Македонија
Експертите советуваа: Ниту државата ниту „Синохидро“ да не бара отштета за автопатот Кичево – Охрид, за нов краен рок да се преговара
„Пријателско порамнување“ препорача експертот од ФИДИК (Меѓународна федерација на консултантските инженери), кој го анализира доцнењето на изградбата на автопатот Кичево – Охрид, и препорача кинеската „Синохидро“ да ја продолжи изградбата. Пријателското порамнување значи ниту државата како инвеститор ниту „Синохидро“ како изведувач да не бара отштета, компанијата да ја продолжи изградбата, а новиот прифатлив краен рок за завршување на патот заеднички да го утврдат.
Јавното претпријатие за државни патишта за „Макфакс“ откри дел од анализата на експертот врз основа која Владата одлучи да не го раскинува договорот со кинеската компанија иако премиерот Димитар Ковачевски, незадоволен од тоа што автопатот се гради десет години, најави можност да се раскине и да се избере нова компанија, која навистина ќе го доврши патот.
„Во дел од анализата стои: Во состојба кога во ревидираниот краен рок за завршување на работите, 31.12.2023 година, не може реално да се завршат работите од страна на изведувачот, а земајќи го во обѕир и фактот за висок степен на физички извршените работи, финансиската реализација на проектот, степенот на решени отворени прашања и обезбедените финансиски средства со дополнителниот заем, ви предлагаме да се пристапи кон пријателско порамнување, односно продолжување со работите со прифатлив краен рок за двете страни земајќи ги предвид предложениот краен рок за завршување на работите од страна на изведувачот и потребното време за решавање на отворените прашања од страна на инвеститорот, без отштетни побарувања од страна на изведувачот и без пресметување отштета поради доцнење на градежните работи од страна на инвеститорот“, велат од Јавното претпријатие за станбен и деловен простор за „Макфакс“.
Јавното претпријатие не ги откри другите наоди на експертот од ФИДИК, но нагласи дека Владата на 214. седница ги овласти Кабинетот на заменик-претседателот за економски прашања на Владата, Министерството за транспорт и врски и Јавното претпријатие за државни патишта да почнат преговори за склучување анекс за продолжување на рокот за завршување на патот и по задолжувањето е постапено, преговорите се почнати.
Од Јавното претпријатие не сакаа да откријат колкав рок овој пат ќе ѝ дадат на кинеската компанија за завршување на автопатот.
„За рок за завршување на автопатот сè уште не може да се зборува затоа што преговорите траат. Периодов, пак, имајќи предвид дека е зимска сезона, изведувачот работи на терен онолку колку што дозволуваат временските услови“, велат од Јавното претпријатие за државни патишта.
Премиерот Димитар Ковачевски и минатата недела не одговори на прашањата од медиумите дали новиот анекс на договорот со „Синохидро“ и новиот рок за изградба ќе значат и уште едно поскапување на патот за кој досега трошоците се искачија на 600 милиони евра наспроти првично планираните 340 илјади евра. Кусо одговори дека дополнителните средства зависат од анализите на експертите и од Собранието, кое треба да го одобри анексот на договорот. Премиерот и минатата недела посочи дека одговорност за десетгодишното градење на патот треба да се бара од проектантите кои пред два месеци ги спореди со сметководители со погрешни завршни сметки.
„На готови делови од автопатот пред Нова година имаше 11 свлечишта и цели ридови беа паднати врз автопатот. Треба да се прашаат проектантите како можеле да проектираат на свлечиште, кое веднаш паѓа на автопатот. Автопатот е готов 80 отсто, но свлечиштата мора да се регулираат. Од она што го гледав во проектот, кога тој е направен, една од косините е така направена што почнува од Кичево, а завршува во Албанија. Тој проект е направен на ‘Гугл мапс’“, рече премиерот Ковачевски.
„Макфакс“ од проектантите од Градежниот институт Македонија (ГИМ) побара објаснување дали се согласни со ставот на премиерот дека вината за доцнењето треба да се бара и кај нив, дали биле предвидени и дали можело да се предвидат свлечиштата што се појавија. Од таму не одговорија конкретно, туку наведоа дека се компанија која на поставените задачи пристапува со максимална посветеност и квалитет.
„ГИМ има изработено и проектна документација за докомплетирање на проектната документација (урбанистичка проектна документација, урбанистичка планска документација и измени и дополнувања на основните проекти) за автопатот Кичево – Охрид. Изработените проекти се однесуваат на сите подделници во согласност со потребите евидентирани во проектната програма од инвеститорот и консултантот. Целокупната документација е изработена навремено, во согласност со договорот и проектната програма и таа е позитивно ревидирана и прифатена од страна на консултантот. Мисијата на ГИМ е секогаш квалитетно, навремено и транспарентно да одговара на сите зададени задачи и одговорности“, одговорија од Градежниот институт Македонија за проблемите со патот Кичево – Охрид.
Автопатот Кичево – Охрид, долг 57 километри, почна да се гради во 2014 година, а првично требаше да биде завршен до 2018 година. Кога стана извесно дека нема да се изгради во предвидениот рок, изградбата беше пролонгирана до 30 јуни 2021 година, а потоа до 31 декември 2023 година. Рокот за сегашното пролонгирање допрва треба да биде утврден.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.
Македонија
Проданоски: Експресниот пат Градско-Прилеп ни од далеку не е готов, да ставиме крај на лагите на СДСМ на 8 мај
Тука сме на лице место за да ги разобличиме лагите кои што СДСМ се обидуваат да ги пласираат до јавноста, рече Дејан Проданоски, претседател на ОК на ВМРО-ДПМНЕ Прилеп.
– Овде во Дреновската клисура каде што сме на самиот старт на почетни градежни активности, а за кои што слушнавме дека во 90 % експресниот пат е завршен. Овие се истите лаги исто како оние на почетокот на нивниот мандат кога Фејсбук и Гугл чекаа на граница, истите лаги како фабриката за автомобили во Тетово. Но, македонските граѓани треба да видат и да знаат дека овде на ова место е сам старт на почеток на градежни активности, а не е видлив ниту крајот на она како што тие сакаат да го пласираат. Да не зборувам тука и за третата фаза од експресниот пат за која што има обезбедено средства и за која што можеше исто да биде завршена ако не беа платени пеналите кон компанијата на која што и се бараше рекет за да остане да го гради автопатот и се изгуби значително голем период од изградба на патот и барање на друга компанија, рече тој.
На лагите од СДСМ им нема крај, овие лаги мора да завршат, затоа на 8-ми мај ве повикувам сите да заокружите број 2 за да и ова автопатско решение биде завршено и биде ставено во функција на секој граѓанин на Република Македонија, додаде Проданоски.