Македонија
„Европскиот фронт“ бара оставка од Гаши во врска со статусот на албанскиот јазик: Тој ќе остане срам за нашиот народ и за историјата

„Европскиот фронт“ изразува револт и огорченост поради, како што велат, срамните и неодговорни изјави на претседателот на Собранието, Африм Гаши, во врска со статусот на албанскиот јазик во Република Северна Македонија.
Тврдењето на Гаши дека единствениот службен јазик во земјата е македонскиот, а дека албанскиот е „преведен јазик“, за оваа партија претставува не само отворена лага туку и тежок чин на предавство кон албанскиот народ, историјата и тешко стекнатите права.
„Шокантно е, но не и изненадувачки, што Гаши – личност избрана за да служи како марионета во највисоката хиерархија на државата – може да падне толку ниско достигнувајќи ниво на самопонижување, кое дури и најжестоките анти-Албанци не би се осмелиле да го допрат. Овој срамен чин на подаништво и предавство покажува не само недостиг на интегритет туку и подготвеност за поткопување на уставните принципи на оваа држава, само за да ја зачува својата позиција. Да го потсетиме Гаши за некои непобитни факти: Амандманот V од Уставот јасно го дефинира албанскиот јазик како службен јазик покрај македонскиот. Законот за употреба на јазиците понатаму го консолидира користењето на албанскиот јазик како службен во сите сфери на јавниот живот. Во пракса албанскиот јазик е составен дел од институционалната, културната и општествената структура на нашата земја – реалност која не може да биде избришана со ниеден чин на сервилност“.
Според „Европскиот фронт“, со негирање на овие вистини Африм Гаши не само што го навредува албанскиот народ туку ја делегитимира и функцијата што ја има.
Како претседател на Собранието, како што појаснуваат, неговата должност е да го брани Уставот, да ја зачува меѓуетничката хармонија и да дејствува во интерес на сите граѓани, а не да предизвикува поделби, да сее раздор и да го намалува достоинството на втората најголема етничка заедница во земјата.
Ова, велат од „Европскиот фронт“, е предавство од големи размери.
„Зборовите на Африм Гаши звучат како реторика на оние што историски настојувале да ги маргинализираат Албанците, да го избришат нашиот идентитет и да ги потценат нашите придонеси во ова општество. Неговите постапки ги предаваат жртвите на генерациите Албанци што се бореле за еднаквост, претставеност и почит во оваа држава. Африм Гаши не претставува никого, освен себеси и тесните интереси на оние што го поставиле на оваа позиција. Тој не е глас на албанскиот народ и не ги отелотворува нашите вредности, гордост или аспирации.
Африм Гаши ја премина границата, која ниеден Албанец не ја преминал. Историјата ќе го памети ова предавство, а албанскиот народ нема да го прости“.
Бараат негова итна оставка од функцијата претседател на Собранието.
„Тој ќе остане срам за нашиот народ, за нашата историја“, потенцираат од „Европскиот фронт“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Марјан Димитриев кандидат за градоначалник на општина Аеродром од Левицата

Марјан Димитриев е кандидат за градоначалник на Општина Аеродром од Левица. Носител на советничката листа е Дејан Ристовски.
„Со ова официјално влегуваме во изборната трка со јасна визија: Аеродром да стане место каде што интересот на граѓаните ќе биде пред личните и партиските привилегии. Нашиот тим, составен од луѓе со интегритет и волја за промени, е подготвен да работи посветено за: подобра урбана средина; транспарентна работа на општината; вистинска грижа за жителите. Веруваме дека Аеродром заслужува нов почеток, без корупција, без партиски игри и без запоставување на реалните проблеми. Со поддршката на граѓаните, заедно можеме да ја донесеме таа промена“, соопштија од партијата.
Македонија
Утре и задутре пулмолози ќе проверуваат колку им се оштетени белите дробови на жителите на Трубарево и околината

Два тима од Клиниката за пулмологија и алергологија утре и задутре ќе ги посетат жителите на Трубарево и околните места за скрининг на белите дробови по големиот пожар во фабриката за рециклирање пластика и електронски отпад. Министерот за здравство Азир Алиу денес ги повика жителите да се пријават на скринингот.
„Министерството за здравство заедно со Клиниката за пулмологија, на 24 и 25 септември, од 10 до 16 часот, организира скрининг за граѓаните што живеат во Трубарево и околните места. Замолувам, сите граѓани, кои ценат дека треба да посетат доктор, на 24 и 25 септември да се пријават на овој скрининг. Дополнително, овие граѓани, ако има потреба, ќе може да продолжат со прегледи во Клиничкиот центар тука“, рече министерот Алиу.
Директорот на Клиниката за пулмологија и алергологија, Оливер Зафировски, вели дека на самото место на жителите ќе им се направат почетни испитувања на белите дробови.
„Направивме два тима, кои ќе ги посетат сите граѓани во местото Трубарево и ќе направат почетни испитувања. Во зависност од овие испитувања, ако може да се постави дијагноза или да се докаже дека нема никакво оштетување на нивните бели дробови, останува да се ревидира терапијата што ја имаат. Ако има потреба, тогаш ќе ги упатуваме во нашата Клиника за пулмологија и алергологија за да може да ги продлабочиме испитувањата и по потреба да се даде соодветна терапија“ , рече директорот Зафировски.
Пред десет дена во Трубарево се запали фабрика за рециклирање пластика и електронски отпад. Пожарот предизвика густ црн чад видлив од цело Скопје, а во воздухот беа измерени високи концентрации на тешки метали, меѓу кои кадмиум, олово и арсен.
Гаснењето траеше повеќе од 24 часа, а во акцијата беа вклучени пожарникари, полиција, Армијата, медицински екипи и Црвениот крст. Директорот на Дирекцијата за заштита и спасување, Стојанче Ангелов, го нарече гаснењето школски пример за справување со комплексен пожар.
Настанот предизвика прекин на наставата во четири основни училишта во Трубарево, кои беа префрлени на онлајн-настава поради загадувањето.
Македонија
ВМРО-ДПМНЕ: СДС да не манипулира, учебници има

Учебници има, а СДС упорно продолжуваат да лажат. СДС да престане да се резили со вакви празни фрази, реагираат од ВМРО-ДПМНЕ на прес – конференцијата на портпаролката на СДСМ, Богданка Кузеска.
„Кога веќе излегуваат на прес-конференции и се брукаат со вакви тези, барем нека кажат кој учебник, според нив, фали. Учебници има и наставата се одвива во најдобар ред, а со СДС на власт седум години, ниту еднаш, како на почеток на учебната години, така и во текот на целата, учениците немаа учебници. После седум години, Владата на ВМРО-ДПМНЕ, исто така го реши и проблемот со учебниците по странски јазици, така што за прв пат после нивното владеење учениците ќе учат по стандардизирани учебници, наместо од интернет материјали. Додека Владата на ВМРО-ДПМНЕ обезбедува учебници, покачува платите на вработените во образование и ги решава наследените проблеми, СДС на власт единствено гледаше да спечали некој ден плус од тендерите во образование. Додека СДС трошеше милиони евра за тендери за учебници, парите завршуваа во приватни џебови, а учениците страдаа и учебници не добиваа“, се наведува во реакцијата.
Од ВМРО-ДПМНЕ велат дека само во учебната 2018-2019 година, преку 27 нови договори склучени во четири очи фирмите се офајдиле со повеќе од 7,5 милиони евра или 463 милиони денари за набавка на учебници и помошен дидактички материјал за основно и средно образование.
„СДС, исто така, ветуваше студентски град, а на академските граѓани и обезбеди само руинирани домови без основни услови за живеење. СДС нема да може со лаги и манипулации да ги скрие нивните скандали од седумгодишното владеење, уништување на образовниот сектор и на цели генерации по желбите на Мила Царовска. Одговорност ќе има, и тоа за сите криминали и криминални тендери кои, во владеењето на СДС, учениците ги оставија без елементарни средства за настава, учебниците, а парите завршуваа по приватни џебови“, велат од ВМРО-ДПМНЕ.