Македонија
(Видео) Директорот на „Водовод“ кандидат на СДСМ за Карпош, Марин не доби поддршка од партијата
СДСМ соопшти уште 16 кандидати за градоначалници на локалните избори од кои 12 се нови имиња. Од сите градоначалници кои не добија можност за втор мандат, генералниот секретар на СДСМ, Љупчо Николовски, го издвои актуелниот градоначалник на Општина Карпош, Стефан Богоев за кого објасни дека ќе добие нова, висока државна позиција, а како кандидат на СДСМ за градоначалник на Карпош го претстави актуелниот директор на ЈП „Водовод и канализација“, Душко Весковски.
„Богац ќе биде носител на висока позиција во институциите на Владата. Дозволете претседателот да соопшти на која“, рече секретарот Николовски.
Во СДСМ одлучиле да не го поддржат сегашниот градоначалник Златко Марин како кандидат за втор мандат иако во партиските анкети тој беше високо на листата. Кандидат за градоначалник во Аеродром е Александар Филиповски, поранешен пратеник, дипломиран економист, менаџер на повеќе компании во Галичник и во Скопје, Аеродром.
Во Прилеп кандидат на СДСМ ќе биде Горан Сугарески, кој досега Николовски рече дека се докажал како пратеник, министер и директор, а имал најголема доверба и во партијата и кај граѓаните.
Во Свети Николе СДСМ му даде поддршка на актуелниот градоначалник Сашо Велковски, магистер по економски науки.
Во Тетово поддршка доби Хемди Алезовиќ, стоматолог, за кого Николовски вели дека е познат како успешен во својата област и убеден е дека ги има симпатиите и авторитетот кај сите етнички заедници во Тетово.
Правникот Сашо Стојановски кандидат за градоначалник во Сопиште. Во Јегуновце актуелниот градоначалник, Дарко Блажевски е кандидат за уште еден мандат, а во Кавадарци партијата одлучи да го поддржи инженерот Горан Тодоров.
Кандидатот за Кратово, Николовски го претстави како еден од најмладите. Партиската поддршка ја добил Влатко Бојковски, инженер по информатика која сам најавил кандидатура, а партијата одлучила да го поддржи.
Можност за нов мандат доби и актуелниот градоначалник на Чешиново – Облешево, Горан Крстев.
Кандидат во Зрновци од СДСМ ќе биде машинскиот инженер Виктор Ангелов, во Илинден бизнисменот Александар Тодоровски, а во Демир Хисар Стефче Митревски, сегашен инспектор во Инспекторатот за земјоделство.
Нов кандидат СДСМ има и во Ново Село, социјалниот работник со Филозофски факултет, Ѕвоно Ангелов.
Ненад Коциќ, актуелен пратеник, е кандидат за градоначалник на Велес со кого Николовски вели дека лично тој ја гарантира победата.
Лекарот Мирко Стојановски е кандидат за градоначалник на Брвеница со кој Николовски ја заврши новата листа од 16 кандидати за градоначалници и нагласи дека младите и успешни кандидати биле во фокусот при изборот.
„Сакам да искажам благодарност до досегашните градоначалници кои даваа сервис на граѓаните. Ова не значи откажување од никого. Внесуваме нова свежина и енергија и во тој правец се одлуките“, рече секретарот Николовски.
Тој нагласи дека посебно внимаваат на листите за советници да има повеќе носителки, оти СДСМ била партија двигател на промените и ги повика сите кои не се од СДСМ, а сакаат, да поднесат апликација за членови и членки на советите во општините оти денес истекува рокот.
Николовски рече дека во некои општини треба да се повторат анкетите, а Центар и Куманово, општини за кои се уште не се истакнати кандидати, Николовски ги издвои како општини во кои СДСМ победува со кој било од кандидатите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Сајкоски: Вчера докажавме дека Македонија не толерира некој да ја тероризира– граѓаните во нас препознаа луѓе кои ќе донесат правда во државата
„Вчера докажавме дека само заеднички, единствени како никогаш досега можеме да успееме. Можеме да успееме заеднички и да прегазиме секој противник, секој оној којшто прави штета на нашата држава и затоа ќе го снајде она што го снајде овој наш противник вчера. Ќе го снајде истото и на 8 мај. Голема победа на ВМРО-ДПМНЕ и коалицијата „Твоја Mакедонија“, голема победа на македонските граѓани и македонскиот народ. Почитувани кичевчани вие го покажавте револуционерниот дух. Тој никогаш не згаснал во вас. Покажавме дека можеме и дека ќе направиме се, дека имаме храброст, дека имаме елан да се спротивставиме и дека ние сме победнички расположени. Победнички за да ја донесеме Македонија онаму каде што и е местото Им дадовме јасно до знаење дека Кичевчани не толерираат повеќе изживување врз нив. Дека Македонија не толерира повеќе некој да ја тероризира! Ние не толерираме да лажат и крадат. Ние таквите ги казнуваме“, истакна на вечерашниот митинг во Кичево носителот на листата на пратеници на ВМРО-ДПМНЕ во ИЕ 5, Ѓорѓија Сајкоски.
Тој исто така повика на уште помасовна излезност на 8 мај за да се донесе историска победа за Македонија.
„Сакам исто така да ве повикам на 8 мај да излеземе во што поголем број и да донесеме историска победа на Македонија. Да донесеме историска победа за ВМРО-ДПМНЕ и коалицијата „Твоја Македонија“, потенцираше Сајкоски.
Тој истакна и дека оваа е историска победа бидејќи граѓаните во ВМРО-ДПМНЕ препознаа луѓе коишто можат да ја донесат правдата во Македонија.
„Ние почитувани испишуваме историја. Испишуваме историја затоа што првпат од позиција на опозиција води некој политички субјект во Македонија со 180 илјади гласови. Испишуваме историја затоа што во нас препознаа македонските граѓани луѓе коишто се чесни, коишто се трудољубиви и луѓе коишто можат да ја донесат правдата во Македонија“.
Тој упати порака и до оние кои не излегоа на гласање дека ако сакаат да живеат во подобра Македонија треба да се придружат во големата победа на ВМРО-ДПМНЕ.
„Ако сме согласни дека треба да имаме подобро здравство, подобро образование, дека инфраструктурата во ИЕ 5 е катастрофална и дека треба да направиме комплетно нова, придружете се. Придружете се во голема победа за Македонија. Придружете се и само така, само единствени може да победиме и може да донесеме влада којашто никој не може да ја уценува и може да донесеме премиер што испорачува. Да испорача да имаме одлична инфраструктура, да бидеме први во регионот наместо последни и да направиме економски бум“, истакна Сајкоски и додаде:
„Поканете го секој, разговарајте со секој затоа што ВМРО-ДПМНЕ и коалицијата „Твоја Македонија“ се политички субјекти којшто мислат добро за сите во Македонија. ВМРО-ДПМНЕ и коалицијата го заслужува вашиот глас, бидејќи ВМРО-ДПМНЕ беше и остана браник на македонската државност“.
Македонија
(Видео) Ковачевски: Нема откажувања, ги повикувам граѓаните на 8 мај да излезат масовно и да дадат поддршка за Пендаровски и СДСМ
Со исправена глава, поставени на вистински европски пат кој е единствена опција за суштинска промена во нашата држава. Во тоа име ве повикувам масовно, ги повикувам сите граѓани на Македонија масовно да излезат на избори, на 8 мај и својот глас да го дадат за нашиот претседател Стево Пендаровски и за пратеничките листи на СДСМ и коалицијата за европска иднина, рече претседателот на СДСМ, Димитар Ковачевски вечерва на митинг на коалицијата за европска иднина во Чучер Сандево.
-Сакам да ве поттикнам да разговарате со секој ваш пријател, роднина, сосед, до 8 мај, да кажете дека ДА, разбравме каде сме грешеле, дека имаме јасна програма и план како сето тоа да го поправиме и исто така да кажете дека ние сме таа партија која ги обезбеди сите овие прогресивни работи за државата и кои ја ослободија државата од канџите на само една политичка партија која имаше се во свои раце во цела една декада. Ве повикувам никогаш да не се откажете во она што веруваме и да се бориме да успееме за се она што сме го напишале во програмата да стане реалност и државата да стане многу подобра од она што е денес, рече Ковачевски.
Јас заедно со моите другари како денес, со Санела, Сузана, Оливер, Фатмир ќе бидеме секој ден меѓу граѓаните. Во секој град, секое село, секоја куќа, со секој граѓанин, додаде Ковачевски.
-Ве повикувам и вас, да ни се придружите и заедно да ја пренесеме пораката за напредна држава, пораката за држава која напредува, за држава во која сите се почитуваат и пораката за држава во која ќе имаме подобар животен стандард. Нема откажување од иднината и од борбата за напредна и прогресивна Македонија, рече претседателот на СДСМ, Димитар Ковачевски.
Македонија
Мицкоски: Разликата по вчерашниот изборен ден е цунамито кое се крева, народот се излеа и тој бран на промени ќе ја порази оваа власт
Над 180 илјади разлика е доволен показател за само едно, народот е на нозе и народот се крена против оваа власт, рече претседателот на ВМРО-ДПМНЕ, Христијан Мицкоски на вечерашниот митинг во Кичево.
„Оние кои што се удираа во гради дека ќе сме се сокриеле после изборниот ден, јас денес не ги гледам. Сокриени коваат сценарија за бојкот, на врата се пред Мала речица да ги молат за гласови, како што ги молеа за тендери. Но, народот е посилен и од тие стотина луѓе од ДУИ кои управуваат со државата и од тој артаноиден режим“, изјави Мицкоски.
Според Мицкоски разликата по вчерашниот изборен ден е толку изразена, што е поголема од вкупниот број на гласови на Пендаровски освоен на изборите.
„Ова е цунамито кое се крева и кое ќе се удри од главата на оваа власт. Народот се излеа и тоа незадоволство и тој бран на промени ќе ги порази. Сакам да предупредам дека работата не е воопшто завршена. Потребно е жолтиот картон да стане црвен. На 8 мај потребно е масовно да се излезе и да се гласа за промени“, вели Мицкоски.
Мицкоски укажа дека е многу важно разликата да биде уште поголема.
„Затоа што добивам информации за црни сценарија кои се коваат во противничките штабови и да им кажам колку и тие да планираат такви сценарија, народот уште пожестоко ќе ги казни. Излезот власта го гледа во две работи. И двете се губитнички сценарија. Првото е бојкот на изборите каде што најисправниот одговор треба да биде излезноста и масовноста на овие избори. Второто сценарио е играњето со белезите на Македонија и великодушните понуди што овој пат ги добива ДУИ за сметка на Македонија од СДСМ за еден партнерски настап и взаемна поддршка на изборите“, кажа Мицкоски.
Мицкоски кажа дека двете сценарија им се за тоа како ДУИ и СДСМ да извлечат некаква полза, за сметка на пропаста и назадувањето на државата.
„Тоа нема да го дозволам. И затоа одговорот е масовна излезност на 8 мај“, порача Мицкоски кој заклучи: „да покажеме заедно дека силата на Македонија е во нас, во сите нас заедно, и да бидеме пример на сите идни генерации“.