Македонија
Дисциплинска за адвокатот Даути зашто бараше да бидат преведени сите списи на албански во ТНТ

Адвокатската комора со допис го известила судот дека повела дисциплинска постапка пред дисциплински обвинител за адвокатот на обвинетата во ТНТ Елисавета Најдовска, Мерџан Даути, бидејќи со цел да ја одолговлечи постапката побарал да бидат преведени сите списи на албански јазик од 40-ина рочишта досега во предметот.
Судијата Огнен Ставрев го исчита известувањето од Комората, во кое пишува дека за еден адвокат да добие лиценца, треба активно да го знае македонскиот јазик, според Законот за адвокатура.
Судијата кажа дека адвокатот кој и’ го откажал полономоштвото на обвинетата Димитар Дангов, заедно со обвинетата Елисавета Најдовска и новиот адвокат Мерџан Даути намерно го злоупотребуваат правото за да се одолговлечи постапката.
„Се користеле српски и бугарски зборови во записниците. Јас само го користам моето право што ми го дава Законот за употреба на јазиците“, рече Даути по рочиштето.
„Обвинетата, Димитар Дангов и Мерџан Даути имаат намера со заедничко договарање да ја одолговлечат постапката“, рече судијата Огнен Ставрев.
Рочиштето беше одложено поради тоа што обвинетиот Миле Јанакиески бил повикан во Обвинителството за гонење организиран криминал и корупција, а не дојде и еден сведок.
Во случајот „ТНТ“ обвинети се поранешниот премиер Никола Груевски, кој избега во Унгарија, ексминистерот за транспорт и врски Миле Јанакиески, поранешниот градоначалник на Гази Баба, Тони Трајковски, Елисавета Најдовска и уште тројца други вработени во Општината.
Според обвинението, обвинетите со злоупотреба на службената положба и овластување, поради политичка одмазда му урнале дел од објектот „Космос” на бизнисменот Фијат Цаноски, кој најави дека ќе бара отштета во висина од 40 милиони евра.
Предметот е во завршна фаза.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Се зголемува капитацијата за матичните лекари, за гинекологија и за стоматологија

Владата донесе одлука за зголемување на капитацискиот бод за матичните доктори по општа медицина, гинекологија и стоматологија, почнувајќи од април 2025 година.
Во согласност со оваа одлука, вредноста на капитацискиот бод за општа медицина и гинекологија ќе се зголеми од 75 на 100 денари, а за стоматологија од 61 на 75 денари, што претставува зголемување од 33, односно 23 проценти. Ова беше соопштено на заедничката прес-конференција на премиеро, Христијан Мицкоски и на минисерот за здравство, Арбен Таравари.
Зголемувањето доаѓа по повеќегодишна стагнација во периодот 2019 – 2022 година кога бодот изнесуваше 63 и 48 денари.
Премиерот Мицкоски рече дека од 2015 година до сега капитацијата за општа медицина порасна од 50 на 100 денари – удвојување на вредноста за една деценија. За гинекологијата исто така имаме раст од 50 на 100 денари, а за стоматологија од 35 на 75 денари, што е зголемување за 114 проценти.
„Потценетоста на примарната здравствена заштита доведе до намалување на бројот на амбуланти во 2024 година во однос на 2023 година за 34 амбуланти по општа медицина и 24 по стоматологија, а над стотина помалку амбуланти по општа медицина има сега во однос на 2015 година. Особено намалување има во руралните и помалите места за кои уште во јануари се донесоа посебни мерки“, изјави Мицкоски додавајќи дека државата издвојува речиси 4.5 милијарди за матичните лекари, за гинеколозите и за стоматолозите, а за ова зголемување ќе се издвојат речиси 550 милиони денари или над 9 милиони евра.
Зголемувањето, како што рече тој, ја покажува посветеноста за подобрување на статусот на матичните лекари и обезбедување поквалитетна здравствена заштита за сите граѓани.
Македонија
Меџити: Таравари треба да расчисти со дилемите, неприродно е и „Влен“ и соработка со ДУИ

Арбен Таравари треба да расчисти со дилемите, смета неговиот коалициски партнер, Изет Меџити.
За односите меѓу нив, во рамки на коалицијата „Влен“, оценката на Меџити е дека тие се добри, а и двајцата комуницираат. Сепак, тројца од четворицата лидери на политичките партии кои ја сочинуваат „Влен“ се согласни дека треба да настапат заедно на локалните избори, но Таравари размислува поинаку.
„Разговараме деновиве сите политички субјекти во коалицијата да се претопат во ‘Влен’, како политичка партија која ќе ги претставува Албанците на локалните избори. Единствениот кој има дилеми и гледа како можна опција и соработка со ДУИ е Таравари, за тоа него ќе го прашате. Таравари треба да расчисти со дилемите, неприродно е и „Влен“ и соработка со ДУИ“, рече Меџити.
Планот е коалицијата да настапи на изборите со заеднички кандидати, листи, штаб, програма и платформа. Меџити се осврна на листите, коментирајќи дека градоначалниците се избираат по мнозински модел, додека самите листи ги фаворизираат големите. Нема смисла, вели тој, ние сме кај големите и сега да одиме кај малите оти тоа ќе значи да се изберат гласови во прилог на ДУИ. Тогаш се поставува прашањето и за кого работиме, додаде Меџити.
Прашан дали се планира владина реконструкција пред изборите, Меџити одговори: Ќе видиме тоа, ќе процениме кои се аргументите.
Македонија
(Видео) Филипче: Какви лицемери седат во Владата, ги убедуваат работниците дека може да живеат со 400 евра

Какви лицемери седат во Владата, ги убедуваат работниците дека можат да живеат со 400 евра месечно, рече претседателот на СДСМ, Венко Филипче на прес конференцијата по неговата победа на внатрепартиските избори.
„Оваа Влада на ВМРО-ДПМНЕ, ЗНАМ и ВЛЕН, за 10 месеци само покажа дека не знае, не умее, и што е најстрашно – не сака да се справи со реалните проблеми на луѓето. Понеспособна Влада државата немала никогаш досега. Нема ниту една област и сфера во којшто нешто добро се случува. Гледајте што се случува со платите на работниците, ги убедуваат дека можат да живеат со 400 евра месечно. Видете што се случува во земјоделството, сите субвенции се намалени. Видете какви катастрофални политики се воведуваат во образованието. Видете што се случува во здравството. Здравството е на колена“, рече Филипче
Тој најави силна и консолидирана СДСМ подготвена за борба на сите нивоа: „Ќе бидеме гласни, ќе бидеме искрени и ќе покажеме дека постои алтернатива. Да ја вратиме државата на вистинскиот пат, за доброто на Македонија, за доброто на сите граѓани.
Филипче, кој освои двојно повеќе гласови од претходниот пат, потенцираше дека ова не е негова лична победа, туку заедничка победа на сите членови на СДСМ кои веруваат во правичноста, еднаквоста и напредокот – вредности кои, како што рече, денешната Влада целосно ги погазила.