Македонија
Заев молчи, Гаши реагира: Нема ништо мистериозно во средбата со експремиерот, по чиј налог ме следат службите?

Лидерот на Алтернатива, Африм Гаши, ја потврди средбата со експремиерот и експретседател на СДСМ, Зоран Заев. Детали за тоа што се разговорите – нема. „Макфакс“ побара став и од Заев, но тој до моментот на објавување – не одговори на пораките. Гаши пак, обвинува дека фотографијата е направена од службите на СДСМ и ДУИ.
„Како лидер на Алтернатива, имам мандат и должност да се среќавам со сите политички актери во земјата. Така сум работел досега и така ќе работам и во иднина. Следствено, нема ништо посебно и мистериозно во мојата средба со поранешниот премиер Зоран Заев. Јас го разбирам интересот на медиумите за оваа средба, но мислам дека вистинското прашање не е кој, каде и зашто се среќавам, туку зошто, по чиј налог и од каков страв ме следат службите СДСМ-ДУИ?“, прашува Гаши.
„Макфакс“ го праша и Заев за тоа што се разговарало на средбата, но и кога истата се одржала. Тој до моментот на објавување не одговори на прашањата, меѓу кои беше и тоа, дали истата се случила откако Алтернатива излезе од Владата. Меѓу другото, побаравме став и за шпекулациите дека Заев со Гаши ќе ја уриваат Владата во која влезе и Алијансата на Албанците.
Фотографијата протече во јавност утринава. Таа беше објавена на социјалните мрежи. Со неа се критикуваше Гаши и Алтернатива, дека и откако се исфрлени од Владата по ултиматумот од СДСМ, тие седнуваат на маса со владејачката партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Лабудовиќ најави ревизија на сите спорни урбанистички планови, нови катни гаражи, чиста и безбедна општина со енергетски ефикасни фасади

Во преполната сала на Музејот на Современа уметност, вчера се одржа промотивната Конвенција на Движењето ЗНАМ – За наша Македонија, на која беа претставени кандидатот за градоначалник на Општина Центар, Мирослав Лабудовиќ, и советничката листа.
„На Центар му треба предводник кој ќе биде вистински претставник на граѓаните. Доволно млад и енергичен, доволно стручен и посветен татко на општината. На Центар му треба човек кој ќе воведе ред, ќе создаде урбан развој наместо хаос, ќе го исчисти, ќе го направи безбеден и ќе се бори за секоја негова педа. На Центар му треба вистински центарец. На Центар му треба Мирослав Лабудовиќ,“ беше пораката што силно одекна на Конвенцијата.
Во своето обраќање, Лабудовиќ се обврза дека нема да биде градоначалник кој работи само пред избори, туку човек што ќе им служи на граѓаните секој ден од својот мандат. Тој најави ревизија на сите спорни урбанистички планови, нови катни гаражи во Буњаковец, Капиштец и кај новата Железничка станица, чиста и безбедна општина со енергетски ефикасни фасади, како и изградба на Центар Хаб – мултифункционален младински и културно-технолошки центар.
„Секогаш пред очи ќе ја имам главната цел – моите сограѓани. Ќе работиме секојдневно за да го подобриме нивниот живот и Центар да му го вратиме на граѓанинот,“ истакна Лабудовиќ.
Носителот на советничката листа, Мишко Барзов, додаде дека со визија, системски решенија и чесна работа, советниците на ЗНАМ ќе изградат поуредена, почиста и побезбедна општина, додека лидерот на Движењето ЗНАМ, Максим Димитриевски, порача: „Не смееме да дозволиме Центар да остане во погрешни раце. Време е за промена, време е за вистински човек кој и знае и може. Тој човек е нашиот Миро.“
Движењето ЗНАМ на овие избори настапува самостојно со советнички листи во 53 општини и во градот Скопје, со кандидати за градоначалници во Куманово и Центар.
(Соопштение на ЗНАМ)
Македонија
Гичев: ДПМНЕ ги изневери граѓаните, време е за нова позитивна енергија и прогрес во Свети Николе

„Поминаа четири години откако ДПМНЕ е на власт, а освен празни ветувања, не добивме ништо. Четири години без ниту еден капитален проект, освен чадорите и кафезот во срцето на градскиот парк, кои ќе бидат дислоцирани веднаш по моето доаѓање, во првата недела“, порача од трибината во Свети Николе кандидатот за градоначалник на СДСМ, Дејан Гичев.
Тој ја побара поддршката од граѓаните и вети дека повторно ќе го врати сјајот на градот.
„Време е за промени. Време е за прогрес. Поминаа четири години без привлекување инвестиции. Наместо развој, добивме стагнација, наместо отчетност, добивме молк, и наместо подобар живот, добивме повисоки сметки и пониски стандарди. Ветуваа многу, а не направија ништо. Проектот за базен, кој беше целосно подготвен, беше сопрен без никакво објаснување од раководството предводено од ВМРО-ДПМНЕ,“ рече Гичев.
Уверува дека со напорна работа ќе ја реализира својата визија и програма, со конкретни проекти за подобра иднина.
„Со правилно урбанистичко планирање и грижа за хигиената, Свети Николе ќе го направиме чист, урбан и модерен град за живот. Тоа ќе биде обврска на секој од нас. Ќе работиме на обновување, модернизирање и вложување во спортските објекти, како и на поддршка на спортските клубови, со што ќе го оживееме спортот во нашиот град. Партнерството, координацијата и соработката со невладиниот и граѓанскиот сектор ќе овозможат подобра работа во решавањето на конкретните проблеми на граѓаните“, порача Гичев.
Тој кажа дека ВМРО-ДПМНЕ ја имале можноста, но ја прокоцкале, градот стагнирал изминативе четири години, а жителите не добиле ништо од ветеното.
„Ние ќе донесеме вистинска поддршка за земјоделците. Ќе обезбедиме основни услови за работа преку тампонирање на сите земјоделски патишта. Ќе ја вратиме загубената чест на земјоделецот, а ќе ја вратиме и душата на градот. Нашата визија е да ја подобриме заедницата. Предлагаме нови политики и мерки кои директно одговараат на реалните потреби на граѓаните. За младите , нов младински центар. За социјално ранливите фонд за самохрани мајки. Во образованието, стипендии за талентирани деца, порача Гичев.
Македонија
Времето денеска ќе биде сончево со мала до умерена облачност, од утре пад на температурите

Времето денеска ќе биде сончево со мала до умерена облачност. Кон крајот на денот облачноста ќе се зголемува и во текот на ноќта ќе има повремен локален дожд. Ќе дува слаб до умерен ветер претежно од јужен правец. Минималните температури ќе се движат од -3 до 2, а максималните ќе бидат до интервал 12 до 20 степени целзиусови.
Во Скопје, сончево со мала до умерена облачност. Кон крајот на денот облачноста ќе се зголеми. Ќе дува слаб до умерен ветер од јужен правец. Минималната температура во главниот град ќе се спушти до 1 степен, а максималната ќе достигне 17 степени.
Од понеделник до среда ќе дува умерен до засилен северен ветер, а температурите ќе се задржат под просекот за овој период од годината. Пораст на дневната температура се очекува од четврток.