се гаснел со ќебе и вода. За животот на пациентите се бореле двајца доктори, три медицински сестри и болничарка. Сите барале противпожарни апарати, но не успеале да ги најдат.

„Но, сите тие во обидот да го изгаснат огнот не успеале по што се развиле пожарни дејства и пожарот за краток период се проширил во целиот објект, па како резултат на настанатиот пожар пациентите болни од Ковид-19 и членовите на нивните семејства, погоре наведени, како придружни лица починале“, се додава во обвинението.

За докторот Вучевски, има само еден пасус во кој се бара одговроност од него. Но, не за пожарот, ниту за причините ниту за последиците од немањето противпожарни апарати.

„Обвинетиот Б. В. (Бобан Вучевски) како одговорно лице за време на епидемија не постапил според прописите и наредбите со кои се определуваат мерки за нејзино сузбивање и спречување и не постапил во согласност со наредбата донесена од страна на медицинскиот директор при ЈЗУ Клиничка болница во Тетово за забрана на посета на неовластени лица во болничките простории поради појава на сезонски грип и глобалните случувања поврзани со Ковид-19 и дозволил влез на неовластени лица – членови на семејствата на болните од Ковид-19 како придружници во модуларната болница“, стои во обвинението.

Директорите се гонат за две кривични дела, и тоа за тешки дела против општата сигурност и непостапување според здравствените прописи за време на епидемија, а докторот само за непостапување според здравствените прописи во време на епидемија.

Застапник на обвинението е тетовскиот обвинител Бесир Алиу.