Македонија
Заев како Груевски, отпишува долгови во пресрет на претседателските избори

Владата на Зоран Заев со отписот на долговите за струја и исплатата на лозарите посегна по популистички мерки по примерот на владеењето на експремиерот Никола Груевски. Ова е ставот на граѓаните по најавата на премиерот Зоран Заев за отписот на сметките за струја направени до 2006 година и најавата на министерот за земјоделство, Љупчо Николовски, за покривање на долговите што некои приватни винарници го имаат кон лозарите во пресрет на претседателските избори.
Ставот го оправдуваат споредувајќи го отписот на долгови за струја, за радиодифузија, за кредитни картички и за извршители, што експремиерот Груевски го најави во пресрет на претседателските избори во 2014 година.
Одговор на прашањето зошто токму сега, во пресрет на претседателските избори, се одлучува за отписи на долгови, нема, но министрите со денови објаснуваат дека за долговите нема да се трошат народни пари и дека граѓаните во никој случај нема да бидат оштетени.
Денес, министерот за земјоделство, Љупчо Николовски, објасни дека парите што од буџетот ќе бидат потрошени за исплата на лозарите ќе ги вратат винарниците преку механизмите на државата.
„Не е точно дека со државни пари се покриваат долгови на приватни фирми. Почекајте ја одлуката на Владата, која треба да се донесе в четврток. Се покриваат долговите на лозарите.
Државата не презема долгови на компании, државата директно ги обесштетува лозарите, а бидејќи никој за една работа не може да има двојна исплата, преку постојното законско решение државата го побарува износот што овие винарници или откупувачи треба да им го платат на лозарите и преку финансиски инструменти на УЈП и на платежната агенција тоа се пари што ќе се вратат во буџетот. Работата е што лозарите долго чекаа на решавање на овие проблеми и сметам дека е одговорно да си ги добијат побргу своите средства“, објасни министерот Николовски.
Владата најави дека пред претседателските избори ќе го исплати долгот над 1,5 милион евра што винарниците „Повардарие“ и „Стефанс винарија“ го имаат кон лозарите за земеното, но неплатено грозје во периодот од 2014 година до 2016 година.
Отписот на долговите за струја, пак, вчера го објаснуваше вицепремиерот за економски прашања, Кочо Анѓушев. Иако премиерот Зоран Заев од трибина во Охрид минатата недела најави дека ќе им биде покриен долгот за струја на речиси 200.000 семејства во износ од 110 милиони евра направен до 2006 година, вицепремиерот Анѓушев рече дека ќе се прави анализа за точната бројка на граѓани, а покривањето на долгот нема да го оштети државниот буџет.
„Премиерот само ја најави мерката како активност. Во моментот течат разговори на таа тема. Не станува збор дека државата ќе одвојува средства од буџетот за да плаќа долгови, туку преговараме со компаниите да бидат отпишани во нивните книги долговите што се генерирани со години претходно“, објасни вицепремиерот Анѓушев.
Иако и во двата случаја се работи за стари долгови, ниту министрите ниту премиерот не објасни зошто одлуките за покривање на долговите ги носат сега во пресрет на претседателските избори.
Во пресрет на последните претседателски избори во 2014 година, тогашниот премиер Никола Груевски вети отпис на долговите за струја, за радиодифузија, за кредитни картички и за извршители. Право на отпис имаа невработени лица, корисници на социјална парична помош и лица што поради болест или смрт на близок член од семејството не можеле да ги намират обврските. Тогаш Груевски отписот на долгови го правдаше со економската криза што многу лошо ја поднеле ранливите категории граѓани. Неколку месеци по најавата, Груевски извести дека биле отпишани долгови на граѓаните во износ од 30 милиони евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.
Македонија
(Видео) Василевски: Нула нови градинки за 4 години во Аеродром, околу 700 деца чекаат за запишување секоја година

Изминаа речиси 4 години откако ВМРО-ДПМНЕ ја освои локалната власт. И По 4 години, ВМРО-ДПМНЕ во Општина Аеродром не изгради ниту една од ветените 4 нови градинки, рече денеска на прес-конференција Бојан Василевски, ОО СДСМ Аеродром.
„Овиe градинки беа првиот од 7-те топ приоритети на Муцунски и Митески во програмата со кои ја освоија довербата на нашите сограѓани од Аеродром. Митески и Муцунски ветија целосно нови градинки во Острово, Мичурин, Лисиче и Долно Лисиче, но еве, четири години подоцна, ниту една од овие ветени градинки до денес не е ни започната со градба“, вели Василевски.
Според него, околу 700 дечиња годишно се на листа за чекање за упис во градинка, заради недостатокот на места во градинките во Аеродром.
„ВМРО-ДПМНЕ во Аеродром покажа целосна незаинтересираност за решавање на овој проблем. Единствениот објект на градинка кој се гради во моментов во Стар Аеродром е со 70.000.000 денари, средства обезбедени од Владата на СДСМ во 2024 година. Само за споредба, кога со Општина Аеродром управуваше СДСМ се изградија 2 нови градинки со вкупен капацитет од 400 деца. Целосно нов објект Црвенкапа во Стар Аеродром со капацитет од 200 деца и целосно нов објект Буба Мара во Ново Лисиче со капацитет од исто така 200 деца“, кажа Василевски.
Македонија
ДУИ: Албанците се недоволно застапени во неколку клучни институции

Демократската унија за интеграција изразува длабока загриженост во врска со најновите извештаи за недоволната застапеност на Албанците на одлучувачки позиции во државните институции на Република Северна Македонија, велат од ДУИ.
„Според анализа објавена во неколку медиуми, Албанците се недоволно застапени во неколку клучни институции, вклучително и Претседателството, Министерството за дигитална трансформација, Министерството за спорт, Народната банка, МЕПСО и Агенцијата за администрација.
Овој диспропорционален однос е особено загрижувачки по укинувањето на механизмот „Балансер“ од страна на Уставниот суд на 9 октомври 2024 година, кој претходно обезбедуваше правична застапеност на заедниците во државната администрација. По оваа одлука, отсуството на ново законско решение доведе до исклучување на Албанците од клучните одлучувачки позиции.
ДУИ потенцира дека правичната и соодветна застапеност на сите заедници претставува темелен столб на Охридскиот договор и предуслов за еднакво и демократско општество. Апелираме до надлежните институции итно да преземат мерки за надминување на оваа нееднаквост и да обезбедат правична застапеност на Албанците на сите нивоа во јавната администрација.
ДУИ останува посветена на унапредувањето на еднаквоста, правичната застапеност и целосната интеграција на Албанците во институционалниот живот на државата“, пишува во соопштението на ДУИ.