Македонија
Доктор Фуштиќ за обвинувањата од Пехчевски дека му го условила лекувањето: Контактите со новинари може да ги остварува надвор од болница

Медицинскиот директор на Клиниката за детски болести, Стојка Нацева-Фуштиќ не ги негира обвинувањата од Игор Пехчевски, пациент со цистична фиброза, дека лекувањето му го условила со неконтактирање со новинари додека е во болницата – а дека во спротивно нема да има место за него во установата. Докторката, посочува дека таа му излегла во пресрет, а тој мора да ги почитува правилата. Прашана дали има анимозитет кон Пехчевски, Нацева-Фуштиќ за „Макфакс“ вели: „За мене сите пациенти се еднакви“.
„Игор е возрасен пациент – 32 години и по возраст не припаѓа на Клиниката за детски болести, туку на Клиниката за пулмологија. Но бидејќи секогаш им излегувам во пресрет на пациентите, во услови на немање место за прием на Клиниката за пулмологија, по неговото јавување го примивме на Клиниката за детски болести за да му помогнеме бидејќи не се чувствувал добро. На Клиниката за детски болести треба да ги почитува правилата на болницата и за сите активности треба да биде информиран Раководителот на одделот или Директорот. Контактите со новинари може да ги остварува надвор од болницата“, вели Нацева-Фуштиќ за „Макфакс“.
Самата посочува дека отпусната листа на пациентите им се дава на денот на испис од болница, а прашана зошто Пехчевски ја доби на 14-ти со датум од 18-ти април, докоторката објаснува дека му ја дала во случај да се предомисли и да си оди порано.
„Отпусната листа се дава на денот на испис; ако се договориме пациентот да си оди за време на викенд или празник, претходно му го изготвуваме отпусното писмо и прилогот (за да не доаѓа посебно за тоа ако не е од Скопје). Исписот административно го правиме во работен ден. Венската антибиотска терапија вообичаено трае 10 до 14 дена, во зависност од тежината на егзацербација на белодробната болест. На Игор му предложив, поради Велигденските празници, ако сака да си оди 12-тиот ден од антибиотската терапија (во сабота) бидејќи беше стабилен. Тој не беше сигурен, прво рече да, потоа ќе седел до вторник. Му ја дадов отпусната листа во случај да се премисли. Неговата историја не е затворена, таа административно се затвара кога ќе си отиде пациентот“, додава докторката и медицински директор на Клиниката за детски болести, Нацева-Фуштиќ за „Макфакс“.
Децидна е дека на Пехчевски, терапија не му е ускратена.
„Никој не му ускратил 2 дена терапија. Ви одговорив дека терапијата може да трае и помалку и повеќе, во зависност од состојбата на пациентот. А Игор беше во стабилна состојба и ако не му значат Велигденските празници (ми кажа дека е голем верник), му реков дека може да остане до 18.04. (како што му е во отпусното писмо). Неговата болничка историја не е затворена“, додава Нацева-Фуштиќ.
Пред три дена, Игор Пехчевски кој е сместен на Универзитетската клиника за детски болести каде прима терапија за цистична фиброза, ја обвини Д-р Стојка Нацева Фуштиќ, која е в.д. медицински директор на детската клиника дека му се заканила oти ако дава изјави за лекот „трикафта“, за него нема да има место во болницата за лекување.
Асоцијацијата за цистична фиброза се огради од ставот на Игор Пехчевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Со запален факел се обидел да подметне пожар во Струмица: под истрага едно лице за загрозување на општата сигурност

Јавен обвинител од Основното јавно обвинителство Струмица донесе Наредба за спроведување истражна постапка против едно лице за обид да изврши – Тешки дела против општата сигурност од член 292 став 1 во врска со член 288 став 1 од Кривичниот законик.
Осомничениот вчера попладне, преку една социјална мрежа, се заканил на лице од Струмица дека ќе му ја запали викендицата, а потоа се обидел заканите да ги реализира.
На локацијата брана Водоча се обидел да подметне пожар и да предизвика поголема имотна штета. Со запален факел од хартија и текстил ги запалил гредите на натстрешницата, кои започнале да чадат и да горат. Со тоа предизвикал ризик од пожар не само на објектот, туку и на повеќе други викенд-куќи и на нискостеблеста и високостеблеста вегетација во непосредна близина.
Поради опасност од бегство и можност да го повтори односно да го доврши делото, јавниот обвинител до судијата на претходна постапка достави предлог за определување мерка притвор.
Македонија
Мицевски: Денес паднаа маските, ДУИ и СДС го штитат Коцевски за да им го штити криминалот

Што значи пораката која што СДСМ денес ја упати кон јавниот обвинител Коцевски: „ Од тебе зависи дали ќе бидеш со штитот или на него“. Денес, пратеникот на СДСМ, Јован Митрески, јавно му порача на јавниот обвинител Коцевски дека „од него зависи дали ќе биде со штитот или на него“! Ова не е обична и наивна политичка изјава, ова е опасна и директна порака до Коцевски да остане таму каде што е и да продолжи да ја брани позицијата на СДСМ и ДУИ, наместо да преземе одговорност и да постапува професионално и независно, објави на социјалните мрежи координаторот на пратеничката група на ВМРО-ДПМНЕ, Никола Мицевски.
Ова, како што вели, е порака со која што СДСМ му става на знаење на Љупчо Коцевски дека не смее да помисли да се повлече, не смее да излезе од улогата на „заштитник“ и дека мора да продолжи да ги штити нивните криминали со непостапување, молчење и блокирање на секоја правна акција што би ја погодила нивната мрежа.
„Љупчо Коцевски, со оваа политичка „поддршка“ која што ја добива од двоецот СДСМ-ДУИ, се става во позиција да биде симбол на одбраната на криминалните структури и коруптивните шеми кои ја уништија Македонија и ја урнисаа довербата на граѓаните во правосудниот систем.
Од друга страна, се поставува прашањето:
Дали оваа „лозинка“ на СДСМ е порака на поддршка или порака на закана кон Коцевски?
Едно е јасно и кристално чисто.
Денес маските паднаа, а граѓаните ја дознаа вистината!
СДСМ и ДУИ се во очаен и последен обид да го спасат Коцевски, бидејќи само така можат да го заштитат својот криминал“.
СДСМ изминатиов период, додава Мицевски, глумеше и манипулираше, но затоа денес не гласше „За“ интерпелацијата на Коцевски.
„И токму тука лежи одговорот, зошто ниту еден функционер на СДСМ не е гонет од обвинителството со кое што раководи Коцевски, дури и по една година откако тие во се опозиција.
Но веќе нема “како до сега”!
Нема да дозволиме јавниот обвинител како институција да биде нечија алатка за спас од одговорност, ниту на СДСМ, ниту на ДУИ, ниту на било кој друг политички центар на моќ“.
Мицевски нагласува дека правдата и правичноста ќе победат, а криминалците ќе го добијат заслуженото.
Македонија
Сиљановска-Давкова-Саид Ал-Хајарин: Единството на малите и средни држави може да биде важен фактор во обликувањето на глобалната политика

Претседателката Гордана Сиљановска-Давкова денеска го прими Рашид бин Саид Ал-Хајарин, вршител на должност во aмбасадата на државата Катар во Скопје.
На средбата беа разменети мислења за севкупниот развој на билатералните односи, при што Сиљановска-Давкова изрази подготвеност и отвореност за нивно зајакнување и унапредување. Според неа, единството на малите и средни држави може да биде важен фактор во обликувањето на глобалната политика.
Одбележувањето на три децении дипломатски односи следната година, според претседателката, е добра можност за интензивирање на контактите на највисоко политичко ниво, со очекувано позитивно влијание врз развојот на односите во енергетиката, градежништвото, земјоделството, образованието, културата, науката и туризмот.
Сиљановска-Давкова го истакна интересот за унапредување на економската и трговската соработка и ја посочи отвореноста за директни инвестиции од Катар. Таа изрази очекување за наше вклучување во проектот за извоз на природен гас од Катар, како и за повторно воспоставување на директна авионска линија Скопје-Доха.
Соговорниците разменија мислења и за состојбите на Блискиот Исток, при што се истакна важната улога којашто Катар ја има во напорите за обезбедување мир и стабилност во регионот.
На претседателката Сиљановска-Давкова и беше врачена покана од неговото височество шеик Тамим Бин Хамад Ал-Тани, емир на Државата Катар, за учество на Вториот светски самит за социјален развој што ќе се одржи во Доха во ноември, клучна платформа за глобален дијалог и соработка за општествен напредок во време на растечки нееднаквости, демографски промени и брза технолошка трансформација.