Министерството за внатрешни работи интензивира активности за подобрување на јавната безбедност пред новогодишните празници. Превентивните мерки вклучуваат намалување на користењето пиротехнички средства, засилено присуство во трговските центри и други места со зголемена фреквенција на луѓе, изјави денеска министерот за внатрешни работи, Панче Тошковски.

Тошковски, кој го посети пунктот на полицијата пред Сити мол, информираше дека минатата недела во Скопје биле запленети меѓу 30.000 и 40.000 пиротехнички средства. Спроведени се слични акции и во Валандово, Свети Николе и други градови, при што се поднесени соодветни пријави.

„Нашите активности се насочени кон спречување на користењето пиротехника, но и кон откривање каков било криминалитет, од имотни деликти до разбојништва. Полицијата комуницира со граѓаните и ги следи состојбите на терен“, изјави министерот.

Градоначалникот на Општина Центар, Горан Герасимовски, денеска информираше за инциденти во населбата Капиштец, каде што малолетници палеле петарди. Во врска со ова, Тошковски нагласи дека вакви случаи се забележани и претходно.

„Регистрирани се три вакви настани во последниот период, а во најголем дел од нив учествуваат малолетници. Преземаме соодветни постапки против одговорните, но и повикуваме на внимание од страна на родителите. Ќе продолжиме со превентивни активности, но ќе бидеме подготвени и за репресивни мерки ако е потребно“, порача Тошковски.

Министерството ги повикува граѓаните на соработка и свесност за да се избегнат несакани последици од користење пиротехника.

Температурата утрово во Македонија варираше од 1 степен на Попова Шапка, Крушево и Лазарополе до 7 степени во Гевгелија. Во Маврови Анови беше измерена температура од 0,1 степен, а во Тетово 2, Прилеп, Битола, Охрид имаа 3 степени, додека во Скопје и повеќе градови во Македонија температурата беше од 3 до 5 степени Целзиусови.

Во изминатите 24 часа најмногу дожд наврнало во Дебар – 53 литри на метар квадратен, следуваа Охрид со 38 литри и Маврови Анови со 32 литри. На Попова Шапка, Крушево и Лазарополе, исто така, паднале значителни количини на дожд, додека во Тетово, Скопје и други места врнежите биле помалку интензивни.

За време на утрото беше измерена височина на снежната покривка од 47 сантиметри на Попова Шапка, 27 на Маврови Анови и 7 сантиметри во Крушево.

Во текот на денот, времето ќе биде променливо облачно со повремени врнежи од дожд, а на планините и во повисоките места ќе има и снег. Умерен северен ветер ќе дува, особено вдолж Повардарието, а кон крајот на денот облачноста ќе се намали и врнежите ќе престанат. Максималните температури ќе се движат од 4 до 10 степени.

Во Скопје, времето ќе биде променливо облачно со повремен дожд и снег во повисоките делови на котлината. Максималната температура во главниот град ќе достигне 6 степени.

Шест лица кои се изгубиле на Попова Шапка, поради густата магла и новиот снег, беа пронајдени и успешно евакуирани благодарение на брзата реакција на службите за итни случаи.

Како што информираат од Центарот за управување со кризи (ЦУК), вчера преку Единствениот повикувачки број за итни случаи 112, била добиена пријава дека група скијачи не можеле да се ориентираат по патеката. Проблемот настанал кога, по качувањето со скии-лифт на горните патеки, во моментот кога се обиделе да се спуштат, паднала густа магла, а снежната покривка не била изгазена од други скијачи, што им ја отежало ориентацијата.

„Скијачите веднаш се јавиле за помош на бројот 112, по што биле известени СВР Тетово и раководителот на РЦУК Тетово“, велат од ЦУК.

Првиот успех во потрагата се постигнал кога вработениот на ски-лифтот успеал да ги пронајде петте од изгубените лица, а во 16:15 часот било пронајдено и шестото лице. Прво, сите биле згрижени во полициската станица на Попова Шапка, а потоа безбедно се вратиле во своите домови.

Од ЦУК упатуваат апел до сите посетители на зимските туристички центри да бидат внимателни и да се информираат за условите пред да се упатат на патеките.