Македонија
Заев: ВМРО-ДПМНЕ треба да каже дека поништувањето на преспанскиот договор ќе нѐ врати од ЕУ и НАТО

Премиерот Зоран Заев е убеден дека доколку лидерот на опозицијата Христијан Мицкоски дојде на власт, ќе ги поништи договорите и со Грција и Бугарија. Тој денес, коментирајќи ја изјавата на Мицкоски дека ќе го поништи преспанскиот договор ако дојде на власт и покрај тоа што стратешка цел и на ВМРО-ДПМНЕ се ЕУ и НАТО, рече дека токму затоа нема да дојде на власт.
„Да, господинот Мицковски, ако дојде на власт, ќе го поништи договорот со Грција, преспанскиот договор, ќе го поништи и договорот со Република Бугарија, ама затоа нема да дојде на власт и затоа тоа не е возможно“, рече премерот Заев.
Тој нагласи дека договорите не се работи за кои треба да се шегуваме, туку тие се сериозни.
„Колку што беше тешко и беше потребна храброст да се донесат сите тие одлуки, со иста тежина, иста храброст, одлучност и одговорност треба да се пристапува и кон иднината на овие прашања. Јас не се сомневам дека ВМРО-ДПМНЕ, ако дојде, ќе го поништи договорот, ќе направи сè за да поништи договорот. Но, истовремено треба чесно да им каже на граѓаните дека тоа ќе нè држи надвор од Европската Унија и НАТО, да не зборувам дека ќе нè скара повторно со соседите, какви рефлексии ќе има тоа врз економијата, какви рефлексии ќе има врз целиот регион и тоа треба да го каже. Го гледам во сите тие интервјуа, вели: ‘јас се нарекувам Македонец, зборувам македонски јазик и ќе ја нарекувам државата Македонија’. Јас како Зоран Заев исто така ја нарекувам државата Македонија, сум Македонец, зборувам македонски јазик, но како претседател на Владата, во согласност со Уставот и законите, државата е Република Северна Македонија, а јас сум Македонец што зборува македонски јазик, е тоа е одговорно. Ако, не дај боже, еден претседател на влада, кој и да е, не го употребува уставното име на државата – Република Северна Македонија, треба и тој да знае што следува, а треба да знаат и граѓаните. Тоа значи нова горчина преку ново вето, кое веднаш ќе ни се испорача и ќе бидеме повторно блокирани и ќе чекаме повторно 15 години како кандидати. Ќе чекаме некој да дојде повторно да ги врати работите на нормала. Толку е едноставна работата“, рече премиерот Заев.
Тој порача дека е чесно кога некој кој најавува поништување на договорите, треба да објасни и како понатаму ќе гарантира членство во НАТО и ЕУ.
„Овие наши стратешки цели не се оти така ги избравме и не се така затоа што постојат од 91, па нам сега ни паднало на памет тоа да го правиме, туку поради тоа што тие цели носат економија, носат економски стандард, носат инвестиции, градат пријателство, од кое многу компании инвестираат во државава. Имаме неколку бугарски компании што инвестирале кај нас по договорот во металуршката, рударската дејност, во преработката во прехранбената индустрија, во медикал-канабис, во повеќе дејности. Сите тие се со таргет отворање повеќе од 3.000 работни места. Тоа се 3.000 наши граѓани што добиваат поголеми плати. Затоа е многу важно да бидеме сериозни во политиката“, рече премиерот Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петрушевски: Ако ССМ не ги криел платите, тогаш на кој сајт или друго јавно место се објавени?

Ако ССМ не ги криел платите, тогаш на кој сајт или друго јавно достапно место се објавени?, прашува Бране Петрушевски, пратеник од ВМРО-ДПМНЕ.
„Пешевски е на чело на синдикат каде работниците на скелиња земаат минимална дневница, за разлика од таа на Пешевски, кој е поставен таму не од граѓаните како пратениците, туку од тесен круг од неговите пријателчиња од ССМ. И таа позиција си ја наследуваат од колено на колено, како и неговите пријатели и ментори од црвената буржоазија на СДС.
Ако Пешевски со имот и примања како комунистички директор е претставник на работничките права, тогаш неговиот ментор Заев е чесен човек, а тие Лехваленса, објави на ФБ Бране Петрушевски, пратеник од ВМРО-ДПМНЕ“.
Македонија
One Stop Shop од средината на април ќе се воведе на границата со Косово

Министерството за внатрешни работи ја информира јавноста дека од средина на месец април (14.04.2025) официјално ќе започне со работа заедничката гранична контрола (One Stop Shop) на заеднички граничен премин Долно Блаце – Елез Хан.
„Овој чекор претставува конкретна реализација на билатералната соработка помеѓу Република Северна Македонија и Република Косово, со цел олеснување на прекуграничното движење, намалување на времето на чекање и зголемување на ефикасноста на граничните контроли“, соопштуваат од МВР.
Македонија
ВМРО-ДПМНЕ: СДС е партија чиј премиер Ковачевски даваше земја за фотоволтаици на сопствената сопруга, и Заев кој даваше лиценци на брат му

„СДС да каже кој закон е прекршен, со набавката во Министерството за дигитализација? Дали вработениот кој го посочуваат е некој функционер или член на комисија која одлучува во однос на набавките? Наместо да манипулираат СДС треба да ја прифатат реалноста дека не се работи како до сега“, велат од ВМРО-ДПМНЕ.
„Да потсетиме дека премиерот од СДС, Ковачевски даваше земјиште за фотоволтаици на својата сопруга, и тоа со одлука на владата со која тој управуваше. Премиерот на СДС, Заев, даваше тендери и лиценци на фирмите на братот, братучедот и роднините“, посочувааат од партијата и додаваат:
„СДС е партија чии претседатели делеа бизниси на своите семејства“.
Претходно Методија Илиевски, потпретседател на СДСМ рече дека постои нов скандал во министерството на Андоновски и дека тендер добиле родители на негов вработен.