Македонија
ДОМ: Борбата против корупцијата мора да биде врвен приоритет!

На вчерашната седница на Централниот одбор на зелената партија ДОМ се дискутираше за актуелната политичка состојба, за активностите на ДОМ на домашен и меѓународен план и за планот на активности на партијата во следниот период.
Ставот на ЦО на ДОМ е дека фокусот на политичко дејствување мора да биде на спроведување на реформите и подобрување на квалитетот на живот на граѓаните.
„ДОМ останува конзистентна во ставот дека интересот на граѓаните и државата мора да биде пред личните и партиските интереси. Во однос на актуелната тема за проширување на парламентарното мнозинство, за ДОМ од суштинска важност е дефинирањето на програмските приоритети и конкретен план за нивна реализација, а не бројот на министерски и директорски позиции на партијата, која претендира да стане дел од мнозинството.
За ДОМ, борбата против корупцијата е клучен приоритет и затоа инсистира на спроведување ветинг (проверка) на обвинителите, судиите и политичарите, конфискација на нелегално стекнатиот имот и конкретен, транспарентен акциски план и извештаи за спречување корупција во секоја институција и јавно претпријатие, интензивирање на процесот на дигитализација, како и воспоставување на системот на заслуги при назначување директори, вработување и унапредување во институциите и јавните претпријатија“, велат од партијата.
ДОМ инсистира на забрзано спроведување на праведната зелена транзиција од фосилни кон обновливи извори на енергија, усвојување и спроведување на законската регулатива значајна за заштита на животната средина и климата и енергетската демократија.
Како еден од врвните приоритети за ДОМ се истакна и потребата за унапредување на човековите права, особено на жените и маргинализираните групи.
Приоритет за ДОМ останува промената на изборниот модел со воведување една изборна единица, отворени листи и 50 % жени на листите.
„Се потенцира потребата од исполнување на барањето на пациентите со цистична фиброза за обезбедување медикаменти за нивно лекување. За ДОМ, неприфатливо е селективно обезбедување на лекот ‘трикафта’ за 8 од 130-140 болни. Со обѕир на високата цена на лекот, предлагаме Министерството за здравство да разговора со производителот на лекот за обезбедување гратис лекови или лекови по пониска цена како би можеле сите пациенти да бидат опфатени.
Во однос на предлогот за амнестија на учесниците во настаните од 27 април, ставот на ДОМ е дека по добивањето на предлог-законот на увид, органите на партијата ќе изградат дефинитивен став за овој предлог, но генерален став е дека правдата треба да се спроведува во правосудните институции, а не со амнестија во Собранието“, додаваат од ДОМ.
Членовите на ЦО искажаа задоволство и поддршка на Секретаријатот на ДОМ за меѓународна соработка, за активностите поврзани со евроинтеграциските процеси на Македонија и регионот на Западен Балкан, како и за зајакнување на капацитетите на партијата.
На седницата се дискутира и за активностите и остварувањата на функционерите на ДОМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Ги изгоревте децата со вашата алчност и негрижа“, родителите на жртвите од Кочани бараат оставки и одговорност

„Пожарот ги зеде телата, системот ги уби душите“, „Каде да фатиме врски за да ги вратиме другарите“, „Селективна одговорност е неодговорност“, „Не умираме од несреќи, умираме од корупција!“ „Ги изгоревте децата со вашата алчност и негрижа“, ова се дел од транспарентите што ги носеа учесниците на маршот на семејствата на жртвите во пожарот во дискотеката „Пулс“ во Кочани, што се одржува во Скопје.
Пред Јавното обвинителство тие побараа оставка од повеќе поранешни и актуелни функционери, обвинители, директори, градоначалници…
„Дали Зоран Заев е затворен, дали Крсто Муковски е затворен. Учесниците од 24 април 2017 може да ги прогласат за терористи со илјадници години затвор, а дали направиле некаква ревизија во дискотеката. Тие се соучесници затоа што го криеле криминалот. Вие сте узурпатори, не сте вие државата, ние сме државата. Ве плаќаме илјадници евра да правите криминали“, рече Владимир Апостолов, таткото на едно од загинатите деца.
Тој потоа читаше имиња и презимиња на актуелни и поранешни министри во МВР, во Министерството за економија, директори во Државниот пазарен инспекторат, директори во Дирекцијата за заштита и спасување, кои, според него, требало да бидат уапсени, а не се.
„Не знаат кој да апсат, имам список кои се највиновни – од Јавното обвинителство – господинот Коцевски, кој ќе го апси него, кој ќе го апси Љубомир Јовевски, дали се уапсени – не се уапсени. Панче Тошковски, кај се началниците што ги постави Тошковски. Дали се во затвор тие началници – не. Пред него Оливер Спасовски дали е приведен, не е, Наќе Чулев, Нухиу, Чавков, Јанкулоска – дали се уапсени – не. И министрите за економија, и директорите од Државниот пазарен инспекторат, и од Дирекцијата за заштита спасување. И градоначалниците на Кочани – не знаеле за тоа што се случува? Барем една проверка да направеа, еднаш да санкционираат“, рече Апостоловски.
„Повикуваме сите да излезете од Собранието, пуштени се некои ботови од родителите да го контаминираат овој наш марш. Не плашете се, не сме вооружени, дојдовме со срце затоа што ни убивте сè, ама не нè убивте и нас. Партијата не ве плаќа, ние ве плаќаме, напуштете ја оваа институција, еден по еден да си одите дома кај вашите деца – не плашете се, не сме терористи, само одете си. Тешко ќе се докажело кој е крив, ако е тешко, ако не ве бидува, марш, гитла“, рече Апостоловски пред зградата на Јавното обвинителство.
Тој праша што повеќе може да ни земат од ова. „И нашите души ни ги зедоа со душите на децата“, рече Апостоловски.
Маршот продолжува кон Собранието.
Македонија
Исени на средба со бугарскиот амбасадор

Заменик-министерот за внатрешни работи Астрит Исени оствари работна средба со амбасадорот на Република Бугарија во земјата, Жељаско Радуков.
На средбата беа потврдени заложбите за одржување и унапредување на односите меѓу двете соседни земји, а особено беше потврдена одличната соработка меѓу министерствата за внатрешни работи, и исто така заеднички беше констатирано дека работат врвни професионалци.
Со посебен фокус се разговараше и за можностите за дополнително унапредување на веќе воспоставената плодна соработка како од аспект на билатералните договори така и оперативната меѓусебна соработка на Министерствата за внатрешни работи на двете земји. Притоа и заменик-министерот за внатрешни работи Исени и амбасадорот Радуков изразија безрезервна отвореност за нејзино натамошно продлабочување.
Воедно, на состанокот стана збор и за меѓусебната соработка во рамките на меѓународните организации и регионалните иницијативи, кои се од заеднички интерес и придонесуваат за одржување и зајакнување на регионалната безбедност, стабилност и просперитет.
Македонија
СДСМ: Обвинителството да го истражи скандалот со Стефковски и да утврди одговорност за сите

Скандалот со братот на градоначалникот Бобан Стефковски кој дивееше по скопските улици, а потоа беше ослободен од страна на МВР го потврди она што сите многу добро го знаат: за функционерите на ДПМНЕ и нивните роднини не важат законите, изјави портпаролката на СДСМ, Богданка Кузеска.
„Министерот Панче Тошковски беше принуден јавно да го признае скандалот но само откако СДСМ го обелодени случајот.
Граѓаните не се наивни и многу добро знаат да не реагиравме ние, ова скандалозно самоволие ќе останеше скриено од очите на јавноста, а прекршителите недопирливи. Само затоа што се роднини на функционери од ДПМНЕ.
Но скандалот отвора и нови апсекти. Дали лично градоначалникот Стефковски се јавувал на посоченит началник во МВР за да врши притисок и да обезбеди ослободување на неговиот брат?
Дали ќе има кривична одговорност за тоа што казната му е напишана на друго лице?
Граѓаните заслужуваат чесно, одговорно и транспарентно раководење, а не злоупотреба на службени позиции за заштита на привилегирани функционери, нивните роднини и пријатели.
Овој настан ја покажува целосната нефункционалност на правниот систем под водство на ВМРО-ДПМНЕ и ја разоткрива нивната двојна политика: едно правило за обичните граѓани, друго за привилегираните блиски до нив.
Затоа прашуваме гласно и јасно:
Кој ќе ја преземе политичката одговорност за овој тежок скандал?
Дали Стефковски има доблест да поднесе оставка?
Дали министерот Тошковски ќе си замине од функцијата поради очигледната злоупотреба на полицијата во заштита на блиските функционери од ДПМНЕ?
Ги повикуваме сите надлежни институции, вклучително и Јавното обвинителство, веднаш да отворат истрага за постапките на полицијата и за евентуалната вмешаност на Стефковски.
СДСМ останува на страната на граѓаните и ќе продолжи бескомпромисно да се бори против сите злоупотреби, без разлика од каде доаѓаат.
Граѓаните сакаат правда, граѓаните сакаат институции што работат за нив, а не за заштита на блиските до врвот на ВМРО-ДПМНЕ!“, изјави Кузеска.