Скандалозна е изјавата на премиерот Мицкоски за загадувањето на воздухот деновиве, ниту една влада досега не се однесувала со проблемите на граѓаните како што сега се однесува владата на ВМРО ДПМНЕ, посочи претседателот на СДСМ, Венко Филипче на денешната прес-конференција.

„После 10 дена пожар во Вардариште,неколку дена пожар во Дрисла, граѓаните практично се гушат,скандалозна е изјавата на премиерот дека можеби изгледа загадено, но нема доволна количина на честички, кога луѓето знаат како дишеа синоќа, вчера пред два дена. Таквиот став на власта таквата изјава на премиерот во најмала рака е непочитување на граѓаните “, рече Филипче.

Тој додаде дека сериозно е загрозено здравјето на граѓаните во цело Скопје посебно во населбите околу Дрисла и Вардариште.

„ Мајките во Аеродром и околните населби ги прибираа децата дома вклучуваат прочистувачи за воздух а власта не прави ништо. Едно е да грешиш во политиката друго е да немаш капацитет,но да ги игнорираш проблемите како што тоа го прави на секоја тема власта, е нешто што е скандалозно и досега ниту една влада ма Македонија не се однесувала вака со проблемите на граѓаните со секојдневните проблеми на граѓаните“, рече Филипче.

Да се грижеше Венко Филипче за животот на граѓаните и инфлацијата, која во време на СДС беше двоцифрена и го јадеше стандардот на граѓаните, немаше над пола милион да остават на раб на преживување со по 150 денари на ден, реагираат од ВМРО-ДПМНЕ на изјавата на лидерот на СДСМ, Венко Филипче кој кажа дека граѓаните се оставени сами на себе без мерки за високите цени.

„После долги години економски пустош и висока инфлација наследена од владата на СДС, конечно, сега во Македонија можеме да зборување за забавување на инфлацијата.

И тоа не се само зборови на претседателот Мицкоски, како што вели Филипче, туку тоа се официјални статистички податоци, кои покажуваат дека во август месечната стапка на инфлација изнесува 4,4 а во јули изнесувала 4,9 проценти.

Ова се првични сигнали дека процесот на дезинфлација и стабилизација на цените е започнат и благодарение на економските мерки и политики преземени од Владата, а и на оние кои ќе се преземаат во иднина, инфлацијата ќе продолжи да се намалува“.

Во однос на наводните грижи на Филипче за депониите, од ВМРО-ДПМНЕ додаваат дека го упатуваат Филипче да си се обрати во својата партија која, како што велат, на власт дојде, меѓу другото, викајќи ајро, ајро и со ветување за чист воздух.

„Додека во изборната програма за парламентарните во 2020 година, неговиот другар Заев и неговата кандидатка за градоначалник на Град Скопје, Каја Шукова ветуваа решение и итна ремидијација на Вардариште.

Долгите години на власт им поминаа, па сега Шукова од опозиција повторно да бара гласови од граѓаните, лажејќи ги дека има некакво решение за Вардариште и другите проблеми во градот.

Граѓаните добро знаат кој работи за нив и кој им ги решава проблемите, а единственото решение како за Вардариште, така и за другите проблеми, го има и ќе ги реши кандидатот на ВМРО-ДПМНЕ за Град Скопје, Орце Ѓеорѓиевски.

Што се однесува за нелегалното прислушкување и следење на Мицкоски од безбедносните служби под раководство на кадрите на СДС, за сите дилеми и прашања кои ги има Филипче нека се обрати до ЈО на, и така нивниот, Љупчо Коцевски“.

За пожарот и чадот од депонијата „Дрисла“, кои трет ден ги трујат скопјани, премиерот Христијан Мицкоски вели дека има истрага, но за да каже детали, ќе почека работите да добијат свој тек. Во меѓувреме, извести дека со механизација од општествено одговорни компании ќе влезат и на депонијата „Дрисла“  и на „Вардариште“.

„Ние и овој случај нема да го оставиме вака. Веќе работиме со министерот за транспорт на општествено одговорни градежни компании, кои ќе донесат механизација и на ‘Вардариште’ и на ‘Дрисла’ и ќе можеме да дејствуваме и внатре сѐ со цел да не се случува ова континуирано“, рече денес премиерот Мицкоски по посетата на Градската општа болница „8 Септември“.

И денес премиерот зборуваше дека како професор знае оти само едно догорче од цигара може да предизвика пожар на депонијата оти таму се создава метан, кој е лесно запалива материја, а посочи и дека некому му одговара пожар на депонијата во овој предизборен период.

Премиерот Мицкски се надева дека механизацијата ќе наиде на отворени порти во депониите и потсети дека минатата година, кога неколкумина градоначалници сами се организира да го однесат ѓубрето на „Дрисла“, камионите наидоа на затворена капија.

„Се надевам дека ќе имаме простор да влеземе внатре, да не се случи повторно да дојдеме до портата и да не нѐ пуштат внатре. Така беше минатиот пат“, рече премиерот Мицксоки.

Трајно решавање на проблемот со депонијата Мицксоки најави со новиот градоначалник, а на забелешките дека тоа не треба да биде со јавно-приватни партнерство, туку да се прифати стратегијата нула отпад, тој одговори дека ќе ги покани и оние што се „за“ и оние што се „против“ за да се најде најсоодветно решение што може да се примени кај нас. Неговиот став е дека на „Дрисла“ треба да има фабрика за отпад и фабрика што од метанот ќе прави струја, кои треба да бидат дел од трајното решение.