Македонија
Донација од 100 инвалидски колички и слушни апарати од турската Црвена полумесечина

Министерката за труд и социјална политика, Јагода Шахпаска, денеска прими донација на инвалидски колички, слушни апарати и средства за хигиена од Црвената полумесечина на Турција.
„Република Турција и Република Северна Македонија се пријателски земји, кои имаат одлична соработка на многу полиња. За нас како ресорно Министерство, кое се грижи за најранливите категории граѓани, особено е важна соработката со хуманитарните организации затоа што секоја помош и поддршка се добредојдени“, рече министерката Шахпаска.
Таа ја посочи соработката со Црвениот крст на Македонија како најстара хуманитарна организација во нашата држава, особено значајна, пред сѐ, во време на пандемија, но и, генерално, сите изминати години. Притоа особено ја потенцира одличната соработка со турската Црвена полумесечина, од која произлезе и денешната донација од сто инвалидски колички, 25 слушни апарати и пакети со хигиенски средства.
„Турската Црвена полумесечина и Црвениот крст на Северна Македонија припаѓаат во големото црвено семејство, каде што членуваат околу 110 организации, браќа, кои несебично си помагаат“, рече генералниот директор на Црвената полумесечина, Ибрахим Алтан. Тој ја истакна одличната соработка со Црвениот крст на Северна Македонија и изрази уверување за нејзино продлабочување во иднина.
Заменик-министерот Енвер Хусејин информира дека со донацијата ќе бидат опфатени неколку општини, меѓу кои Радовиш, Струмица, Гевгелија, Робово и дел од Скопје. Тој ја истакна важноста на соработката меѓу двете хуманитарни организации, Црвениот крст и Црвената полумесечина, како особено значајна за што потврдува и оваа донација, која ќе одговори на потребите на некои од граѓаните што им припаѓаат на ранливите категории.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Затаиле данок од 5,5 милиони денари, кривична пријава за две лица од Струга

Управата за финансиска полиција поднесе кривична пријава против две физички и едно правно лице од Лабуништа, Струга, поради даночно затајување. Лицата со лажни фактури избегнале плаќање на данок од над пет милиони денари.
Првопријавениот Ш. У. во својство на сопственик и управител на правниот субјект Друштво за производство, трговија и услуги ИНТЕРЛА увоз-извоз ДООЕЛ с.Лабуништа Струга во периодот од 07.10.2010 – 10.02.2023 година, со цел да се стекне со противправна имотна корист за себе и за пријавениот правен субјект во текот на 2021 година употребил влезни фактури со невистинита содржина за наводно извршена набавка на стоки и услуги во вкупен износ од 36.926.920 денари со вклучен ДДВ во вкупен износ од износ од 5.632.920 денари, издадени и ставени на располагање од страна на второпријавениот А. Т. во својство на управител на правен субјект Друштво за производство, трговија и услуги РЕЛАКС САС ДООЕЛ Неготино во периодот од 29.04.2020 година до денес.
Првопријавениот Ш. У. во сметководстваната евиденција ги евидентирал влезните фактури и креирал побарување за ДДВ кое го употребил за пребивање односно намалување на обврските за ДДВ со што нанел штета на Буџетот на Република Северна Македонија по основ на ДДВ по пресметковна стапка од 15,2542% во износ од 5.632.920 денари.
Македонија
„Палењето на куќата на Пандов е обид за заплашување и замолчување, бидејќи криминалците повеќе немаат заштита од власта“, велат од ВМРО-ДПМНЕ

ВМРО-ДПМНЕ најостро го осудува палењето на куќата на директорот на Управата за извршување санкции Александар Пандов и повика на итна и брза реакција од страна на институциите.
„Овој чин е обид за заплашување и замолчување на Пандов бидејќи изминатиот период јавно говореше за сите криминални дејствија што се случувале, а за кои тогашната власт и раководство се обиделе да ги затскријат.
Пандов е мета на напад бидејќи застана во отворена борба против криминалот и корупцијата“, велат од ВМРО-ДПМНЕ.
„Криминалците повеќе немаат заштита од страна на власта. За ваквото девијантно однесување мора да има казна.
Времето на палење куќи, автомобили, уцени и закани заврши, за секој одговорен и инволвиран во вакви настани ќе следува одговорност. Правда мора да има!“, додаваат од ВМРО-ДПМНЕ.
Македонија
Државниот секретар Петрушевски на средба со амбасадорот на Црна Гора Миљаниќ

Вчера државниот секретар во Министерството за внатрешни работи, Сашо Петрушевски оствари работна средба со амбасадорoт на Црна Гора во Р.С.Македонија Н.Е. Зоран Миљаниќ.
На средбата заеднички беа потврдени одличните односи помеѓу двете земји и високото ниво на политички дијалог и соработка, како и посветеноста за натамошно продлабочување на истата, извести МВР.
Државниот секретар во МВР Петрушевски се заблагодари за постојаната поддршка од страна на Црна Гора, потенцирајќи ја важноста за продолжување на билатералната и регионалната соработка кои се од особено значење за двете држави.
Во фокусот на состанокот беа актуелните политички состојби во двете земји, можностите за продлабочување на соработката преку учество во регионалните и меѓународните иницијативи, со цел зајакнување на истата во контекст на справување со безбедносните предизвици и борбата против секаков вид на криминал, соопшти МВР.