Македонија
Заев од Пеленица: Работиме со срце и одговорност за државата, повикувам на совесно и одговорно однесување од сите
Доаѓам наваму, ме застана еден наш другар и ми вели, претседателе, не ви се чини ли некако Пеленица најубава досега?! Погледнав наоколу, му одговорив – Да, а си помислив, изгледа зашто во душата ни е убаво. Има и зошто да ни е убаво во душата другари – затоа што нашата убава, признаена, осигурана, слободна, перспективна земја ни е во неа.

Еве ја Република Северна Македонија пред позитивната одлука за датум за почеток на преговорите со Европската унија. Еве сме на заокружувањето на интеграциите, како 30-та земја членка на НАТО. Еве сме во процес на економски развој – растат плати, детски додатоци, социјална помош, растат странски инвестиции. Имаме, и тоа какви причини, денес посебно, во три децениската независност, да се чувствуваме и достоинствено, и среќно, и мотивирано – убаво.
Нека ни е честит и вековит на сите, почитувани граѓани, 8-ми септември, денот на независноста на нашата заедничка Македонија, денешна Република Северна Македонија!

Оваа наша држава, за две години, на затекнатите рушевини успеа да ги обнови: мостовите дома, мостовите со соседите, со регионот, мостовите кон светот. После децениска изолација и сиромаштија, почнавме интеграциско развојно темпо што не можеше ни да се замисли! Се случуваат, и интеграции и развој.

Придонесот за напредокот на нашата држава е на сите граѓани, на сите влади, на сите партии од осамостојувањето на државата – нечии придонеси поголеми, нечии помали. Но, едно нешто е факт. Овој напредок, на нашата земја, го поведе и предводи социјалдемократска партија – нашиот, твој, мој, заеднички, Социјалдемократски сојуз. Овој историски напредок, што го живее денешна Република Северна Македонија, поставен на аманетот на претците, што со гордост ќе го предадеме во аманет на идните генерации, е можен само со државотворна партија, каква што е Социјалдемократскиот сојуз. И не фалба, реалност е, државата успева кога Владата ја води или е дел од неа, СДСМ.

Затоа што, едно е да си голема партија, а друго е да си државотворна партија. Првото значи бројки. Второто значи и срце и одговорност. Тоа што државата успева кога СДСМ успева не е само поради бројноста на приврзаниците, туку поради срцето и одговорноста со коишто работиме за нашата родна земја. Тоа е вистински патриотизам, на дело.
Така беше кога носевме одлука за независноста на Македонија во 1991 година. Нашиот прв претседател Киро Глигоров пред нас, и премиерот Никола Кљусев, го дадоа патоказот како се работи заедно за државните интереси. Тоа требаше некој да го види и испочитува. Го направивме тоа и еве ги денес успесите.

Со срце и одговорност работевме и кога ја спасивме државата од војна 2001-та година. Така беше и кога почнавме да го градиме патот кон ЕУ, во 2005-тата година. Така беше сите овие години кога стоевме на браникот на демократијата, посебно во 2011-тата година и во 2016-тата година кога беа загрозени државниот поредок и демократските права.
И важниот пресвртен момент, со срце и одговорност кон нашата држава, СДСМ се отвори целосно кон граѓаните во 2017-та година, кога го препозна крикот за обединување за да го победиме режимот. Се здруживме сите, без задршка, Македонци, Албанци, Турци, Срби, Власи, Роми, Бошњаци, други, од какви било политички определби и различности и на нашата држава ѝ создадовме граѓанска, демократска, проевропска Влада. Исто како што пред 28 години, во 1991-та година граѓаните, здружено, масовно и по сопствена волја, избраа слободна, суверена, самостојна и независна држава.
И така работиме и денес – интересите на државата пред `се. Промените во СДСМ се слух за потребите на граѓаните и државата. Со консензус ги носиме важните државни реформи. Низ политики на наоѓање решенија, наместо оправдувања, ги затворивме сите прашања со соседите. Во европски дух на почитување и разбирање ги градиме меѓународните односи и со нашите стратешки партнери, НАТО и Европската унија, а отворени сме за економска соработка со сите држави со цел да ги обезбедиме економските придобивки за секој наш граѓанин.
Посветени кон државните интереси во значајниот период што претстои, очекувам да бидат и сите државни институции и политички партии. Убеден сум дека имаме капацитет како држава, со двотретинско мнозинство да го донесеме и Законот за јавно обвинителство. И сите случаи и евентуални случаи на криминал и корупција, како во развиените земји, мора да добијат ефикасна, праведна и правична разврска. Тоа го очекуваат граѓаните и со тоа ќе дадеме дополнителни аргументи на ЕУ, дека сме и ние цврсто определени кон правдата и изградбата правна држава. На прашањето која Влада е најдобра, Гете рекол: Онаа која што не учи како да владееме сами со себе. Затоа што, нема поголема власт од онаа над самите себе и своите предизвици.
Сите сме луѓе. И не смееме да се делиме на луѓе на позиции и без позиции. Секој е на позиција да го подаде она што го носи во себе за доброто на државата и тоа е најважната позиција. Оној на кого му е доверена државничка позиција, има обврска повеќе да го препознае, почитува и да му даде шанса на тоа добро од граѓаните што ги претставува и на кои им служи.
Почитувани присутни, членови на СДСМ, граѓани кои сте дел од позитивните процеси во државата – Благодарам за влогот и и за вашето разбирање на победничките подвизи. Дека тие бараат совест и храброст. Дека успесите се можни без калкулации. Дека секој во овој процес е важен. И дека сечие време и сечии шанси доаѓаат, кога се работи искрено и трпеливо. Чекориме напред. И само така е можно да продолжиме напред, бидејќи сега е јасно: На прав пат сме.
Успесите во евроатлантските интеграции овозможија над 54.000 нови реални вработувања за само две години. Внесоа рекордни, над 625 милиони евра странски директни инвестиции во 2018 година. Платите пораснаа и државата ќе ги помогне приватните фирми, со плаќање на придонесите за оние што ќе ги качат платите на работниците до 100 евра, со што уште повеќе ќе растат. Приливот на пари во Пензискиот фонд ќе овозможи и раст на пензиите. Ќе следува ново покачување и на минималната плата, што веќе ја покачивме на 12.000 денари. Детскиот додаток им се исплатува на 20.300 дечиња, што е за три пати повеќе од претходно. И образовен додаток им се исплатува на над 8.000 деца, што е за повеќе од три пати, од претходно. Се гради и обновува во државава, со најсилно темпо од независноста досега. Проектирани се 1 милијарда во патишта, над 1 милијарда во железница, над 1 милијарда во енергетика, инвестираме во здравството, водоводите, животната средина.
Затоа, ќе порачам. Ние работиме, знаеме од каде сме почнале и знаеме што сме постигнале од таа, некаде нулта, некаде минусна точка од којашто тргнавме. Но ги знаеме и потребите на граѓаните што не можат да чекаат. Имаме многу да сработиме. Немаме простор да сме комотни. Барам фокус кон обврските за коишто како партија и како Влада, добивме мандат од граѓаните. Потребни ни се способностите на секој поединец, на секој од вас! СДСМ ѝ е потребна на Република Северна Македонија, зашто покажа историјата, покажа 8-ми септември, покажа три децениската независност на Македонија, Социјалдемократскиот сојуз е таа државотворна партија со којашто се безбедни и државата и граѓаните.
Повикувам, посебно во значајниот период пред нас, на совесно и одговорно, државотворно однесување од страна на секој граѓанин, на сите политички партии, организации, во името на добрата иднина на сите нас, во име на доброто на Република Северна Македонија и на сегашните и идните генерации. Да ни е среќен денешниот голем државен празник, денот на независноста на нашата Република!
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче обвинува дека власта удрила и по средните винарии
Претседателот на СДСМ, Венко Филипче, во денешната изјава од Моклиште, Кавадраци, нагласи дека со новите критериуми за добивање субвенции владата директно ги оштетува средните винарии, а новите правила за субвенции одат во прилог на само неколку големи компании.
„Средните винарии имаат обврска да продадат, 30% од грозјето на најголемите една или две винарии, со цел да воопшто стигнат до субвенција. Сето ова оди во прилог на потребите на само една или две големи винарии. Лозарите, тие кои мака мачат на сонце на лозовите насади, малите винари, средните винари, сите се намерно оштетени, намалени им се парите или воопшто нема да можат да ги земат, што е една катастрофа за овој регион“, рече Филипче.
Тој додаде дека во новата Програма за субвенции во земјоделството и парите се скратени и условите за добивање субвенции се усложнети.
„Владата ја намалува и Програмата за субвенции во земјоделството во целост. Од 140 на 100 милиони евра. Значи за цела третина, помалку пари, кај сите сектори во земјоделството, сточарството, лозарството, поледелството, овоштарството и нема да имаат овие земјоделци доволно поддршка од државата како што тоа го имаше во времето на владата на СДСМ“, рече Филипче.
Во изјавата Филипче нагласи дека лозарите не можат да очекуваат позитивни вести кога станува збор за поддршката од државата.
„За жал, сметам дека лозарите оваа година немаат да има добри вести во однос на тоа што значи поддршка од страна на владата за развој на овој сектор. Овој сектор земјоделството во мало го означува пристапот на оваа власт генерално во државата. Кражба, пљачка и незаинтересираност за луѓето.Жалам, но оваа власт не се грижи за граѓаните, за државата“, рече Филипче.
Македонија
Градоначалникот Ќура ангажирал фирма што ќе утврди зошто е загадена водата во Струга
Градоначалникот на Струга, Менди Ќура, најави дека на 16 февруари приватна институција од Скопје ќе ги утврдува причините за загадувањето на водата во градскиот водовод, која тој лично ја ангажирал.
Тој изјави дека Општината презема мерки за надминување на проблемот поради кој жителите веќе една недела не можат да ја користат водата, која од чешмите тече заматена и со темнокафеава боја, поради што е забранета за пиење и употреба.
Македонија
Јаневска: Јавната дебата за Законот за високо образование не е завршена
Министерката за образование и наука Весна Јаневска денеска изјави дека јавната дебата за Законот за високо образование сè уште не е завршена и дека Министерството очекува официјални забелешки од универзитетите.
Одговарајќи на новинарско прашање на традиционалната прослава по повод празникот Свети Трифун на Опитното поле на Факултетот за земјоделски науки и храна при Универзитетот „Св. Кирил и Методиј“ во Скопје, Јаневска рече дека сѐ уште не е завршена јавната дебата и најави дека од следната недела, по договор со универзитетите, Министерството ќе оди во нивна посета на јавна расправа.
– Сè уште не е завршена јавната дебата, сè уште очекуваме забелешки. Ние добиваме на ЕНЕР, добиваме и преку мејлот, но очекуваме и универзитетите официјално, на било кој пат, да ги достават своите интегрирани забелешки, бидејќи делот не се повторува. Сè што сметаме дека е разумно ќе биде прифатено. Сè што сметаме дека можеби ќе претставува проблем ќе биде дискутирано. Тоа значи средба на Министерството за образование и наука со сите професори кои ќе сакаат да присуствуваат на јавната расправа, каде што ќе ги дискутираме спорните членови, и гледам дека во најголем број нема никакви забелешки. Спорни остануваат неколку членови за кои треба да се договориме и да дискутираме, рече Јаневска.
Вели Македонија веќе нема време за просечни и потпросечни резултати.
– Потенцирам, ние веќе немаме време да си играме со образование и наука. Немаме време за просечни и потпросечни резултати кои нè доведуваат во оваа ситуација. Мора да тргнеме напред. Министерството и законски и финансиски поддржува напредок, рече Јаневска.
На традиционалната прослава, претходно, Јаневска им го честиташе празникот на граѓаните, особено на земјоделците, лозарите и овоштарите, и изрази поддршка за Факултетот за земјоделски науки и храна.
– Ние, како Влада, ќе ги поддржуваме ваквите проекти и ваквата активност, бидејќи цениме дека немаме веќе време за просечни и потпросечни резултати, рече Јаневска.

