Македонија
Жената чиј стан изгоре во пожарот во Кисела Вода моли за помош

Една кесичка во која ѝ стои мобилниот телефон е сè што сега поседува 58-годишната Милена Стевчевска ,од чиј стан пред десетина дена се прошири стравотниот пожар во зградата во близината на Расадник, Кисела Вода.
„Не сакав да се одвојам од дома кога избувна пожарот. Не можев да сфатам дека за толку кратко време може сè да изгори. Сега сум само со оваа кеса и паричникот што ми го купи ќерка ми. Излегов од домот само со едни папучи и ова што го носам на себе“, вели таа плачејќи.
Во станот, кој е целосно уништен, а во кој таа живеела од 1983 година, Стевчевска влегува вторпат по пожарот. Ниту знае како ќе го реновира ниту како ќе преживува и каде воопшто ќе живее во иднина. Од институциите се чекаат одговори, а од граѓаните помош. Сопругот на Милена е починат во далечната 2002 година и оттогаш е самохрана мајка на две ќерки. Зема пензија од девет илјади денари, која ја наследила од сопругот, и тоа е целиот нејзин месечен приход.
Иако пожарот почнал од нејзиниот стан, штета претрпеле многу луѓе од соседните станови. Комплетно се изгорени уште неколку стана на овој и на катот над Стевчевска.
Двата влеза во зградата веќе десетти ден немаат струја.
„Им велам, поради мојот стан, сега сите вие страдате и живеете во оштетени станови. Со ноќи не можам да спијам од гризење на совеста“, вели таа.
Стевчевска во станот живеела со ќерка си, золвата и внукот, кои во тој период биле надвор од земјава. Таа вели дека во еден момент во станот снемало струја, а кога влегла во собата на внукот, видела како гори креветот. Таа не е задоволна од брзината на противпожарните екипи.
„Горе гореше, а тие дојдоа и не мрдаа. Им сметале паркираните возила, не можеле да пријдат. Дури потоа разбрав дека дошле неподготвени и помина речиси цел час додека да се организираат“, вели Стевчевска.
Оваа жена сега живее во малиот стан на другата ќерка, а надлежните ѝ ветиле дека ќе добие сместување во студентскиот дом „Пелагонија“, но засега од ова ветување нема ништо.
Целото сведоштво на Стевчевска може да се гледа во видеото на „А1 он“.
Таа очајно бара помош од граѓаните за да може да го преживее периодот што следува. Стевчевска нема никаков документ за лична идентификација бидејќи сè изгорело во пожарот, па апелира секој што може да уплати барем минимални средства на жиро-сметката на ќерка ѝ:
Ирена Стевчевска
Сметка: 210501593318751
Тутунска банка
Со назнака: Донација за Милена Стевчевска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: ВМРО-ДПМНЕ да каже дали имаат сериозен план за одблокирање на европските интеграции

Претседателот на Социјалдемократскиот сојуз на Македонија, Венко Филипче, во одговор на новинарско прашање, во врска со изјавата на премиерот Мицкоски за поднесување заедничка резолуција со Бугарија во Европскиот парламент за македонскиот јазик, посочи дека вакви сериозни прашања се дискутираат како предлог во Собранието, каде што учествуваат сите политички партии.
„Сметам дека е крајно несериозно такви сериозни предлози да се даваат од обични прес – конференции. Премногу е сериозно и важно прашањето да биде само предмет и обид за некаков дневно политички партиски интерес од страна на ВМРО ДПМНЕ. Сметам дека треба да се направи како предлог во Собранието бидејќи е нешто во што треба да учествуваат сите политички партии. Доколку има таков сериозен предлог ние апсолутно ќе го ќе го поддржиме“, рече Филипче.
Посочи дека ВМРО ДПМНЕ должат пред јавноста да образложат каков план имаат за одблокирање на евроинтеграциите.
„ВМРО-ДПМНЕ треба да каже дали имаат сериозен план, дали имаат сериозен план за дипломатска активност, дали имаат сериозен план за одблокирање на европските интеграции“, рече претседателот на СДСМ, Венко Филипче.
Македонија
(Видео) Полициски хеликоптер исфрли 80 тони вода врз пожар во струмичко

Денеска (18.07.2025), полициски хеликоптер од типот Бел-412 од Одделот за воздухопловни единици дејствуваше на пожар во општина Василево, с. Нивичино, струмичко каде што гори нискостеблеста шума.
При дејствувањето во 60 налета се исфрлени повеќе од 80 тони вода, соопшти МВР.
Пожарот, како што информираат се уште е активен и продолжуваат активностите за негово гасење.
Македонија
Македонија ќе ја претставуваат рекорден број млади спортисти на ЕМОФ Скопје 2025

Македонскиот олимписки комитет го промовираше националниот тим од 203 члена (181 спортист) за претстојниот Европски Младински Олимписки Фестивал, што од 20 до 26 јули ќе се одржи во Скопје, Куманово и Осиек
Македонската спортска делегација ќе брои вкупно 203 члена, од кои 181 спортист на претстојниот Европски младински олимписки фестивал – ЕМОФ Скопје 2025, кој ќе се одржи од 20 до 26 јули во Скопје, Куманово и Осиек. Нашите претставници ќе се натпреваруваат во сите 15 спортови што се дел од програмата, што претставува историски момент за македонскиот спорт.
На денешната прес-конференција, на која официјално беше промовиран македонскиот националниот тим, се обратија Даниел Димевски, Претседател на Македонскиот олимписки комитет и Претседател на Организацискиот комитет на ЕМОФ Скопје 2025, Владимир Богоевски, Спортски директор на МОК и директор за спорт при ЕМОФ Скопје 2025 и Светлана Макаровска, шеф на мисијата на македонската делегација на ЕМОФ Скопје 2025.
„Станува збор за исклучително голем настан – убедливо најголемиот што досега го организирала нашата држава. Очекуваме импресивна бројка од околу 6000 учесници, меѓу кои 4300 спортисти од 14 до 18 години и тренери, 700 судии и официјални лица, 200 ВИП гости и 800 волонтери. Тоа значи дека Македонија во овие седум дена ќе пулсира со младинска спортска енергија, што ретко се гледа дури и на многу поголеми европски спортски манифестации Организацијата на ваков фестивал е вистинска привилегија, а особено сме горди што успеавме Скопје да го вметнеме на мапата на најзначајните спортски настани во Европа. Ова е уникатна можност за промоција на нашата држава на европско ниво“, посочи претседателот на МОК.
Претседателот на МОК порача дека настапот на ЕМОФ Скопје 2025 ќе биде клучно искуство во формирањето на идните спортски шампиони на Македонија.
„Ова се тие клучни години кога секој млад спортист се профилира и се гради како идно спортско име. Убеден сум дека искуството што ќе го доживеат на ЕМОФ Скопје 2025 – можноста да се натпреваруваат со врсници од цела Европа, да носат дресот на Македонија и да бидат дел од еден европски олимписки контекст – ќе им помогне побрзо да созреат и да израснат во врвни спортисти. Горди сме што успеавме да формираме толку квалитетна и бројна делегација и што им дадовме шанса на најдобрите млади таленти од нашата земја да бидат дел од ова спортско семејство. Верувам дека нивното учество ќе биде само почеток на многу успешни спортски приказни,“ истакна Димевски.
Спортскиот директор на МОК, Богоевски нагласи дека ЕМОФ Скопје 2025 ќе биде најголемиот спортски настан што некогаш се одржал во Македонија – со рекорден број спортови и натпреварувачи.
„Официјалното име на настанот е Европски младински олимписки фестивал, во рамките на кој се одржуваат и спортски игри. Ова е 18-то издание на фестивалот, а Македонија досега на сите претходни изданија заедно била претставувана од вкупно 50 спортисти. Овој пат, само во Скопје 2025, нашата делегација брои 203 члена, од кои 181 се спортисти – што претставува огромен исчекор за македонскиот младински спорт. Делегацијата ќе биде сместена во студентскиот дом „Стив Наумов“ во Скопје, како и во Куманово, каде ќе се одвиваат натпреварите во кошарка, маунтајн бајк и друмски велосипедизам. Ова е историски момент за македонскиот спорт и организациски капацитет, и вистинска шанса да покажеме дека сме подготвени да бидеме домаќини на европско ниво.
Првпат во историјата на фестивалот ќе има 15 спортови, додека на досегашните изданија најмногу биле застапени 12. Тоа е рекорд и за самиот ЕМОФ, но и за Македонија како домаќин. Убеден сум дека настан од ваков обем не само што досега не бил организиран кај нас, туку нема да се повтори барем во следните 30 години.,“ посочи Богоевски, спортски директор на МОК и директор за спорт при ЕМОФ.
Шефот на мисијата на македонската делегација, Макаровска најави дека македонските спортисти се подготвени да остават силен впечаток на ЕМОФ Скопје 2025 – со поддршка од целата јавност и со Шајни, маскотата која ќе ги води низ фестивалот.
„Станува збор за млади луѓе кои се на почетокот на својата спортска кариера и за кои ова ќе биде непроценливо искуство. Преку настапот на ЕМОФ Скопје 2025, тие ќе научат како се натпреварува и како се претставува својата земја на младински олимписки игри – што ќе им биде исклучително важно како подготовка за идни олимписки циклуси.
Особено ми е чест да ја претставам маскотата Шајни, која ќе ги симболизира олимписките вредности – пријателство, единство, почит и спортски дух – на сите настани во рамките на фестивалот. Со голема гордост ги најавувам и нашите знаменосци на церемонијата на свеченото отворање – Кристијан Смилев, натпреварувач во кајак, и Матеа Поповска, одбојкарка. Тие ќе го носат македонското знаме пред очите на цела Европа.
Убедена сум дека македонската јавност ќе биде силен поддржувач на овие спортисти, кои ќе дадат сè од себе и на подготовките и на натпреварите, за Македонија да се претстави не само како најбројна, туку и како најтрофејна делегација на фестивалот,“ изјави Макаровска.
ПР