Македонија
ДКСК ги одби сите приговори на СДСМ

Како неосновани сите приговори на политичката партија СДСМ поднесени до Државната комисија за спречување на корупцијата, за вработување и изградба на објекти за време на избори, членовите на комисијата ги одбија едногласно, во среда на јавна седница.
Имено, СДСМ имаше поднесено приговори кои се однесуваа на повеќе институции, па така го обвинуваа Министерството за правда дека избира нотари, Македонска пошта дека вработува шалтерски работници, дека вработува актери беше обвинет Театарот за деца и младинци.
Од наведените институции појасниле дека, на пример, Министерството за правда сé уште нема донесено решенија за избор на нотари, од Македонска пошта известиле дека има согласност од Министерство за финансии за вработувањата што ги бара и дека за тоа има обезбедено пари за тековната 2016 година. Исто така, од Театарот за деца и младинци известиле дека двајца актери не се примени на работа затоа што од медиумите дознале дека има приговор за тоа, иако појаснуваат дека има обезбедно финансии во тековната година.
Вработувањата, како што појаснуваат од институциите се итни затоа што се испразниле работните места поради заминување во пензија, поради смрт или престанување на работен однос по барање на работникот.
Исто така, СДСМ имаше поднесе и приговор за поставување камен темелник за изградба на детска градинка во село Зерновци за време на избори против политичката партија ВМРО-ДПМНЕ, но од ДКСК го одбија приговорот, затоа што од општината ги известиле дека почнати се градежни работи, но камен-темелник не е поставен.
Наталија Белчевска од Валандово имаше поднесено приговор за вработувања во Агенцијата за вработување, и тоа во нејзнината централа и во подрачните единици, за време на избори, но од Агенцијата појасниле дека вработувањата се предвидени со Буџетот за 2016 година, а добиена е согласност и од Министерството за финансии./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево и топло со мала до умерена локална облачност, максималната температура до 35 степени

Времето денеска ќе биде сончево и топло со мала до умерена локална облачност. Ќе дува слаб до умерен, наместа долж Повардарието повремено засилен ветер од јужен правец. Минималната температура ќе биде во интервал од 8 до 18, а максималната ќе достигне од 29 до 35 степени.
Во Скопје, сончево и топло со мала до умерена облачност. Ќе дува слаб до умерен, во делови од котлината повремено засилен ветер од јужен правец. Минималната температура ќе се спушти до 16, а максималната ќе достигне до 34 степени.
Времето во наредните денови
Под влијание на влажна и нестабилна воздушна маса од четврток до недела ќе преовладува променливо облачно и нестабилно време со локален пороен дожд, грмежи и засилен ветер. Дневната температура ќе биде во опаѓање.
Македонија
Постои сомнеж дека пожарот во Дрисла е подметнат

Скопската противпожарна бригада со сити сили се обидува да го локализира пожарот во депонијата Дрисла. Направен е противпожарен појас за да не се дозволи на огнот да тргне кон блиската трева, грмушки и шума од горната страна на депонијата., информира директорот на Дирекцијата за заштита и спасување, Стојанче Ангелов.
Како што додаде, постојат сомненија дека пожарот бил предизвикан намерно.
„Ќе потсетам само дека летово имавме рекордно високи температури но Дрисла не се самозапали“, рече Ангелов.
Противпожарните возила и дополнителните цистерни од „Комунална хигиена“ интервенираат на терен, а пожарот сè уште не е целосно локализиран.
Командантот на Територијалната противпожарна бригада на Град Скопје, Звонко Томевски посочи дека станува збор за посериозен пожар од поголеми размери, при што постоела опасност огнот да се прошири.
Македонија
Филипче од Париз: Потребен е проактивен пристап и политички консензус за напредок кон ЕУ

Претседателот на Социјалдемократскиот сојуз на Македонија, Венко Филипче, во рамки на еднодневната работна посета оствари повеќе средби со високи француски политички претставници, на кои во фокусот на разговорите беа реформската агенда и предлог Резолуцијата на СДСМ, како гаранција за заштита на националните интереси и решение за деблокирање на преговите со ЕУ.
Филипче одржа работна средба со пратеничката и потпретседателка на групата за пријателство Франција – Северна Македонија во француското Собрание, Лилиана Танги, со шефот на Канцеларијата за соседство, проширување и одбрана при Генералниот секретаријат за европски прашања, Жозеф Жустиниани, како и со директорот за Континентална Европа при Министерството за Европа и надворешни работи, Брис Рокфеј и со специјалниот претставник за Балканот, Рене Троказ.
На состаноците беше истакната поддршката од Франција во процесот на евроинтеграција, но и потребата од брзи резултати во исполнување на обврските и работа на реформите.
Филипче ги презентираше позициите на СДСМ и истакна дека партијата има проактивен пристап и работи на решенија за деблокирање на евроинтеграцискиот процес. Тој нагласи дека во завршна фаза е подготовката на Резолуцијата, со која ќе се потврдат националните црвени линии – македонскиот јазик, култура и идентитет, како и механизми за справување со евентуални непринципиелни барања што излегуваат надвор од Преговарачката рамка.
Во разговорите беше потенцирано дека во Европската Унија постои јасен консензус за проширувањето, и дека тоа е можност која Македонија мора да ја искористи. Француските претставници пренесоа очекувања дека нашата земја треба да направи напредок во евроинтеграцискиот процес, како што тоа веќе го прават државите од регионот, особено Албанија и Црна Гора.