Македонија
Жерновски во работна посета на Брисел
Заменик министерот за надворешни работи, Андреј Жерновски, во рамки на дводневната работна посета на Брисел, оствари работна средба со Анџелина Аинхорст, директор во Европската служба за надворешни работи.
На состанокот, Жерновски информираше за актуелната политичка состојба, како и за напредокот на земјата на полето на имплементацијата на обврските од процесот на европски интеграции.
„Како држава, посветено и внимателно работиме на исполнување на сите препораки и забелешки од страна на Европската унија, со цел да изградиме солидно досие преку кое ќе обезбедиме потврдување на одлуката од страна на Советот следниот јуни и, конечно, почеток на преговорите“, нагласи Жерновски на состанокот.
Аинхорст изрази задоволство од напредокот во Република Македонија, како и од текот на имплементацијата на Договорот од Преспа, потенцирајќи ја неопходноста од заокружување на овој процес како предуслов за остварување на евроинтегративните аспирации на земјата.
Жерновски имаше состанок и со Алехандро Алваргонзалес, Заменик генерален секретар за политички и безбедносни прашања на НАТО. На средбата, соговорниците изразија задоволство што, и покрај бројните предизвици, работите во Република Македонија се движат во позитивна насока. Беше упатено уверување дека целиот процес ќе заврши успешно и дека Република Македонија набргу ќе го добие заслуженото место во НАТО.
„Ние, во НАТО, но и јас лично, со нетрпение ја очекуваме Република Македонија во своите редови”, изјави Алваргонзалес на средбата.
За време на работната посета на Брисел, Жерновски оствари средби и со европратениците, Димитриос Пападимулис (потпретседател на ЕП, член на Сириза, Грција), Питер Нидермулер (член на социјалдемократите, Унгарија), со Иво Вајгл ( член на АЛДЕ, известител за Република Македонија), како и со Андреј Ковачев ( потпретседател на ЕПП, Бугарија), потоа со Јоханес ван Бален (претседател на Групата на пријатели на РМ во ЕП, АЛДЕ, Холандија), со Елмар Брок (член на ЕПП, Германија), со Рајнхард Бутихофер (член на Групата на Зелените, Германија), со Тонино Пицула (член на социјалистите и известител во сенка за РМ во ЕП, Хрватска).
Од страна на сите соговорници беше изразена силна поддршка за правецот во кои се движи Република Македонија и убеденост дека нашата земја конечно ќе се најде во семејството на ЕУ.
За време на дебатата во Европскиот Парламент за Резолуцијата за напредокот на Република Македонија за 2018, комесарот за проширување Јоханес Хан, претставникот на Европскиот совет и европратениците, припадници на големите различни парламентарни групи, едногласно го поздравија реформскиот процес во Македонија, добрососедскиот однос и договорите со Бугарија и Грција, како и лидерската улога во регионот.
Со изгласување на Резолуцијата, Македонија доби препорака од ЕП за почеток на преговорите со ЕУ во јуни 2019 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Центар наскоро ќе стане првата општина во земјава со систем за мерење на бучава, рече Герасимовски
Општина Центар наскоро ќе стане првата општина во земјава со систем за мерење на бучава во реално време, најави градоначалникот Горан Герасимовски. Според него, јавната набавка е завршена, а веднаш по изборите ќе бидат поставени 30 мерни единици на различни локации.
„Заврши јавната набавка, чекаме да поминат изборите за да ги поставиме мерните единици – првично 30. Преку мобилна апликација, секој граѓанин ќе може да провери каква е фреквенцијата на бучава на одредена локација“, изјави Герасимовски.
Системот, како што објасни, ќе им овозможи на граѓаните докази при пријавување во Министерството за внатрешни работи или до општинските инспекциски служби. Целта е брза и ефикасна реакција на прекршителите, особено во зони каде што постојат проблеми со прекумерна бучава од угостителски објекти и сообраќај.
Во вториот дел од изјавата, Герасимовски зборуваше за следниот голем проект на општината – постепено затворање на Дебар Маало за моторен сообраќај, со што ќе се намали хаосот со паркирањето и ќе се создаде подобар квалитет на живот за жителите.
„Имаме ревидиран проект за затворање на Дебар Маало. Тој е доставен до Министерството за внатрешни работи и веќе имавме два состанока со МВР за да го подобриме и да добиеме одобрување. Така и беше договорено на последниот состанок“, рече Герасимовски.
Планот е Дебар Маало да се затвора дел по дел, почнувајќи веднаш по завршувањето на изборниот процес, а првата рампа веќе е поставена.
„Веќе поставивме рампа на почетокот на Боемска улица. Разговараме за начинот на кој таа зона ќе функционира, и тоа ќе биде пример за затворање и на други населби каде што сообраќајот и паркирањето се хаотични“, додаде градоначалникот.
Македонија
Николоски го претстави планот за Николиќ во Дојран: Уредена плажа, патека и подобро електроснабдување
Потпретседателот на ВМРО-ДПМНЕ, Александар Николоски, при посетата на дојранското место Николиќ, најави повеќе инфраструктурни и развојни проекти за локалното население и туристите.
Николоски посочи дека приоритет е решавањето на проблемот со снабдувањето со електрична енергија, бидејќи местото брзо се шири со нови куќи и викендици.
Како втор проект го најави уредувањето и осветлувањето на пешачката патека што ќе води од населбата до плажата, која, според него, ќе стане туристичка атракција.
Трет приоритет е уредувањето на плажата Николиќ, која ќе добие концесионер со обврска да ја трансформира во современо туристичко место.
Николоски додаде дека се разговара и за изградба на културен дом и решенија за предучилишно згрижување на децата.
„Убеден сум дека Илија Николиќ ќе биде новиот градоначалник на Дојран и дека заедно ќе ги реализираме овие проекти со поддршка од Владата“, изјави Николоски.
Македонија
Мицкоски од Пробиштип повика на масовна излезност во вториот круг
Во првиот круг коалицијата којашто ја предводи ВМРО-ДПМНЕ освои 33 градоначалници. Двајца во меѓу време, помеѓу првиот и вториот круг, против кандидати на нашите кандидати се откажаа, што значи дека сега веќе се 35 градоначалници и во уште 24 општини сме во вториот круг. Во недела ќе се одлучува кој ќе биде градоначалник во тие 24 општини. Во 6 од тие 26 општини сме второпласирани, со тенденција и со голема шанса, бидејќи разликата е премногу мала, да бидеме првопласирани, рече претседателот на ВМРО-ДПМНЕ, Христијан Мицкоски на вечерашниот мини митинг во Пробиштип во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.
Мицкоски изрази убедување дека коалицијата предводена од ВМРО-ДПМНЕ, после овие локални избори ќе има 59 градоначалници.
„Истовремено, дозволете ми да информирам дека во 58 општини советничките листи ан коалицијата предводена од ВМРО-ДПМНЕ победија и имаат убедливо мнозинство во Советот. Кога на сето тоа ќе се додаде и резултатот во Градот Скопје, односно убедливото водство на идниот градоначалник на Градот Скопје, Орце Ѓорѓиевски, 90 илјади наспроти 30 илјади, отприлика нешто повеќе од 3 спрема 1, очекуваме во вториот круг таа бројка да дојде до 120 можеби 125 илјади гласа. И убедливата победа на советничката листа на коалицијата предводена од ВМРО-ДПМНЕ за Град Скопје, доаѓаме до фантастична бројка од 60 општини во кои што се состои и Градот Скопје, нешто што до сега на ниту една политичка коалиција во независна Македонија не и се случило“, истакна Мицкоски.
Втората крупна политичка порака, вели Мицкоски, која сакам денес од Пробиштип да ја испратам, е дека конечно, партијата која повеќе од 20 години беше дел од сите влади во Македонија, Демократската унија за интеграција, на овие локални избори е поразена.
„Ние велевме на парламентарните избори пред година и половина ги развластивме и дека ќе дојде време, кога на локалните избори, тие ќе бидат поразени. И тие практично се поразени на овие локални избори“, рече Мицкоски.
Додаде дека во вториот круг имаме три опции, од кои првата е да се гласа за коалицијата која ја претставува ВМРО-ДПМНЕ, која е победничката коалиција, додека втората опција е поранешната владина коалиција предводена од СДСМ, која е опција која не враќа назад во времето и која ја ограбуваше, понижуваше и распродаваше Македонија.
„И третата опција, по мене, најкатастрофални е да останеме дома и да не излеземе на изборите и да дозволиме некој друг да одлучува во наше име“, дециден беше Мицкоски додавајќи дека со седењето дома никој не се казнува, туку со тоа се казнуваат самите граѓани кои не излегле на гласање.
Затоа, Мицкоски ги повика граѓаните на Пробиштип, но и на цела Македонија во недела на 2 ноември да излезат на гласање што е можно помасовно и да го дадат својот глас онака како што тие мислат дека е најдобро.
„Но, убеден сум дека кога ќе застанете позади параванот, со пенкалото во рака и со гласачкото ливче пред вас, ако го слушате разумот и вашето срце, и длабоко погледате во вашата душа, ќе видите и ќе препознаете дека таму извира бројот 9 и името на Тони Тоневски. И јас сум убеден дека тоа ќе биде вашата опција за следните четири години“, посочи Мицкоски.

