Македонија
Едштадлер: Немам разбирање за намерата на некои земји да го блокираат вашиот стремеж за евроинтеграција
Заменик-претседателот на Владата задолжен за европски прашања, Никола Димитров, денес беше домаќин на сојузната министерка за Европа и Устав на Република Австрија, Каролине Едштадлер, во рамките на нејзината возвратна посета на Скопје.
Димитров се заблагодари за активниот посреднички пристап на Австрија во обезбедувањето вакцини за регионот преку механизмите на ЕУ, што резултираше со склучување на трипартитниот договор помеѓу Северна Македонија, Австрија и „ Фајзер/Бионтек“ за набавка на повеќе од 119.000 дози вакцини, како цврст доказ за нејзината посветеност на нашиот регион.
Во пресрет на состанокот на Советот за општи работи, соговорниците се согласија дека е потребно придвижување на евроинтегративниот процес на целиот Западен Балкан заради обезбедување предвидливост на европската перспектива.
Во тој контекст, Димитров истакна дека случајот на Северна Македонија е без преседан и е тест за кредибилитетот и влијанието на ЕУ, но и за нејзините постулати како заедница на вредности, поради што неодложно треба да се спроведе минатогодишната безусловна одлука за почеток на пристапни преговори.
Од австриска страна, министерката Едштадлер го потврди ставот дека Северна Македонија ги исполни сите критериуми за почеток на пристапните преговори со ЕУ.
„Сакам јасно да кажам дека немам разбирање за тоа некои земји овде да ги блокираат стремежите на евроинтеграцијата, немам разбирање за тоа овој процес да биде запрен и конкретно, да има отпор од Бугарија. Јас имам целосна поддршка и целосна доверба во португалското претседателство и јас пред неколку недели бев таму, тука треба да продолжиме натаму и сакам уште во Северна Македонија да апелирам да останете до крај, да се обидете овие проблеми да ги решите. Не ја знам целата приказна за историјата на Бугарија, но исто така знам што значи да се занимавате со минатото. Јас во политиката сум како министерка за Европа активно, затоа што гледам перспектива и сакам да отворам перспектива за иднината“, рече таа.
„Јас ја разбирам ситуацијата на Северна Македонија, но исто така стојам на страната на Европа и стојам на страната на Северна Македонија кога сакам да докажам дека интеграцијата на земјите од Западен Балкан ќе продолжи, ние сакаме успехот да го продолжиме во однос на евроинтеграциите, не говорам за проширување туку за завршување на процесот на обликување на Западен Балкан. Северна Македонија припаѓа на Европа и оваа перспектива мора да се обнови и мора доверливоста во Европската Унија да се овозможи и да се врати“, дополни Едштадлер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ: Нема скандал, ниту криминал, а во тоа да не се вмешани Заев и Филипче
ВМРО-ДПМНЕ обвинува дека постои поврзаност меѓу Венко Филипче и сопственикот на компанијата „ЦБД Медплант“, Тони Котев, во врска со случајот со запленета дрога.
Од партијата велат дека во јавноста се појавиле фотографии на кои двајцата се заедно, што, според нив, ги демантира изјавите на Филипче дека не ги познава лицата поврзани со фирмата.
„Откако со денови СДСМ се обидува да ја релативизира аферата со запленетата дрога, вистината излезе на виделина. Филипче тврдеше дека нема никаква врска со вистинскиот сопственик на фирмата, но фотографиите покажуваат поинаку“, се наведува во соопштението.
ВМРО-ДПМНЕ прашува зошто, како што велат, владејачката партија реагира на случајот со запленети над 30 тони дрога и дали постои поврзаност со поранешни функционери.
Од партијата повикуваат Јавното обвинителство да ја испита можната поврзаност на Филипче со случајот.
Македонија
Најмногу снег на Попова Шапка
Најстудено утрово е во Берово -4 степени, на Попова Шапка се измерени -2, додека во Крива Паланка, Претор, Битола, Струмица, Mаврови Анови се измерени 0 Целзиусови степени. Над нулата е во Тетово, Прилеп, Штип, Kрушево каде се измерени еден степен, Скопје-Петровец, Велес, Демир Капија, Виница по два, Скопје-Зајчев Рид, Охрид, Кавадарци по 3 и Гевгелија пет Целзиусови степени, информира УХМР.
Најмногу снег има на Попова Шапка, каде висината на снежната покрива изнесува 62 сантиметри.
За изминатите 24 часа до 07 часот во најмногу врнежи имало во Охрид и Претор каде се измерени 2 l/m2.
Времето денеска ќе биде променливо облачно, попладне и во текот на ноќта ќе има повремени врнежи од дожд. Врнежите ќе бидат пообилни во северозападните делови (локално над 25 l/m²). Ќе дува умерен, а долж Повардарието засилен ветер од југоисточен правец. Максималната температура ќе биде во интервал од 11 до 16 степени.
Во Скопје, променливо облачно, попладне и во текот на ноќта ќе има повремени врнежи од дожд. Ќе дува слаб до умерен, а во делови од котлината повремено засилен ветер од југоисточен правец. Максималната температура ќе достигне до 14 степени.
Македонија
Хуманост на дело, за само шест часа собрани 3,1 милиони денари за лекувањето на малата Ана
Кампањата за лекување на осумгодишната Ана Јованчева официјално е затворена, откако за само шест часа беа собрани 3,1 милиони денари, објави доктор Ненад Лазаров.
Станува збор за една од најбрзите и најмасовни хуманитарни акции во последниот период, со што целосно се обезбедени средствата потребни за хируршката интервенција и лекувањето во странство. Со ова, како што посочи Лазаров, семејството на Ана е барем финансиски растоварено во најтешкиот период од нивниот живот.
Ана има дијагностициран редок и исклучително агресивен тумор на синусите – Tu Foss pterygopalatina Sinus sphenodalis lat dex et orbitae lat dex, со зафатена орбита. Дијагнозата е потврдена во Хрватска, каде што се бара специјализиран хирург за изведување на сложената и деликатна операција.
Болеста е сериозна и со висок ризик, а времето беше клучен фактор, поради што кампањата беше означена како најитна досега. Масовниот одѕив на граѓаните за неколку часа покажа силна солидарност и сплотеност кога е во прашање животот на дете.
„Секоја среќа ти посакуваме, Ана. Цела држава стана за тебе“, порача Лазаров, додавајќи дека поддршката за девојчето и нејзините родители ќе продолжи и во наредниот период.

