Македонија
Дурмиши: Работиме на нови иницијативи со кои ќе ја подобруваме и зголемуваме вработеноста и ќе овозможиме социјална инклузија на пазарот на трудот

„Денес успешно завршуваме проект чиј главен фокус беше решавањето на едни од најголемите предизвици со кои се соочуваме како општество – долгорочната невработеност и зависноста од гарантираната минимална помош, кажа министерот за економија и труд, Бесар Дурмиши во обраќањето на завршниот настан од реализација на тригодишниот ИПА проект „Активација на ранливи групи на пазарот на трудот“ во организација на Агенцијата за вреботување.
Министерот истакна дека на почетокот на овој проект, поставвена е амбициозна цел: ранливите групи да добијат можност за економска независност, преку вклучување во специјализирани програми за развој на вештини и услуги.
„Преку Програмата за советување и мотивација на невработените лица од ранливите категории им помогнавме да го надминат својот страв од новото и непознатото и да направат чекор кон активна вклученост на пазарот на трудот. Советувањето и менторската поддршка не беа само технички алатки, туку вистинска поткрепа, која овие лица ја почувствуваа како поттик за промена. Втората компонента, Програмата за поддршка за вработување преку обуки, е клучот кон иднината на многу луѓе. Во неа беа вклучени пет мерки кои, директно влијаеа на подобрување на вештините и вработливоста на нашите граѓани. Завршените обуки за побарувани занимања на пазарот на трудот, значат дека денес имаме повеќе луѓе подготвени да се вклучат во работната сила и да одговорат на потребите на пазарот. Овие обуки не беа само начин за стекнување на вештини – тие на невработените лица ќе им отворат врати за нови можности и професионален развој. Обуката на работно место ги подготви невработените лица за реални предизвици на работните места, а со обврската на работодавачите да вработат најмалку 50% од обучените лица, осигуруваме дека овие обуки ќе водат кон реални работни позиции. Преку субвенционираното вработување невработените лица добија шанса да влезат на работа со директна финансиска поддршка. Тие луѓе денес имаат можност да изградат кариера и да придонесат за развојот на економијата. Програмата за практикантство пак, не само што ги подготви овие луѓе за идните работни позиции, туку ја зајакна врската помеѓу образованието и пазарот на трудот. Практичната работа е клучен елемент во развојот на секој професионалец. И конечно, Пилот-програмата Втора шанса не само што ја зголемува вработливост на невработените лица, туку им дава надеж за подобра иднина. Со ова докажуваме дека никогаш не е доцна да се вложи во себе и да се создадат нови можности, наброја министерот Дурмиши.
Според министерот проектот покажа дека со правилна стратегија, соработка и посветеност можеме да постигнеме многу.
„Резултатите од проектот не се само статистика, туку луѓе кои добија поддршка, нови можности и полесен пристап до работни места.Верувам дека научените лекции од овој проект ќе ни послужат како темел за идни иницијативи со кои ќе ја подобруваме вработливоста, ќе ја зголемуваме вработеноста и ќе овозможиме социјална инклузија на пазарот на трудот“ кажа министерот Дурмиши.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски: Одлуките донесени во Хаг без водството на Трамп и САД, немаше да бидат можни

Министерот за надворешни работи и надворешна трговија, Тимчо Муцунски, на маргините на НАТО Самитот во Хаг, имаше интервју со етаблираниот американски тинк-тенк „Атлантик кансл“, соопштинија од Министерството. Во интервјуто говори за одлуките од Самитот, улогата на САД и претседателот Доналд Трамп во глобалната безбедност, како и за придонесот на Република Северна Македонија во Алијансата и одржувањето на регионалната и светската стабилност.
На прашањето околу НАТО Самитот, Муцунски кажа дека одлуките донесени во Хаг се „многу повеќе од успех“:
„Јас лично го нарекувам генерациски самит. Мислам дека одлуките што ги донесовме ќе имаат позитивни историски последици за идните генерации. Мислам дека беше клучно да се донесе одлука, особено за идните инвестиции потребни за членките и Алијансата“, рече Муцунски.
Тој посебно ја нагласи и важната улога на САД во донесувањето на овие одлуки.
„Сакам да нагласам дека без водството на администрацијата на Трамп и САД, никогаш не би ги донеле овие тешки одлуки. Значи, заслугата треба да оди таму каде што припаѓа. Но и одлично водство меѓу сојузниците, отвореност за дискусија и дебата, и фокус на тоа дека вложувањето во одбрана не е само за тврда одбрана, туку и за инвестиции во индустриската база, инфраструктурата, сајбер-отпорноста и слично. Затоа, повторно би го нарекол генерациски самит. Минатите беа историски, но одлуките овде се многу повеќе од историја. Станува збор за нашата иднина. Генерациски самит. Тоа е навистина моќно“, рече министерот Муцунски.
Заборуваше и за нашиот придонес како една од поновите земји членки на НАТО.
„Ние сме нација која сериозно го сфаќа членството во НАТО. И веќе планираме како да го достигнеме прагот од 5%. Покрај инвестирањето во армијата, за НАТО мисиите сме присутни од Балканот до Балтикот, со нашите храбри војници кои ја претставуваат нашата горда нација и придонесуваат за колективната безбедност. Американците треба да знаат дека македонските сојузници се со нив. Рамо до рамо – од Балканот до Балтикот. Тоа е добар начин да се каже“, рече министерот Муцунски.
„Атлантик кансл“ е американски тинк-тенк во областа на меѓународните односи, кој застапува атлантистички пристап и е основан во 1961 година. Управува со шеснаесет регионални центри и програмски единици кои се фокусираат на меѓународната безбедност и глобалниот економски просперитет.
Македонија
ДУИ укажува на дискриминација во МВР: Полицајци Албанци со 20 години искуство не уживаат право на унапредување

Демократската Унија за Интеграција изрази загриженост за јавните изјави на Независниот полициски синдикат, кои, според партијата, потврдуваат една горчлива реалност: систематската дискриминација на албанските полицајци и неможноста за нивен напредок во полициската хиерархија.
„Според претставници на Синдикатот, и покрај тоа што многу албански службеници имаат над 20 години работно искуство и ги исполнуваат сите професионални услови, тие не уживаат право на унапредување. Во населените места со албанско мнозинство, раководното претставување е изедначено со македонското, додека во средини каде што Албанците се малцинство, речиси и не постојат во раководните структури. Ова е јасен пример за прекршување на принципот на правична и соодветна застапеност и дополнителен доказ дека оваа влада дејствува на етничка основа, спротивно на Уставот, Охридскиот договор и европските стандарди за еднаквост и инклузивност.
ДУИ оценува дека оваа постојана дискриминација не само што го поткопува моралот и мотивацијата на албанскиот кадар во полицијата, туку сериозно ја нарушува и довербата на албанските граѓани во државните институции“, соопшти ДУИ.
Партијата упати апел на сите надлежни институции итно да ги истражат овие дискриминаторски практики и да преземат конкретни мерки за обезбедување еднаквост во унапредувањата, вработувањата и одлучувањето во рамките на Министерството за внатрешни работи и пошироко.
Македонија
Герасимовски повикува на концерт, ВМРО-ДПМНЕ му ги брои нереализираните проекти: Центар не доби парк и административна зграда кај ПУИК

Откако утрово градоначалникот на Општина Центар, Горан Герасимовски ги повика скопјани на концерт со Александар Тарабунов вечерва, ВМРО-ДПМНЕ во соопштение до медиумите го нарече шампион по нереализирани ветувања и ги наброја нереализираните проекти. Градоначалникот, пак, одговори на предизвикот со објаснување дека работи посветено, а не кампањски само пред избори.
„Очигледно е дека општина Центар не доби парк и административна зграда кај ПУИК, не доби парк со игралиште кај Клинички, ниту пак кај куќата на Есма на Кале. Тоа е билансот на визионерството на Герасимовски. На граѓаните не им е потребно експериментирање со импровизирано управување.Центарци се сведоци на спори или непостоечки инфраструктурни проекти. Многу улици и тротоари останаа неуредени, небезбедни и неадаптирани за лица со посебни потреби. Со таков кандидат за градоначалник капиталните проекти се или заглавени или нереализирани.
Нереализирани проекти кој тој напразно ги ветуваше се и градинка во Маџир Маало, градинка во Клинички центар, воспитно-образовен центар во Парк 1 со градинка и училиште, но резултатот е немање градежни активности, ни почеток, ни рокови, само илузии.
Урбаниот хаос остана, а тој ветуваше ред, но донесе уште поголем метеж, наместо решенија центарци добија хаос. Не се обезбеди ниту монтажен паркинг во Дебар Маало и во Пролет, ниту гаража кај Клинички центар, а уште помалку катна гаража спроти ПУИК, само се обезбеди нарушен сообраќај, фрустрации и изневерени граѓани.
Наместо вистинско вклучување на граѓаните во процесите, често владее молк и селективна комуникација, се промовираат ситни потези како големи успеси, додека реалните проблеми тотално се игнорираат.
Евидентно е дека тој е без јасна визија за развој, а бара повторно доверба од граѓаните, која не ја ни стекнал.
Центар под Герасимовски е пример за проекти на хартија и реалност во распад. Четири години магла во Центар и застој под негово водство“, стои во соопштението од ВМРО-ДПМНЕ.
Градоначалникот Герасимовски веднаш реагираше. И тој преку соопштение до медиумите кажа што сработил.
„Веќе почнуваме со реализација на барањата што произлегуваат од центарци. Ниту еден градоначалник не смее да оди кај граѓаните, да вети нешто и потоа да исчезне и да се појави повторно само пред избори. Работиме да надминеме одредени предизвици со кои се соочуваат жителите и уште летово да ја завршиме таа работа. Вистинската работа се гледа секој ден, на улица, во маало, а не на билборд. Во еден мандат ја изградивме од темел најубава градинка во целата држава кадешто се згрижуваат деца од населбите Пролет и Маџир маало. Во моментов се реконструира спортската сала „Работнички“ којашто беше со децении оставена да се распаѓа. Работиме посветено, домаќински и транспарентно“, вели градоначалникот Герасимовски и потсетува дека караванот „Се гледаме во маало“ продолжува и во следните денови со секојдневни посети во различни населби од Општина Центар, со цел заедничко планирање на локалниот развој, директна комуникација и градење на транспарентна и отчетна локална власт.