Македонија
Европски сојуз за промена: Заврши техничкиот театар, да им се вратиме на корупциските скандали на ДУИ
„Се спушти завесата, претставата заврши. Музичарите го земаа бакшишот, пропагандистите милионери ги здиплија дебелите хонорари и избегаа во своите домови. Време е да се вратиме во реалноста“, рече Астрит Исени од Европскиот сојуз за промена.
Тој му постави неколку прашања на техничкиот премиер.
„Вети бескомпромисна борба против организираниот криминал и корупцијата. Денеска го потсетуваме на аферите со кои се идентификуваат тој и неговата партија:
• Соравија – 35 милиони евра злоупотребени на грб на граѓаните за збогатување на Дрин Ахмети;
• Лотарија – 40 милиони евра потрошени за набавка на нови машини за коцкање и зголемување на бројот на казина за мандат од 4 години на Артан Груби како прв вице премиер. Дали сте свесни дека на денот кога вие се назначувавте за премиер, во друг кабинет, Артан Груби со Перпарим Бајрами ја направија следната зделка за 12 милиони евра за апарати за коцкање?! 12 милиони евра се 12 училишта; 12 градинки; 12 амбулантни возила; 30 спортски терени; толку многу учебници што би ги снабдувале и училиштата на Косово и Албанија!
• Дурмо Турс – дали ќе ги посетите семејствата на оние кои ги загубија животите во трагедијата во Ласкарци и како ќе им објасните дека судството на РСМ, под политички притисок на вашата Влада, откако пет години го влечкаше случајот, донесе смешни казни за виновниците?!
• Модуларната болница – како се чувствувате кога член од вашиот кабинет е министерот за финансии, чиј брат, очигледно поради политичко влијание врз судството, избегна казна за смрта на 14 лица кои лежеа за лекување при пожарот во модуларната болница?!
• Беса транс – Денеска барам одговор: кога ќе го ослободите судството од канџите на политиката за да донесе правични, непристрасни одлуки кои барем малку ќе им ја олеснат болката на оние кои изгубија дури и цели семејства во таа трагедија?
2. ДУИ – традиционалниот и непоколеблив партнер на меѓународните пријатели во земјата и странство, започна непријателска кампања со која ги напаѓа амбасадорите кои и со зборови и со дела се посветени на агендата за европеизација на нашата земја.
-Како се случи тоа од главен партнер, се претворивте во главен кочничар на интегративниот процес, и да се обраќате кон еден амбасадор со уличен речник „гледај ги твоите работи!“
-Зошто амбасадори и меѓународните пратеници сега ја прескокнуваат политичката адреса на лидерот на ДУИ.
-Како се случи ДУИ која во името го има зборот интеграција, се претвори во партија на црните американски листи.
3. Ајде малку да зборуваме за демократските капацитети на техничкиот премиер:
• Ние веќе немаме дилема зошто токму Талат Џафери е избран за технички премиер – токму неговите вештини за процедурални трикови го прават незаменлив за извршување на техничките работи – уште еднаш потсетуваме дека токму тој, со трикови и итрини направи се, ги злоупотреби институциите, авторитетот на претседател на парламентот, ги прекрши законите и ризикува кривична одговорност за уривање на изборниот процес, со единствена цел опозицијата да не го заземе местото што му припаѓа со закон во Државната изборна комисија!“, вели Астрит Исени од Европскиот сојуз за промена.
„Европскиот Сојуз за Промена нема илузии – еден премиер со технички мандат нема ниту ингеренции, ниту моќ, ниту легитимитет за да адресира или да реши некоја од овие актуелни теми! Ова докажува дека неговото назначување беше само формалност во обид да се прикријат криминалот и корупцијата и заробувањето на државата од кликата на казино-кланот и други слични кланови.
Ниту една репортажа, ниту фолклористичка глорификација, ниту еден театар со пари на граѓаните нема да може да го избрише зулумот што ДУИ, Соравија, Лотарија, го вршат врз граѓаните. А сепак, тука сме да не молчиме и да бараме одговорност – дека Албанците се уморни од измами, уморни од илузии дека навистина нешто им се променило во животот со Талат како технички премиер“, изјави Астрит Исени од Европскиот сојуз за промена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Променливо облачно со повремени локални врнежи од дожд
Времето денеска ќе биде променливо облачно со повремени локални врнежи од дожд. Попладне на повеќе места ќе биде нестабилно со пороен дожд и грмежи локално во форма на краткотрајно невреме со интензивен пороен дожд, силен ветер и изолирана појава на град. Минималната температура ќе биде во интервал од 12 до 16, а максималната ќе достигне од 22 до 27 степени.
Во Скопје променливо облачно со повремен дожд. Попладне во делови од котлината ќе биде нестабилно со пороен дожд, грмежи и услови за појава на краткотрајно невреме. Минималната температура ќе се спушти до 16, а максималната ќе достигне до 26 степени.
До среда ќе се задржи нестабилно време, претежно во попладневните часови со локален пороен дожд и грмежи. Наместа ќе има услови процесите да бидат поинтензивни во форма на краткотрајно невреме, со засилен ветер, обилен пороен дожд за кратко време и изолирана појава на град. Во четврток ќе има услови за краткотраен дожд, претежно во планинските подрачја, а преодно стабилизирање на времето се очекува во петок.
Температурите ќе бидат без значителна промена.
Скопје
Делови од три скопски општини денеска без струја
Според добиеното известување од ЕВН Македонија, Регионалниот центар за управување со кризи информира дека поради реконструкција денеска без снабдување со електрична енергија ќе останат делови од три скопски општини.
Во периодот од 09:00 до 15:00 часот без напојување ќе останат корисниците на дел од село Долно Лисиче, реонот околу чаталот, ул.10 во општина Аеродром.
Во периодот од 10:30 до 14:30 часот без напојување ќе останат корисниците дел од улица 16, на патот кон Визбегово во општина Карпош.
Во периодот од 13:00 до 14:30 часот без напојување ќе останат објектите на градинката Росица, на улица Мечкин Камен, број 45А. во општина Ѓорче Петров.
Македонија
Обвинителката собра докази против тројцата осомничени за убиството на Вања и Панче, за Палчо истрагата трае
Скопската обвинителка Жаклина Крстевска-Јосифовска ја заврши истражната постапкa, односно како што појаснуваат од ОЈО Скопје за Макфакс, преземени се сите дејствија за обезбедување на докази против Влатко Кешишов, Велибор Манев и Боре Видевски. Тројцата се осомничени за убиствата на 14-годишна Вања Ѓорчевска и Панче Жежовски, а за решение во однос на истрагата за првоосомничениот Љупчо Палевски Палчо ќе се чека по давањето исказ пред обвинител.
Како што додаваат од Обвинителстовото, осомничените лица добиле известување за завршување на истрагата, но имаат рок од 15 дена доколку имаат, да достават докази до обвинителката.
„Преземени се сите дејствија од страна на обвинителката за обезбедување на докази против сите лица, освен за лицето кое неодамна беше екстрадирано. До осомничените е испратено известување дека истрагата е завршена и тие имаат рок од 15 дена за да достават докази, доколку имаат“, велат од Обвинителството за Макфакс.
Во текот на следната недела Палевски треба да биде изведен пред судија на претходна постапка во скопскиот Кривичен суд за да се изјасни за притворот кој му беше определен во отсуство.
Според досегашните сознанија кои ги објавија надлежните, Палевски на 27 ноември лани им давал насоки на Кешишов, Манев и Видевски, со автомобилот на претходно убиениот Панче Жежовски да ја грабнат Вања од зградата.
Сознанијата за нејзиното излегување ги имале од нејзиниот татко. Откако ја киднапирале и ставиле во автомобил, по пат им се приклучил и Палевски и заедно се упатиле кон Бразда каде е извршено убиството. Палевски потоа беше во бегство во Турција, а тројцата соизвршители кои на 6 декември беа уапсени признаа вина.
Шефот на скопското Обвинителство, Гаврил Бубевски, на прес-конференција посочи дека куршумот го испукал Палевски.
Teлата на Вања Ѓорчевска и Панче Жежовски беа пронајдени на 3 декември мината година.