Придобивките од преспанскиот договор, односите со Грција денес, како и ставот на опозицијата за името Северна Македонија, беа темите на кои се осврна експремиерот Зоран Заев во интервју за грчкиот весник „Катимерини“.

Експремиерот вели дека сега анкетите ја покажуваат Грција како еден од петте најдобри пријатели на Северна Македонија, а пред Преспа таа беше еден од нашите три најголеми политички непријатели.

„Денес, многу се радувам кога гледам како семејства меѓусебно комуницираат, се посетуваат, доаѓаат на пазарење, за медицинска нега, на пример, кај стоматолог. Ние доаѓаме на кафе, на храна, на шопинг, особено во Солун. Како политичар многу често сум во Грција бидејќи моите деца учат во Солун и запознавам многу луѓе. Сите се толку љубезни, а има и такви што велат: ‘Господине Заев, јас сум против преспанскиот, но вие сте добар човек. Затоа ајде да работиме заедно’“, рече Заев.

Експремиерот ѝ се заблагодари на грчката влада како за помошта што ѝ ја понуди на неговата земја за време на пандемијата така и за поддршката за НАТО и европската перспектива.

Вели дека е очигледна разликата во односите, а луѓето ги виделе придобивките од договорот.

„Нашите земји и порано имаа некаква економска соработка. Но, сега, по Преспа, сè е отворено. Во Северна Македонија беа направени многу инвестиции од Грција, особено во енергетиката, а во периодот на коронавирусот Грција ни помогна со тоа што ни обезбеди вакцини. Сега градиме заеднички енергетски пазар и се обидуваме да бидеме отпорни и подобро подготвени за идните енергетски кризи. Ние сме мал регион и ако работиме заедно, навистина ќе бидеме посилни“, рече Заев.

Тој во интервјуто рече дека некои десничарски партии сè уште не го прифаќаат новото име, но сега е во нашиот Устав и ќе го почитуваат.

„Знам дека што и да се случи во Северна Македонија во иднина, Уставот мора да се почитува. Дури и лидерот на опозицијата, Христијан Мицкоски, јавно коментира дека нема враќање назад. Затоа мора да продолжиме во иднина. Како што тогашната грчка опозиција беше против, денес како влада наоѓа начини и ја продолжува соработката бидејќи никој не сака да уништи нешто што е од корист и за двете страни“, рече Заев.

Говорејќи за ВМРО-ДПМНЕ, експремиерот додаде дека без разлика дали ќе останат во опозиција или ќе станат власт во одреден момент, тие првин мора да го почитуваат нашиот Устав бидејќи тој е најголемиот правен акт во државата.

Заев верува дека најдоцна до 2030 година Северна Македонија ќе биде земја членка на ЕУ.